大自然嘅環境真係令人身心舒暢啊！因為拍攝事必關己嘅關係，早陣子我就有機會參與地球之友所舉辦嘅植樹日！其實我讀書嘅時候成日都有參與一啲地理考察以及植樹活動，自己都鍾意親親大自然呢！今次嘅植樹活動其實係相當有意義，相信大家都記得之前香港都發生過多次山火，原本翠綠嘅山頭轉眼間燒到一片光禿，唔知要幾多年嘅時間先可以回復本來面貌，今次地球之友聯同一班有心人，專誠到發生過山火嘅山頭植樹以及照顧剛剛生出嘅樹苗！當然我都有幫手植樹啦，希望我所種植嘅樹苗可以健康成長呢！唔知十年後呢棵樹會變成點呢？不過最重要係大家要小心火種，我嘅小樹苗先可以健康成長！一齊保護我哋寶貴嘅天然資源！哈哈我仲同一班工作人員影相留念呢！
生活喺香港呢個繁華都市，相信有好多香港人每日都過著緊張急速嘅生活，生活環境全部都係高樓大廈，人同埋車，有時都想去行吓公園，呼吸一口新鮮空氣！最近維多利亞公園就舉行咗一年一度嘅花卉展覽，有好多色彩奪目嘅鮮花比人欣賞，除此以外亦舉行咗花卉展覽攝影比賽！當日我就有幸成為攝影比賽嘅模特兒之一，以一身歐陸式打扮亮相！其實之前我都未曾試過歐陸式嘅打扮，今次可以試吓呢種打扮，感覺真係好新鮮，加上可以影靚相留念真係特別開心，希望下年花卉展覽可以再次擔任模特兒試吓唔同嘅造型呢！依家俸上當日花卉展嘅相比大欣賞，希望大家都鍾意！
化妝品對我哋藝人來講可以話係不可缺少嘅日常用品，為咗能夠以最好最靚嘅一面見觀眾，每次上鏡前，化妝都係指定嘅程序！能夠化出一個完美嘅妝容，確實唔係一件容易嘅事，用色要適合自己，力度要適中，當然要講求整體嘅美感，係一門相當高深嘅學問！對於化妝其實我都有一定嘅興趣，可能因為我本身都鍾意畫畫，而畫畫同化妝本身都講求創意同美感．最近有幸幫報紙影咗一輯化妝示範嘅相，從過程中我都偷師學到一啲新嘅化妝技巧呢！
早陣子發生嘅雪災,令到無數國內同胞失去家園,有好多災民更失去至親,實在令人相當惋惜!雖然依家雪災情況已經逐漸緩和,但大自然所带來嘅無情傷害,令到水源受到污染,依靠務農維生嘅農民,農田被水淹沒.畜牧業,魚業,當然都逃不過厄運!可謂欲哭無淚!一群勇敢的電工冒著無情風雪維修電纜,壯烈犧牲,實在令人敬佩!依家國內災區正進行重建工作,希望災民能夠盡快重建家園!前幾日,我就參加咗一個幫助國內災民嘅籌款活動,我哋一班藝進同學會嘅同學仔都有義務演出,當晚我就聯同兩位前輩麥包麥長青,英敏哥鄧英敏擔任大會司儀,而大使官恩娜都有出席.希望當晚籌得嘅善款能為災民盡一點力!
哈哈做賀年節目真係好有氣氛喲,一大班人柴娃娃拜年,真係好開心呢!加上一齊做節目嘅仲有阿Joe同埋Otto，佢哋兩個成日講笑話,真係好搞笑，為大家增添唔少歡樂！阿Joe更加化身成為大老鼠，樣子好趣怪，當然我都有同呢隻趣怪大老鼠影相留念啦！而我個春麗造型都唔錯呢，大家睇睇！
見到大家嘅留言真係好開心呀！另一樣開心嘅事就係見到好多靚花花，農曆新年就快到啦，相信大家都鍾意買啲年花返屋企擺吓令到間屋更有生氣，見到啲靚嘢人都自然開心啲呢！當然我都唔例外啦！前兩日我就有機會去到一個蘭花培植埸，哇！成個培植埸都係蘭花，真係超靚呀！而且啲蘭花仲比市價平，本來我想趁機買啲返屋企擺，但係因為之後仲有其他工作在身，無理由捧著盤花周圍走嘅！所以最終都無買到！不過唔緊要，因為培植埸嘅負責人教咗我點選擇靚嘅蘭花，所以都有意外收穫，如果大家都想知點選擇靚蘭花咁就要留意事必關己啦！我都有影啲相返來，一齊欣賞吓啦！
Hello，大家好，好高興可以喺度同大家見面，哈哈！其實我都係第一次寫blog，心情既興奮又緊張，所以希望大家多多指教呢! 第一次同大家見面，不如同大家分享一吓我喺星期一至五晚上１０：３０播出嘅節目＜事必關己＞拍攝嘅趣事啦！今次可以有份做＜事必關己＞真係好感激，好開心，好多謝公司比呢個機會我，我會全力以赴，做到最好！能夠做事必關己真係令我大開眼界喲！因為每次都會拍攝一啲最新鮮嘅主題，好似之前聖誕我就接觸過一個受專業訓練嘅聖誕老人.哇!真係同我哋想像中嘅聖誕老人好似吔!以扮聖誕老人作為終生職業,實現好多小朋友夢想,真係好偉大又有趣呢!咁難得嘅機會我呢個大細路當然都有影相留念啦!依家聖誕節就過咗大半個月,相信Santa Kelvin依家應該喺馬爾代夫享受緊陽光與海灘喲！點解？因為Santa Kelvin話佢踏入２００８年會第一時間除下佢件聖誕老人衣服，剥光豬曬太陽，享受悠長假期，等待下次聖誕節來臨．哈哈諗起聖誕老人剥光豬曬太陽，個畫面都應該好有趣呢！
