講起上嚟，今次係我一生人入面，過得最長嘅二人世界。

後生嗰時同阿荷拍拖，因為好快我地已經想結婚，所以拍拖嘅主要節目就係喺餅舖一齊整餅，希望可以快啲儲夠錢。餅舖周圍都係人，基本上我見阿荷嘅時間，同見達叔、蓮子蓉佢地差唔多。

到結左婚，阿卡好快就出世，跟住就係阿好佢地幾個。班細路好黐我地架，尤其是阿月同阿慶，最鍾意夜媽媽捐入我地被竇度瞓！

後嚟我同阿紅一齊，又同阿媽、心女佢地一齊住，阿紅又掛住搞舖頭嘅嘢，我地都係冇乜機會二人世界。

今次雖然好唔捨得班仔女，不過可以兩個人出嚟鬆吓，又真係幾relax。

今次係我第一次嚟意大利，第一次騎馬，第一次試土耳其式”own”泥，真係咩煩惱都冇晒！阿紅仲plan定聽日去學整pizza添，唔知可唔可以整到好似月餅咁嘅形呢？我想影幅相返去俾阿荷同啲仔女睇吓！

吖，有樣嘢好奇怪，呢幾日雖然玩得好開心，但我個心間唔中會抽幾下，感覺唔係幾舒服，唔知係咪仲未習慣呢度嘅水土呢？

共31個回應

今日我要同好多人講聲對唔住。尋日我話暫時唔想再寫「JO飽餅家」，好多網友留言嚟鼓勵我，令到大家擔心，真係對唔住。我而家諗通喇，我會繼續寫「JO飽餅家」，直到我寫唔到為止。

尋日有網友睇左我嘅BLOG，SEND EMAIL嚟話有興趣幫我繼續寫「JO飽餅家」，因為我而家改變左決定，只可以同你地講聲對唔住，同埋我覺得我責任講返俾你地聽令我改變主意嘅原因。

原因好簡單，我唔可以再逃避。

我唔想繼續寫BLOG，係為左逃避去解決一個令我頭痛嘅問題。我希望只要我唔寫BLOG，就唔會諗起個問題。

呢個亦都係我咁多年嚟嘅處事方法。

但原來咁樣做，我個頭的確唔會痛，但就帶俾身邊嘅人好多痛苦。

十幾年嚟，我將家好月圓交俾阿紅打理，又將阿卡、阿圓同中仔教俾阿紅去教，美其名係信任阿紅，其實我只係逃避去收拾離婚之後嘅爛攤子。

如果我樣樣嘢親力親為，就算睇唔穿阿紅嘅心計，都冇咁容易俾佢實行度，咁我幾個仔女就唔會受咁多痛苦。

阿卡，你年紀輕輕就要睇住兩個細佬，個心明明好憎阿紅，但為左兩個細佬都要留低。令到你受左咁多委屈，對唔住。

阿圓，你細細個就冇得留喺親生阿媽身邊，咁多年嚟以為阿紅對你好好，今日先俾你知道其實佢只係利用你。令到你一次又一次咁受傷，對唔住。

中仔，你咁多年嚟自己孤伶伶喺英國，之前想返香港都要好似做賊咁匿埋。令到你嘅童年咁唔開心，對唔住。

阿好、阿月、阿慶，因為我怕阿紅唔高興，唔敢成日去探你地。令到你地咁多年嚟都失去左父愛，對唔住。

不過我應承你地，我以後都唔會再逃避。

我希望以後都唔駛再對你地講對唔住。

共77個回應

「JO飽餅家」雖然只係經營左短短嘅日子，但係一直得到大家嘅厚愛，每日都有唔少網友嚟幫襯我、留言俾我。有時候我唔開心、鑽左牛角尖，網友就會留言開解我，同我分析問題，我嘅心情亦都會平伏返啲。我真係好珍惜「JO飽餅家」呢個容許我分享宣洩嘅地方，亦都好慶幸可以認識到你地。

不過唔怕老實話俾你地聽，最近落筆真係越嚟越難。一來係我對眼未完全好返，戴眼鏡個頭會暈，唔戴又睇唔清楚；二來最近有個問題，真係令到我好困擾。

我諗你地都估到，我係講緊阿紅想將家好月圓嘅八成股份分俾我六個細路嘅事。家好月圓係我一人生人嘅心血，梗係想由我六個仔女嚟繼承，而且佢地越早學識點樣去經營一間餅舖就最好。可惜阿荷就唔係咁諗，就算我點樣求佢，佢都唔支持，啲仔女又最聽佢嘅說話，我都冇晒辦法…

我咁講唔係話想怪阿荷，我知道佢係一個好有骨氣嘅女人，佢都係為啲仔女好，想佢地腳踏實地做人，只不過我又真係好希望啲仔女繼承家好月圓…

每次一諗呢件事我就頭痛，好似而家咁，我個頭又赤赤痛喇。本來我有諗過寫其他嘢，但我腦入面又淨係得呢件事，所以對而家嘅我嚟講，寫blog即係頭痛嘅同義詞，唯一可以做嘅就係暫停寫blog…

不過我又唔想貿貿然執左「JO飽餅家」佢，令到咁多位街坊失望，所以就諗住將呢度租出去先。租我呢度唔駛錢，仲可以賺到人氣，不過條件係寫嘅內容要環繞家庭，因為始終要顧及各位街坊嘅口味，當然，如果你個名有個「祖」字，或者英文名叫阿JO就更好。

如果有人有興趣嘅SEND EMAIL俾我啦！

共30個回應

估唔我視網膜脫落，令到我睇少左好多嘢，但又得到更多。好似啲仔女嚟探我，我睇唔到佢地，但感覺就更加熟悉。

咪睇阿卡牛高馬大，麻甩佬一個，原來佢對手好鬼滑架！

阿好由細整餅整到大，對手鞋”颯颯”，不過佢鍊骨嘅手勢好好，將我啲筋骨當麵粉咁搓，俾佢鍊完成身都鬆晒！

阿月同阿慶成日孖公仔咁探我，有次阿慶唔得閒，得阿月自己嚟，但佢呃我話阿慶都喺度。不過我唔會上當，因為自從我睇唔清楚嘢，我先留意到阿月鍾意搽薰衣草香水，阿慶身上就永遠都有茉莉花香味；而嗰日我淨係聞到薰衣草嘅香味。

阿圓對咩都唔係好上心，唯獨同阿紅講起家好月圓嘅生意，佢把聲就會即刻生猛晒。

中仔就啱啱相反，同阿荷阿好佢地一齊嘅時候，佢就好多嘢講，但阿紅一喺度，佢就粒聲都唔出，令我更加覺得俾佢跟返阿荷係正確嘅。

除左更加了解啲細路，今次我視網膜脫落，仲令到阿紅主動提出將家好月圓八成嘅股份分俾班細路，唔係因禍得福係乜？

住院嘅日子，雖然睇唔到陽光，但每一日都覺得好溫暖。

共24個回應

生兒育女真係好辛苦，不過得到嘅快樂都係無可比擬嘅。好似第一次聽到啲仔女開口叫自己，嗰種開心真係非筆墨能夠形容。咁多個仔女入面，阿卡、阿好、阿圓同阿中開口第一句都係叫佢地荷媽嘅，唯獨阿慶開口係叫Jo飽！我聽到嗰時真係開心到唔見牙又唔見眼架！到佢大個少少仲好黐我，有時我同朋友飲嘢夜左返，就算佢眼皮耷晒落嚟都唔肯瞓，點都要等埋我返嚟先肯上床嘅。

嗰陣時阿慶仲識得講嘢，佢唱歌仲好好聽添！佢讀幼稚園嗰時，老師揀左佢上台表演，我仲記得佢住條格仔裙，用紅色絲帶紮左兩條孖辮，又唱又跳都唔知幾有台風！

不過嗰次大病之後，我再聽唔到阿慶叫我Jo飽喇，佢亦都越嚟越少笑容，成日都苦瓜乾咁樣。

有一次我地睇電視，林子祥唱緊《分分鐘需要你》，阿慶竟然睇到咭咭聲笑喎！咁我咪有樣學樣，學左呢首歌嘅手語嚟氹阿慶開心。

不過自從同阿荷離左婚，我都冇再唱歌俾阿慶聽喇。直到嗰次見到阿荷唱俾阿慶聽，我先發覺自己已經將啲手語忘記得七七八八！嗰一刻我真係覺得好內疚，因為咁多年嚟我都冇盡過做父親嘅責任，喺啲仔女唔開心嘅時候氹佢地開心，甚至連佢地唔開心我都唔知道…

阿慶，Jo飽知道有一個男仔為左你而學手語，但又因為接受唔到你嘅缺憾而要分手…Jo飽知道你好傷心，不過唔緊要架，你終有一日會搵到個完全接受你嘅人。而以後只要你需要我，我都會唱《分分鐘需要你》俾你聽。

共28個回應

曾經有一位股神朋友，教過我投資股票嘅必贏法則：Buy and hold。即係話當你發現一隻優質股，喺價錢合理嘅時候要即刻買入，就算佢嘅股價跌到低過你嘅買入價，都唔需要慌張拋售，如果有餘錢更加應該趁低吸納，因為優質股嘅潛力難以估計，將來會雙倍、甚至三四位奉還。你地一定會話：JO飽，而家揸沽都生性做人，發奮搞揸勤啦！你唔係反而做壞榜樣，走去揸沽吓嘛？！

非也非也！其實我JO飽係靠實業起家，素來都唔太熱衷投資股票嘅。令我諗起”Buy and hold”理論，純粹係因為我兩個老婆。

出年係雙春兼閏月，最近我地家好月圓都搞左唔少宣傳去催谷嫁喜餅，亦都因為咁令我記起我同兩個老婆嘅唔少往事。

我同阿荷青梅竹馬，嗰時佢假假地都係餅舖太子女，而我只係光棍一個，但佢一啲都冇嫌棄我，同我一齊捱大啲仔女。十號風球去長洲送餅，有幾多女人做得到？

如果用股票嚟比喻，阿荷絕對係一隻優質股，配合佢嘅身形，話佢係「大笨象」就最貼切。

難得搵到隻「大笨象」本來梗係長揸啦，不過唔知好彩定唔好彩，後來俾我發現左一隻好吸引嘅「紅」籌股…結果我為左長揸呢隻「紅」籌股，沽左有十幾年感情嘅「大笨象」。

後來證明我眼光冇錯，呢隻「紅」籌股真係一隻優質股，幫我將家好月圓搞到而家有十幾間分店不特止，仲盡心盡力做好後底乸呢個角色，為左去搵阿圓搞到小產…話佢係941都不為過。

「大笨象」同941，兩隻都係優質股，好難話邊隻好啲。其實應該buy and hold，兩隻都長揸！

可惜現實世界唔同股票世界，想長揸941，就一定要「移動」大笨象…

而家嘅我，淨係可以keep住「大笨象」啲股息，間唔中攞出嚟食飯，聊作安慰。

股息係咩？咪家、好、月、圓、慶、中佢地幾個囉！

共23個回應

頭先上左阿荷佢地屋企，見吓管家仔個女朋友。其實我心情都幾緊張，話晒都第一次見啲仔女嘅另一半嘛，仲有可能做我新抱添！聽佢地講，呢個婷婷係管家仔嘅舊情人，近排撞返又走返埋一齊。又難怪嘅，婷婷人又靚，又斯文大方，管家仔眼光都唔錯，有我嘅優良傳統！可惜管家仔送完婷婷返屋企之後，竟然話同人啱啱分手喎！而家啲後生嘅感情真係難明，離完又合，合完又離，唔似得我地以前呀，我同阿荷做左拖友冇幾耐，已經當對方係結婚對象架喇，同佢日日由朝早到晚，都係為左搞好間餅舖，希望可以快啲儲夠錢結婚；到結左婚，又希望快啲可以有我地兩個嘅愛情結晶品；到有左阿家，又希望追第二個…

你地可能會話，JO飽，你講到”懶”深情咁，最後咪又係拋棄左荷媽！唉，關於呢一點，我當然唔可以否認，我只係想話，喺我地一齊嘅時候，雙方都係好認真嘅…

不過頭先見到管家仔為左舊情人而失落，不禁令我聯想到阿荷。前妻都係舊情人嘅一種，而且感情更加深厚。阿荷當年啱啱知道我同阿紅嘅事，心情究竟係點樣嘅呢？不期然又有啲歉疚…

所以頭先我地玩圍圈唱歌，見到阿荷笑得好開心，我都有啲安慰。

共46個回應

早知一

早知當年借左達叔「家好月圓」個招牌，會搞到今時今日咁煩，我就唔攞嚟用。係，嗰時我地間餅舖生意係唔掂，最多咪執左佢，轉行做第二啲生意囉！甚至幫人打工都得架！生活就未必有而家咁好架喇，但起碼唔駛成日俾人齒住，當賊咁扮！

早知二

早知當年爭到阿家、阿圓同阿中返嚟，會搞到阿紅成日俾人鬧，我當年就唔同阿荷爭，六個仔女俾晒佢算喇！咩話？你話我狠心？為左個女人唔單止拋妻，仲棄子？我而家雖然養返三個，都係俾人話棄子架啦，有乜分別？而且老實講，或者啲仔女都係跟返親生阿媽好啲。我唔係話阿紅對阿家佢地唔好，不過後底乸真係太難做，點做都係錯。

早知三？

咩話？你覺得應該仲有一個早知？早知當年同阿紅一齊，會搞到今日咁煩，我就唔應該同阿荷離婚？嗱，講明先，我而家係覺得好煩，但唔代表我後悔同阿紅一齊喎！冇呢啲嘢煩住嘅時候，我同阿紅係生活得好開心嘅！所以我一啲都冇後悔！呢個「早知」亦都唔成立，知道未？

共29個回應

平時行街，有時會見到啲舖頭落左閘，閘上面就貼住「東主有喜 休息一天」，啲客仔去到就算摸門釘，都唔會太介意嘅，咁東主有喜吖嘛，應該戥人開心嘅。但你地有冇諗過，其實嗰時東主可能係屋企有事，所以開唔到舖？又或者佢有心事，想行開吓？只係用「東主有喜」嚟做藉口？

其實我原本都諗住喺「JO飽餅家」呢度起個「東主有喜 休息一天」嘅標題，偷懶唔寫一日。不過我又唔想呃大家，因為呢排我一啲喜都冇，為咗阿荷佢地掛返「家好月圓」個招牌嘅事，真係好煩！煩到日記都冇心情寫喇！

好，總算交代完，落閘收舖！請大家多多包涵！

共25個回應

今年中秋節嘅天氣好好，天朗氣清，我而家就喺窗邊，對住個又圓又大嘅月亮嚟寫呢篇日記。可惜「月圓」唔代表「家好」。

今日係十幾年以嚟，「家好月圓慶中秋」七個仔女一齊同我過中秋節，估唔到同十幾年前，我同阿荷離婚前最後一個中秋節一樣，過得咁唔開心。

你哋或者會投訴：嘩，JO飽，你又想講往事呀？唔講得唔得呀？

其實今日講往事嘅唔係我，係響我哋「家好月圓」做咗廿幾年嘅蓮子蓉；而佢講嘅呢段往事，我同你地都一樣唔想聽。

我本來有一個細佬，叫阿全。佢由細到大都係阿媽嘅心肝命碇，可惜衰爛賭，成日爭落人周身債，我同阿媽都唔知點教佢好。但我哋點都估唔到佢會走去跳樓！後來我哋先知，原來佢死之前同阿荷講過，如果阿荷唔借錢俾佢，佢就會跳樓！但阿荷竟然唔理，又唔同我哋講！阿媽就係因為呢件事好嬲阿荷，當正佢係殺阿全嘅兇手，仲叫我唔好再同阿荷一齊，亦都間接造就咗我同阿紅。

點知今日蓮子蓉竟然講咗另一個版本，話阿全自殺之前已經還清晒啲賭債，佢只係為情自殺，佢嘅死同阿荷一啲關係都冇！

阿紅話蓮子蓉咁講，一定係阿荷教佢嘅！

我唔知蓮子蓉講嘅係真定假，亦都唔想去諗。我一早講過，成日提住啲往事係冇用嘅，尤其係對自己冇好處嘅往事。

所以我決定早啲去瞓覺，瞓醒就當咩事都冇發生過。

共38個回應