我從來都冇諗過會同阿祖喺番埋一齊，大家都幾十歲人咯，唔同而家先至搞復合咩？先至再結婚咩？呢啲嘢我唔再諗架嘞。我而家淨係想一家人開開心心，我係班仔女嘅阿媽，而阿JO就係佢哋嘅阿爸，我哋只會維持呢個關係，就算我叫阿祖搬嚟我度住，都只係視佢係一個好親嘅朋友，又或者係一個親人，我對佢唔再係後生嗰陣時嗰種心態架嘞。

雖然我對阿祖無心，但係佢肯入番呢頭家，我都好開心。我哋雖然輸咗間家好月圓，但係我哋呢頭定就真係做到家好月圓。試問呢個世上，有乜嘢比起一頭家齊齊整整，全家人都開開心心更加重要呀？殷紅無錯係得到好多錢，但係佢身邊一個真心為佢嘅人都冇，相反阿祖只係得到兩成嘅股份，但係就有成班仔女陪喺身邊，日日都笑口常開。阿祖咁樣先係真正嘅幸福，至於殷紅……錢夠用就夠嘞，留咁多錢喺身邊駛又駛唔完，帶又帶唔走，又有乜嘢為呢？

共28個回應

我本來諗住今晚寫吓我另外三個仔女，不過今日突然間發生咗一件好大嘅事，我個心真係好酸好苦，我一定要寫咗呢件事先……唉……我真係唔知點寫好……一諗起件事我就忍唔住眼濕濕……甘老太終於都……去咗嘞……

唉，人真係好化學。佢年紀咁大，之前又留院，我哋都有咗心理準備架嘞，之但係到佢真係過身，我哋都仲係好傷心。而最遺憾嘅係我哋聽唔到佢嘅遺言。

甘老太臨死之前叫咗阿紅入房，照計佢兩個已經反咗面，應該冇乜兩句，佢呢個行為真係好古怪，但係佢老人家要見乜嘢人又點到我哋管吖？我哋唯有企喺病房出面等，但係佢兩個就好似好多嘢講咁，講極都講唔完。醫生話甘老太唔撐得幾耐架，再係咁落去，阿祖同班孫仔孫女真係連佢最後一面都見唔到架。最好我哋唯有唔理佢老人家嘅意願，衝入間房。阿祖佢哋總算見到甘老太最後一面，只可惜佢已經好衰弱，講咗一句管家仔就去咗，我哋連佢最後嘅遺願都聽唔到。我哋應該早啲衝入去架，如果我哋可以早啲下定決心，阿祖佢哋就唔駛帶住個遺憾做人啦！唉！

共67個回應

有句俗語話養兒一百歲，長憂九十九，做人父母嘅，個個仔女都係自己嘅骨，自己嘅肉，邊有可能唔憂心先得架？我一共有六個仔女，所以我嘅擔心亦都係其他父母嘅六倍。阿卡呢個仔，以前就成日掛住渣沽，我呢個做阿媽嘅真係好擔心佢唔識得腳踏實地咁做人。好嘞，佢終於肯聽話，揸住勤力嘅宗旨嚟做人嘞，點知又勤力得滯，有心臟病都唔肯好好地抖下，你話點到我唔憂心吖？

管家仔就係最聽話嘅，不過命運就最鍾意同佢講笑，佢JO鮑同阿紅係夫妻，佢偏偏就要鍾意于素秋。雖然于素秋同佢冇血緣關係，但係始終都係兄妹。我咁開通，知道冇嘢緊要得過仔女開唔開心，當然唔會覺得有問題，但係其他人唔知會點諗。而且阿紅咁憎我哋呢家人，管家仔嘅情路會好難行。

阿月呢個女就最聽我話嘅。雖然佢唔係我親生，但係我真係當正佢係親生女架，不過有時我都會好自私咁希望佢係「外人」，因為佢係一個好好嘅女仔，而佢又鍾意阿卡，如果佢哋唔係兄妹就……我咁諗係咪好自私呢？不過有邊個阿媽唔自私架？係阿媽都希望啲仔女幸福快樂架啦！

夜嘞，今晚就寫到呢度先啦。聽日再寫埋另外嗰三個仔女。

共18個回應

今日我好傷心，但係亦都好開心。

傷心係因為我估唔到嘉美竟然壞到呢個地步，為咗掩飾自己嘅過錯，竟然一次又一次咁屈人，先係為Ronald仔屈阿月，而家又為咗個BB而屈我。人總會做錯，嘉美細細個就俾人搞大個肚係錯，同Jimmy發生關係亦都係錯，但係將個肚屈落阿圓度就係錯上加錯，而將冇咗個胎件事賴落我度就係錯上加錯再加錯。睇見嘉美錯完一次又一次，死不悔改，諗起阿圓竟然娶咗一個咁嘅女仔做老婆，我真係好心痛。但係寧教人打仔莫教人分妻，呢個老婆係阿圓自己揀架，佢有責任去承擔一切嘅後果，無論佢繼唔繼續同呢個女仔係埋一齊都好，佢都應該為自己嘅決定而負責，好好地咁諗吓點解決呢個問題。

雖然呢件事令我好傷心，但係亦都有令我開心嘅地方。阿莎因為睇唔過眼嘉美嘅所作所為而教訓佢，睇見阿莎為咗我出頭，我相信佢個心真係念親情，佢已經唔再係當日眼入面只有錢嘅阿莎，亦都唔再係嗰個以為包庇就代表疼惜個女嘅阿莎。嘉美已經二十三歲嘞，如果阿莎仲唔的起心肝去教佢，咁佢呢世都會係咁架嘞。而家阿莎終於肯做番一個媽媽應該做嘅嘢，我真係好開心。個女冇教咁多年，突然要教番唔係一件易事，但係只要有決心，一定可以教得好，我會喺阿莎身邊支持佢打呢一場硬仗。

共26個回應

本來我唔想去評論嘉美呢個女仔，佢始終係阿莎個女，大家點都叫做一場親戚，但係佢嘅所作所為真係好唔要得。

一不要得：屈人唔駛本

阿莎屈人嘅手段可以話係天下無敵，但係嘉美比佢更加「青出於藍」，一次又一次咁屈阿月，令到佢有冤無路訴。

二不要得：不念親情

一個人就算幾衰都好，只要佢仲念一點親情，咁佢都仲有得救，只可惜嘉美上唔識尊重長輩，下唔識疼愛子女。嘉美當年生Ronald仔可能係不情不願，但係呢個話晒都係自己骨肉，點可以咁忍心丟低佢係葡萄牙？嘉美份人太狠嘞，睇見佢連骨肉親情都唔念，我真係好心寒呀。

三不要得：耍小手段

嘉美為咗取代阿月上台，竟然大膽到夾埋阿莎做戲，話阿卡受重傷入咗醫院，呃走阿月。人仔細細就識得搞咁多手段，到佢年紀大咗，見識多咗，仲得掂嘅？

睇見阿卡終於肯同呢個女仔分手，我真係好欣慰。可能你會覺得我咁講好衰，但係有邊個媽媽係唔自私架？每個阿媽都希望自己嘅仔女好，唔希望佢同一啲唔好嘅人拍拖，我一直唔阻止阿卡，係因為我覺得做父母嘅就算幾擔心都好都唔應該左右仔女嘅決定，應該等佢哋自己決定要行嘅路。所以，當阿卡肯同嘉美分手，我真係鬆咗一口氣，我真係好希望自己個仔可以同一個好女仔一齊，而唔係一個……唉，算嘞，佢兩個都分咗手，我亦無謂再數落嘉美嘞。

共101個回應

月，你長大喇。我知道今次呢件事，你犯既錯，相比起另一個人輕好多。嘉美係一個點樣既女仔，我心中有數，但係佢唔係我個女，佢性格係點，佢有幾壞，對我嚟講唔重要。但係你唔同，你係我個女，教好你係我呢一生既責任。

唔好再自卑喇，唔好再介意自己唔係姓甘，喺你心目中，應該知道荷媽一早當咗你係親生女一樣，而你真係冇令我呢個親生媽媽失望。

你個名叫”皓月”，一輪好靚既明月，冇被烏雲遮蓋咁解。細細個你睇電視，見到包青天個額頭有個月亮，你就話自己個名叫皓月，青天皓月，你話你就係包公額頭上既月亮，又話自己係女包公，屋企邊個做錯嘢你就要罰，邊個做錯事都會俾你”開庭”迫到招認為止。到你大個咗，你都有做錯事既時候，但係荷媽見住你，勇於面對認錯，你永遠都記住荷媽教過你既說話，做錯事肯認肯去改，呢一點唔係人人做得到架。能夠敎到一個咁叻既女，荷媽真係好自豪。

月，荷媽以你為榮。

至於你同阿卡…月呀，感情既事，真係要順其自然，不過荷媽有個預感，阿卡將來身邊嗰個，一定唔會係嘉美。

共58個回應

如果呢個世界上冇殷紅呢個女人，今晚就會係我企喺台上面，同阿祖一齊唱《甜蜜蜜》。如果呢個世界上冇殷紅呢個女人，我就可以著住婚紗上台，彌補當日因為冇錢，冇著婚紗影結婚相既遺憾。

如果呢個世界上冇殷紅呢個女人，阿爸就會安慰好多，唔駛為咗我呢段失敗既婚姻，偷偷地喊咗幾次。

如果呢個世界上冇殷紅呢個女人，我地頭家就少好多眼淚，我六個仔女就可以一直留喺我身邊。

如果呢個世界上冇殷紅呢個女人，咁呢十幾年嚟，我就唔會午夜夢迴，夢見佢同阿祖好幸福咁生活，個心痛到紮醒，兩行眼淚不受控咁流出嚟…

如果呢個世界上冇殷紅呢個女人，今晚，台上面著住禮服既阿祖，就會重新講一次，當年佢同我結婚既時候，講既一段說話：

無論疾病貧窮，我甘泰祖都會陪住鍾笑荷一齊搓餅，無論係老婆餅、老公餅、老爺餅、奶奶餅、阿婆餅、阿公餅…

共67個回應

我鍾笑荷向大家承認，我係一個反口覆舌、出爾反爾、冇口齒、講過唔算數既人。前幾日，我誓神劈願一世都唔會原諒鍾笑莎。但係今日，我要收番我講過既說話，原來無論我叫自己幾決絕都好，最終我都係輸俾感情。今日我睇住阿莎寫俾我地嗰封悔過信，見住佢一個人孤零零咁喺賓館度食銀紙，我個心就知道，就算佢唔係姓鍾，佢呢一世都會係我細妹。原諒兩個字，唔容易講出口，但係容易體會得到。

我呢世人，先後有兩個細妹，都同我冇血緣關係。其中一個係殷紅，當年阿莎過咗葡萄牙，我就當咗殷紅係我細妹一樣，曾經有一刻我傻到多謝個天，送多個細妹俾我，可惜…而阿莎，佢做咗我細妹四十幾年，我啱啱先知道佢唔係我親生細妹，再加上佢做咗咁多錯事，我真係冇理由去原諒佢。不過，佢同殷紅有好大分別，就係殷紅永遠只會帶俾我哋頭家眼淚，而且一世都唔會知道錯。而阿莎呢，我知道佢今次係真心想改過，而且望住佢食銀紙嗰個樣，我哋全家都忍唔住笑，阿莎呢個人，係可以帶俾我哋呢頭家歡樂架！

阿莎，你喺悔過書上面寫既一句說話，真係好能夠表達我而家既心情，亦都係我同你相處咁多年，你講得最有道理既一句話…

「舊事已過，都變成新的了」

共32個回應

今日喺醫院病房入面，佘老太好危險，當佢徘徊喺生死關頭既時候，我不顧一切咁叫番醒佢。聽阿爸講，當年阿媽走既時候，都係話見番好多過咗世既老朋友，我知道，如果嗰一刻我唔拉番佢返嚟既話，佢就會去架喇。佘老太，我好唔想你離開我地，除咗因為我知道啲仔女好錫你呢個嫲嫲，你走咗佢地會好傷心難過之外，其實我自己都好唔捨得你，咁多年既恩怨，喺我見到你好辛苦嗰一刻，煙消雲散喇。好老土一句，患難見真情，喺危難既時候，就最能夠見證人與人之間既真感情。所以我知道，喺我決定叫番醒你嗰一刻，我原諒咗你喇。當我見到你醒番，見到咁多年嚟，你第一次對住我笑，我就知道我做得好啱，家好月圓佢地見我同佢地嫲嫲既關係好番，佢地都會好開心好安樂。

佘老太，我衷心祝福你身體健康！

共86個回應

今朝早隔離屋嗰個幾歲大既小朋友喊得好厲害，我忍唔住開門出去望吓，原來佢屋企個菲傭要返鄉下幾日，佢唔捨得個菲傭，一路捉住佢隻手唔放，佢媽咪想抱起佢，佢就好大力咁甩開佢媽咪隻手…此情此景，令我好心噏，亦到好感觸。

阿圓一直係我心入面最放唔低既一個仔。佢唔似得阿卡，佢未定性，未識分是非黑白就過咗去跟住嗰個女人。佢亦都唔似得中仔，一早俾個女人送咗去英國讀書。之前蓮子蓉同我講，嗰個女人一直將阿圓放喺自己身邊，當正佢係親生仔咁錫，所以阿圓都好孝順佢。我知道喺阿圓心入面，已經唔會好重視我呢個親生阿媽，甚至乎，佢錫嗰個女人多過錫我，佢同嗰個女人既感情仲深過我…我個心，就好似被好多枝針拮住一樣咁痛，一樣咁難受…

今日阿圓嚟餅舖搵我，佢話我上去佢地公司度鬧殷紅，令佢覺得好醜。我知道殷紅一定同佢講過啲乜嘢，所以佢先會嚟搵我既。嗰個女人，用盡不同手段嚟害我三個仔，對阿卡，就令佢沉迷股票，導佢升仙；對中仔，就用物質生活嚟荼毒；至於對阿圓，佢就用最恐怖既手段，收買佢既心，佢用嗰招，就叫「生娘不及養娘大」，等阿圓企喺佢嗰邊嚟傷害自己既親生阿媽！對於中仔，對於我阿卡，我都有信心去改變佢地，但係對於阿圓，我真係無能為力喇！

共111個回應