英國塗鴉藝術家Banksy從來都唔會喺商業畫廊出售自己嘅作品，雖然淡薄名利，不過由於佢嘅作品經常畫咗喺人哋嘅產業上面，所以好難阻止業主出售畫有佢作品嘅產業；Banksy都算擁有點石成金嘅超能力，好似呢間屋嘅外牆，年初叫價去到100萬英鎊。

10年前，Banksy喺一對夫婦嘅貨櫃車改裝而成嘅流動屋大顯身手，當年寂寂無名嘅佢，仲用兩張音樂節入場券當作俾呢對夫婦嘅酬勞，Banksy後嚟成咗名，呢間流動屋當然身價暴升啦！最近，呢對夫婦決定拍賣呢輛咁具紀念價值嘅貨櫃車。

俾著係我，咁有紀念價值嘅流動屋，我就未必捨得賣嘞！