唔知我呢個網誌，有冇做咗父母既朋友會嚟睇呢？如果有既話，我好想同佢地分享一吓，對仔女應該抱乜嘢既期望。我有六個仔女，我當然好似其他父母咁，希望個個都有好成就。但係最近，我有一啲新既睇法同體會。時下既父母，個個都想啲仔女變尖子，為咗子女成材，迫佢地學呢樣學嗰樣，總之要佢地出頭。其實以前既我，都有類似既想法。記得管家仔細個既時候成績好好，但係佢中學畢業之後，堅持要留喺餅舖幫手，我當然明白，佢係唔想我咁辛苦挨間餅舖，先有咁既決定，我雖然好感動，但係心裡頭都有一陣唔舒服，因為我始終覺得，佢可以有另一條行得更加精彩既路。不過佢好堅持，我亦唯有俾佢自己選擇。

直至我去英國探中仔，我先醒悟起來。中仔偷偷哋返香港，唔肯返過去讀書，我好明白阿祖點解會咁嬲。但係我真係好耐都冇見過中仔笑喇，佢冇書緣，我地迫佢繼續讀落去既話，佢只會更愁更苦。十隻手指有長短，天生我材必有用，中仔喜歡做同電腦有關既工作，既然都係正經既事情，作為父母，點解唔支持佢呢？自從我地唔再迫中仔返英國之後，佢成個人開心起嚟，好似從沉重既壓力中釋放出嚟一樣。試問世間上有乜嘢，俾仔女既笑容更珍貴？我相信天下父母心入面都有一個願望，就係希望仔女做到佢地鍾意做既事，活得開心快樂。

暫無回應