全城熱播 嘅 台慶劇 〈宮心計〉, 首播當日我好期待 又 緊張 !

我期待, 係因為: 靚人, 靚衫, 靚妝, 靚景, 再加上 好劇本, 好戲之人 同埋 拍攝過程好辛苦 !!! ~ 各梳頭, 化妝, 服裝部門 嘅 同事; 負責拍攝, 運輸, 道具, 外景廠景 嘅 人員, 以及 一班好專業 嘅 演員 都真係為套劇負出咗好多 … …

記得〈宮心計〉係喺今年 三月頭 開始拍攝, 雖然唔係 大熱天時, 不過每位 演員 都著上 厚厚嘅宮庭戲服, 啲汗都係會不斷咁流; 再加上 重重嘅頭飾, 心姐 (謝雪心), 菊姐 (關菊英), 米雪姐 等都要成日帶住頸墊, 用來 support 住個頭!

仲有, 因為有好多大場面, 人太多, 所以每次出 外景 都要 05:00 通告 … … 一場喺電視上播 六, 七分鐘嘅戲, 可能要花上大家 幾日時間去拍 … … 所以 大家 真係要落足眼力 去 欣賞呀!

之於我緊張, 係因為: 『宛蔚』都有幸客串演出, 而且仲要喺 第一集 出現 … … 哈哈哈!

當晚, 睇完 第一集 之後, 我發現自己係劇中 唯一 一位“菲律賓籍”嘅“中國宮女”… … 因為嗰時嘅我 係拍緊一個 遊戲節目, 成日都要出外景, 所以曬到 黑麻麻! 好搞笑!