寫blog，除左可以同人分享自己嘅生活點滴，仲可以幫左自己記憶，得閒睇番以前寫嘅blog，會發現好多已經忘記左嘅嘢。頭先我睇返我第一篇blog，就同呢個blog嘅名一樣，叫「JO飽餅家」。原來我當時好老土咁解釋點解要用「JO飽餅家」做blog名，跟住仲簡介自己，真係娘爆！

不過呢，過左咁多年，我想同大家宣佈，我都係冇變過，一樣咁老土！

我唔怕你地話我份人原地踏步，冇啲大志架。我就係曾經心太野，先搞到自己冇左個好老婆，又錯失左十幾年同仔女相處嘅時間。

所以呢，我今日想繼續老土咁話俾大家聽，呢篇係我最後一篇blog喇，「JO飽餅家」要熄燈喇！(哈，早過阿卡！)

咁我諗你地都會好老土咁問：吓？點解呀？/JO飽你揼低我地嗱？/你身體冇咩吖嘛？

答你地之前，我想你地睇吓我第一篇blog嘅一段：

「而家生活無憂，老婆對我又好，幾個仔女都學有所成，我好滿足架喇，仲講返以前啲嘢嚟做乜？」

就係呢一句！或者個天覺得我太得戚，講完呢一句之後，啲煩嘢就要幾煩有幾煩！逼人換招牌、阿媽絕食、視網膜脫落、阿月離家出走、第二次離婚、爭產官司…真係一浪接一浪！

好難得終於可以平靜落嚟，同番阿荷一齊，又日日同啲仔女共聚天倫。

雖然我好開心喺呢度認識到一大班網友，亦都好多謝你地咁多年嚟俾左好多鼓勵同意見我，不過我甘泰祖以後嘅生活，只有一個目的，亦即係我嘅生日願望：

「我身體比你好，你死得比我早」

我對眼唔好，醫生話對住電腦好傷眼架，我唔可以做任何傷害自己身體嘅事！

為左阿荷，我要同你地講再見喇，byebye~~~

共33個回應

1. 表裡不一 

有一個女人，我與她相處了十多年，一直認為她體貼嫻淑，是世上最好的太太；現在才發覺她表裡不一，心如蛇蠍。

2. 一刀兩斷

她想方設法傷害我的子女，除了跟她一刀兩斷，別無他法。

3. 一窮二白

我以前是個一窮二白的做餅師傅，這十多年來，她也確實為了生意盡心盡力，我本來打算將財產跟她對分。

4. 不可一世

但她竟不可一世的跟我說，我們的生意今時今日的成績，全是她的功勞，故只會分一成的財產給我！

5. 一文不值

她竟將我曾付出的心血說得一文不值！

6. 一筆勾消

好，既然她如此絕情，我們之間的恩義也從此一筆勾清！

7. 一心一意

阿荷曾說她的餘生只做一件事，就是教好她的兒女。現在，我的餘生也一心一意做一件事：保護我的財產，將來分給我的兒女。

8. 一決雌雄

我不會就此屈服，就在法庭上一決雌雄。

9. 一木難支

即使我心計不如她，陰毒不及她，但我有六個仔女支持，她一木難支！

10. 背城借一

即使我手上的現金只有她的十份一，即使我聘請那律師的手下只有她那個律師的十份一，我也要爭回屬於我的十份九，背城借一！

共38個回應

唉，各位街坊，同大家交代聲先，我隻眼而家矇查查咁，寫字寫得好慢，粵劇班要暫停一陣先。其實就算我睇得清楚，都冇乜心情再寫喇，近排屋企發生好多事，真係嚇到我心驚膽跳…

我視網膜脫落都算小事，我入醫院嘅時候淨係不停諗，我有咩事都唔緊要，最緊要係唔好影響到阿媽，我唔想佢為左我病情惡化！好啦，到我做完手術，以為一切OK，點知阿卡竟然心臟病發，入左深切治療！唉，我同阿媽一把年紀都未駛深切治療，阿卡後生細仔，無病無痛，點會突然間搞成咁嘅啫！我當時真係而不得自己瞓入去，換返阿卡出嚟呀。

好啦，到阿卡冇事喇，嘉美又失驚無神話冇左個仔，即係我個孫！雖然話個仔可能係嗰個JIMMY，但都有可能係阿圓架嘛！呢個女人點可以咁狠毒，為左唔俾人威脅，就親手殺死自己嘅骨肉？

阿媽、阿卡同我都咁努力生存落去，估唔到一條小生命就咁冇左…

共20個回應

今日繼續同大家講粵劇。相信大家就算冇睇過粵劇，都聽過「小生」、「花旦」、「丑角」呢啲詞語，但你又知唔知道佢地講緊粵劇嘅行當？

唔同嘅行當都會有獨特嘅化妝方式，例如生、旦屬於俊扮；淨、屬於勾臉。勾臉又叫做開臉，即係用誇到冇得再誇嘅顏色呀、線條呀，搞到你睇唔出個演員本來嘅樣，嚟象徵佢所飾演嘅行當。顏色方面就得紅、黑、白、藍、黃幾隻嘅啫，好易分架，紅色代表血性忠勇，黑色代表剛耿忠直，白色代表奸惡陰險，藍色代表狂妄兇猛，黃色代表驃悍幹鍊。

咩話？你地讚我好叻，識分得清楚？唉，識分粵劇嘅化妝冇鬼用呢，現實入面變個忠邊個奸我都未分得清楚！阿紅塊面紅粉菲菲咁，我就以為佢係忠嘅，到今日今日，佢同佢嗰個前夫死人強想陰乾我家好月圓，我先知佢係白面，奸嘅！你話我呢個丑角係咪仲丑過梁醒波？

共16個回應

其實有時我希望大家睇「JO飽餅家」，除左可以了解吓我嘅生活之外，都可以袋到啲嘢落袋。所以我打算環繞一啲我成日會提嘅嘢，講解吓佢地嘅意思。首先我想講吓有關粵劇嘅知識。

你地都知啦，次次阿莎上親阿荷屋企，我都會笑佢係大龍鳳劇團嘅老倌，又上嚟開鑼鼓。咁其實你地知唔知「大龍鳳」係咩意思呢？

原本「大龍鳳」係一個劇團，響六十年代初，由何少保先生領導、粵劇紅伶麥炳榮、鳳凰女同譚蘭卿所組成嘅。呢個劇團唔單止係當時粵劇界嘅中流砥柱，更加慷慨扶掖後輩，好多粵劇演員，都係由「大龍鳳」栽培出來的。

而因為「大龍鳳」嘅戲寶「鳳閣恩仇未了情」，「百戰榮歸迎彩鳳」、「蠻漢刁妻」、「癡鳳狂龍等」，都好深入人心，提起「大龍鳳」，大家都會連想到大鑼大鼓的舞台戲劇。所以，而家大家都鍾意用「大龍鳳」嚟形容一啲大吵大閙，有心做戲俾人睇嘅人同事。

至於例子，我諗唔駛詳細講，你地見到阿莎喺一大班人面前講嘢，嘈到你地要遮住耳仔嗰啲就係嘞。

值得一提嘅係，唔係場場大龍鳳都唔開心嘅，好似我同阿媽啱啱合演嗰一場，令到阿圓坐到家好月圓嘅總經理位，就係非常有意思嘅大龍鳳嘞，哈哈！

共14個回應

呢排寫日記，唔知點解成日都同數目有關。中秋節寫過三十三吋嘅月餅，跟住講阿莎係「攞你命三千」，今日就到感慨萬千。

「三十三吋」係實數，「三千」係約數，而「萬千」，只係嘗試將感覺量化。

感慨既然係一種感覺，其實又點能夠量化呢？不過呢樣嘢太抽象，我文筆唔好，唔識得形容，想講返頭先喺酒樓嘅感受，個腦淨係諗到呢四個字。

我同阿荷一齊行左十幾年嘅路，跟住嗰十幾年嘅路，我同阿紅一齊行，而且越行越順，越行越高，慢慢唔記得左以前嘅路。

一齊去睇波，我差錯腳碌左落山…

我視網膜脫落，驚以後都冇得喺餅舖度做，阿荷安慰我仲可以整盲公餅。

十號風球，我地一齊送餅去長洲，隻船入晒水，但我地都唔捨得放低啲餅…

今晚我一幕一幕咁記返起，原來每一個細節都仲記得咁清楚。

最令我感慨嘅係，我居然喺同阿紅嘅婚禮度記起呢啲嘢。

啲細路祝我同阿荷永遠幸福快樂，其實我地又點可以再好似以前咁？

我只希望阿荷佢永遠都幸福、快樂。

共49個回應

阿莎成日話阿月係攞女，結果阿荷鬧返佢係攞婆，鍾意攞著數、攞小便宜、攞人嚟hurt…呢件事相信大家都好清楚，我唔多講喇。不過最近我覺得阿荷講少左阿莎一個攞字，就係「攞你命三千」！

我唔算鍾意睇戲，不過就係星爺半個fans，你地知啦，阿慶細個成日都唔開心，除左扮林子祥唱歌，我間中都扮吓星爺氹佢開心架。

喺《國產凌凌漆》入面，羅家英飾演嗰個達文西嘅武器「攞你命三千」。

攞你命三千係由中國中央精神病院俾人研究系博士達聞西花費左好多精力，喺二千幾年前發明。攞你命三千集十幾種武器於一身，包括有西瓜刀、鐵鏈、火藥、硫酸、毒藥、手槍、手榴彈、殺蟲水等等。

自從阿莎喺葡萄牙返嚟，搞到阿月離家出走、呃達叔啲錢、差啲搞禍阿慶個婚禮…真係招招新奇，鑊鑊攞你命。

最近佢又出動新武器，話阿荷唔係達叔嘅親生女，要攞返間屋同埋舖頭！跟住為左問阿紅攞錢，仲推左佢落梳梯！

嘩，佢真係一個手榴彈掟埋嚟，另一隻手又成把西瓜刀斬埋嚟！

今次好彩證實個手榴彈係流嘅，原來阿莎先至係真正嘅攞女；把西瓜刀未至於劈死阿紅，但下次唔知有冇咁好彩。

唉，有阿莎呢個人肉版「攞你命三千」喺度，我真係好擔心…

共20個回應

我係家好月圓嘅老闆，又係「JO飽餅家」嘅主人，唐餅同我嘅關係梗係好密切啦。記得細個嗰時，我地有個同學屋企幾好環境嘅，成班書友仔每一年最期待就係佢生日，因為可以去佢屋企食生日蛋糕。不過我就唔係好恨嘞，因為我自細就鍾意食唐餅多個食西餅，所以我生日都寧願食老婆餅多過生日蛋糕！

我因為鍾意食老婆餅而去學整餅，整整吓餅仲娶左個老婆返嚟。唐餅對於我嚟講，真係唔止一個餅咁簡單。

能夠將興趣成為事業，仲有老婆嘅鼓勵，後生嘅時候，我手餅喺唐餅界嚟講都算薄有名氣架。

今年中秋，係我離婚之後，第一次同阿荷同班細路一齊做節，亦都令我記番起當年嘅一個承諾。

可能班細路已經唔記得左喇，但我真係好想將呢個三十幾吋嘅月餅造出嚟。

可惜，我已經唔係當年嘅甘泰祖喇，「寶刀未老」講就容易，到落手造，係一次又一次失敗。

可幸嘅係，六個仔女亦都唔再係當年淨係識得食嘅細路，而係可以支持我，不斷幫我去完成承諾。

呢個三十幾吋嘅月餅，係我地一家人努力嘅成果。

寶刀雖老，親情更濃。

共15個回應

自從阿媽上次喺醫院咁辛苦咁危險，我做仔嘅唔可以喺佢身邊，真係好內疚。所以我比以前更加緊張佢，每一日都會問佢好多問題，好似：你尋晚瞓得好唔好呀？

有冇氣促？

今日想食啲咩呀？

想食海南雞？但你有少少傷風喎，等好番先食好唔好？

你出去呀？去邊度？

同朋友飲茶呀？邊個朋友？

幾點返嚟？我叫司機去接你。

聽聞有個大老倌復出喎，你想睇幾多場？

不如我陪你睇好唔好？

總之就一日問到黑，問到阿媽都話我仲長氣過佢！不過我知佢個心係好甜嘅。

其實除左我之外，阿紅對阿媽都係噓寒問暖，但係阿媽對佢就冷淡好多，對佢嘅問題只係敷衍過去。

我明白阿媽嘅反應嘅，因為我同佢一樣，對於阿紅，都有一條想問又唔敢問嘅問題：

阿媽病重嘅事，係咪你指使阿恭唔講俾我知？

我唔敢問，因為我唔知點去面對個答案。

共26個回應

我從來都係一個迷信嘅人。如果唔係，嗰時聽到睇相佬贈我一句「金蛇本非池中物，一遇中秋便化龍」，我都唔會即刻有返信心。不過，最近我對於呢樣嘢越嚟越懷疑。

首先，我前排先知，原來係阿紅收買個相士同我講嗰句說話嘅。我知道阿紅係一番好意，不過都證明左，我嘅成功唔係因為命中注定，而係靠我自己嘅努力。

其次，年頭我去過批命，個相士話我今年開始會行十年大運，一家相處和睦。但係呢幾個月屋企特別多事發生，仲連官司都打埋，咁都叫一家和睦？人地話風水佬至少呃你十年八年，佢連幾個月都呃我唔到！

仲有，今去次旅行，要離開阿媽同班細路咁耐，又冇得通電話，我真係好唔放心，所以最初阿紅話想去東歐先，第一站係波蘭，我即刻反對！波蘭喎，即係波瀾啦！嫌屋企仲未夠波瀾咩？！於是我就同阿紅講，難得我地可以二人世界，梗係去啲浪漫嘅地方啦，一於去意大利先！大吉大利，夠老黎呀！←呢句我心諗

點知我去到意大利啫，阿媽就喺香港入左醫院，嗰個死人恭仲特登瞞住我！意大利應該改名做意大凶！

共16個回應