第一日，我地去左珠海海泉灣既神秘島主題樂園玩左三個驚險又刺激既機動遊戲，分別有E形戰車、兩個360度旋轉既過山車、仲有尖叫度到達一百既跳樓機。我平時好鍾意玩機動遊戲，但從來未玩過E形戰車。我覺得三個機動遊戲之中，跳樓機係最好玩既，因為佢同香港既跳樓機好唔同，香港既係慢慢上到最高，之後係最高等一段時間，同你玩下心理戰，嚇一嚇你先，之後再好快咁滑落去，但係珠海呢一個跳樓機，就係得一句are you ready？就以極速兩秒鐘好快咁上落，叫都未嚟得切就已經玩完啦！真係好好玩，玩到我標眼水。
而過山車都係一樣，一開始用極速上一個大斜坡，之後好快咁樣衝落一個近90度既斜坡，再有兩個令你全身倒轉既360度轉圈，真係你都咪話唔驚。
而E形戰車，初頭俾佢既外型嚇親，因為佢會以一個E形軌道去行，行到E字既三橫，全個身會反轉再反轉，但因為速度不太快，仍可接受。

第二日我地去左海洋溫泉中心，裡面有各式各樣既溫泉，有一個溫泉俾我印象最深刻，因為裡面飼養左一班魚仔，當你放隻腳落去既時候，佢會幫你食晒你隻腳d死皮，感覺會痕痕地，十分搞笑。

夜晚我地就會舉行旅遊大使選舉，我表演既係彈鋼琴，呢首歌係一套電影既主題曲，是由周杰倫主演的不能說的秘密，自從參選之後，今次係第二次有機會係廣大既觀眾面前再次表演彈鋼琴，真係感到好榮幸。係當晚我地會每人介紹一樣珠海既特產或者景點，我介紹既係淇奧島白石街，佢具有好重要既歷史義意，記載左中國近代史上，炎黃子孫第一次以血肉之驅抵抗入侵而取得勝利。係淇奧島居民抵抗入侵既事件入面，居民展現出不屈不撓既意志，仲有堅定不移既決心。係今次選舉入面，無論遇到幾大既困難同埋挑戰，我都會以淇奧島居民為榜樣，堅持到底，跨越障礙。

第三日亦都係行程既最後一日，我地去左棕櫚路，仲有珠海漁女象拍攝外景，仲有去左海泉灣golf練習場跟教練學下打golf，行程就完滿結束啦。

 Loading ...