好耐之前，我陪阿爸去黃大仙睇相，個相士話我面口圓圓，係個宅心仁厚既人，不過亦因為心腸太好，註定一生都會被其他人欺負。當時我只係一笑置之，到咗今日，我開始相信，相由心生呢樣嘢。雖然我唔識睇相，不過我識睇人，特別係啲心腸唔好既人，我一眼就睇得穿。所以唔好問我點解堅決反對班仔女返去家好月圓度做，阿莎鬧我係武則天，西太后，獨裁獨權，阻住啲仔女發達。試問天下父母，如果有條光明大道，點會阻住啲仔女去行呢？殷紅呢個女人，叫佢地接管家好月圓，仲話分八成股份俾佢地，

阿莎睇嘢咁表面，當然舉腳贊成，但係我心水太清，呢個女人行既每一步都係棋，每一著都係傷害我頭家既棋！佢一定係耍緊啲手段，想分化我地頭家！佢係一隻凶猛既麻鷹，佢係嚟傷害我啲雞仔架！！

共58個回應

今日，荷媽想充當一個電台DJ，介紹兩首好歌俾各位網友。第一首就係呂方所唱既《聽不到的說話》，呢首歌係八十年代初既歌嚟，亦都係阿慶好鍾意既一首歌，因為佢覺得呢首歌既歌名令佢好有共嗚，而且首歌好好聽，佢第一隻自己拎錢出嚟買既唱片，就係呂方既呢一隻碟。而另一首荷媽要推介既歌，就係林子祥既《分分鐘需要你》，呢首歌可以話係我地一家人既飲歌，對於阿慶嚟講，更加係佢既主題曲。細細個阿慶有咩唔開心，阿祖都會用手語唱呢首歌俾佢聽氹佢開心，其中有兩句歌詞，「扮吓猩猩叫，睇到乜都笑」，阿祖一定唔會用正確既手語去唱，反而好誇張咁扮猩猩，氹到阿慶同中仔佢地好開心。到咗今日，我地成家都學識咗呢首歌既手語唱法，每當阿慶有唔開心呢，我地任何一個都會唱呢首歌去氹佢，所以呢首歌就係我地呢頭家既飲歌。

共55個回應

今日阿卡喺商場搞既活動好成功，不枉我同阿祖著晒鳳冠霞珮出台，出晒力氹台下既觀眾開心。我發現，呢幾年嚟可能講得爛gag多，訓練到自己有啲幽默感，都幾識氹人開心。原來荷媽除咗搓餅，上台講笑都得架！當然，我都要多謝我既好拍檔阿祖，無可否認，佢搞氣氛比我更出色。頭先阿莎不斷拉住我，話我同阿祖嗰份默契世間難求，叫我要掹番個老公返嚟！佢又話聽我地講以前送餅既事，聽到好感觸喎…哈，其實當年十號風球之下送餅去長洲，的確係我一生中最深刻既一幕，嗰陣橫風橫雨，我同阿祖入到去長洲，兩個被啲風吹到一仆一碌咁，但係互相扶持之下，都做得到。當日幾大既風雨我地都擋得住，但係我地既婚姻呢，就完全經唔起考驗…喺今晚既活動上面，有對人瑞夫婦做我地既嘉賓，個太太已經一百零六歲，個先生就一百零八歲，佢地係喺民國二年結婚，共步人生路，已經九十一個年頭。我望住佢地執住對方既手，我忍唔住諗，如果我同阿祖冇離婚，我地都踏入三十個年頭喇…

鍾笑荷，唔好再諗喇，有時候，人生只可以回味，唔可以回頭。

共42個回應

已經好夜喇，病房入面四圍都好靜，我估所有既病人都瞓咗覺，係得我呢個病人失眠。本來我叫自己唔好諗咁多，瞓一覺先啦，一切留待聽日先解決，但係我始終都瞓唔著，我忍唔住打開部手提電腦，寫低我既心情。講開呢部手提電腦，係中仔特登拎嚟俾我用既，個傻仔怕我喺病房悶，諗住借自己部電腦俾我上吓網，睇下新聞。我好慶幸，同中仔分開咗咁多年，喺佢心入面仲有我呢個荷媽，只可惜既係，我又要同佢分開，佢又要返番去嗰個陰毒女人嗰度！頭先阿爸嚟醫院探我，帶咗兩個壞消息嚟，佢話殷紅嗰個女人，同埋佘老太一齊，上門帶走咗中仔！更壞既消息係，話俾佘老太知中仔喺我地屋企既，係阿莎！我真係好心痛，點解我呢個細妹，為咗利益，可以傷害我地呢頭家？點解呀？我係佢家姐嚟架！我唯有安慰自己，蓮子蓉當年都係壞極，今日都可以變番好人，阿莎都可以既…不過要用幾耐時間呢？同埋改變一個人係咪真係咁易呢？一諗到呢度，我個心突然好酸，更加瞓唔到，我但求一夜安眠，究竟點樣先可以做到呢？

共57個回應

唔知我呢個網誌，有冇做咗父母既朋友會嚟睇呢？如果有既話，我好想同佢地分享一吓，對仔女應該抱乜嘢既期望。我有六個仔女，我當然好似其他父母咁，希望個個都有好成就。但係最近，我有一啲新既睇法同體會。時下既父母，個個都想啲仔女變尖子，為咗子女成材，迫佢地學呢樣學嗰樣，總之要佢地出頭。其實以前既我，都有類似既想法。記得管家仔細個既時候成績好好，但係佢中學畢業之後，堅持要留喺餅舖幫手，我當然明白，佢係唔想我咁辛苦挨間餅舖，先有咁既決定，我雖然好感動，但係心裡頭都有一陣唔舒服，因為我始終覺得，佢可以有另一條行得更加精彩既路。不過佢好堅持，我亦唯有俾佢自己選擇。

直至我去英國探中仔，我先醒悟起來。中仔偷偷哋返香港，唔肯返過去讀書，我好明白阿祖點解會咁嬲。但係我真係好耐都冇見過中仔笑喇，佢冇書緣，我地迫佢繼續讀落去既話，佢只會更愁更苦。十隻手指有長短，天生我材必有用，中仔喜歡做同電腦有關既工作，既然都係正經既事情，作為父母，點解唔支持佢呢？自從我地唔再迫中仔返英國之後，佢成個人開心起嚟，好似從沉重既壓力中釋放出嚟一樣。試問世間上有乜嘢，俾仔女既笑容更珍貴？我相信天下父母心入面都有一個願望，就係希望仔女做到佢地鍾意做既事，活得開心快樂。

暫無回應

今日我想教大家一句成語，「鵲巢鳩佔」。喜鵲既體形大小同斑鳩差唔多，而且尾羽更長，所以喜鵲築既巢可以容納得下斑鳩。據講喜鵲善於築巢，而斑鳩就唔懂得築巢，所以斑鳩就要強佔喜鵲既巢，據為己用。我可以為呢個成語寫埋佢既下半部，斑鳩因為妒忌喜鵲既巢築得咁堅固，所以霸佔咗之後，就不斷將個巢破壞！而喜鵲真係睇唔過眼，佢一定要保護個巢，要去修補…

我唔可以俾殷紅呢個女人破壞我頭家，我呢個巢！

我真係再忍唔住，我要當眾揭開佢呢隻斑鳩既真面目！我唔會後悔今日喺佢屋企，將佢既所作所為當眾揭出嚟！我亦都知道，我同佢既恩恩怨怨，只係一個序幕…

共50個回應

今晚我真係瞓唔到，我心裡頭有好多說話，想同我個大仔講…

阿卡，我真係好擔心你，你而家成日揸沽揸沽，成個人迷咗落去啲股票度…你仲記唔記得八七年既時候，香港股災，當時你仲好細，根本唔明白炒股票係幾咁危險既事，我諗住等你大個咗，先好好教導你。但係估唔到，我冇咗呢個機會…我呢個阿媽，竟然喺你十幾歲，最易行差踏錯，最易迷失既階段，唔喺你身邊，冇盡母親既責任去教好你！

今日蓮子蓉話俾我知，原來係殷紅嗰個女人叫佢帶你炒股票，佢想教壞你，等你沉咗落去，就好似帶你去吸毒一樣！我聽到之後，一直心痛到而家，我真係冇辦法瞓得著。虎毒不吃兒，殷紅呢個女人，根本冇將你地當成仔女看待！佢傷害你地，係出於想傷害我！呢十幾年嚟，我將我三個仔送咗去呢隻老虎度，佢點樣對你，點樣對阿圓同阿中，我真係唔敢想像…

我真係好驚蓮子蓉會再講殷紅傷害你地既事俾我聽…都係荷媽錯，當年荷媽冇辦法爭得番你地…阿卡，荷媽行錯咗步棋，恨錯難返，荷媽真係欠咗你地呀…

共40個回應

人生尤如坐過山車，峰迴路轉，或者咁精彩，先唔會枉過！琴日我仲係好哀傷好難過，估唔到到咗今晚，一切又要改寫。我地頭家等咗十幾年，終於等到可以喺八月十五中秋正日食餐團圓飯，阿爸佢最重視中秋節，呢十幾年嚟，我地八月十六先可以食團圓飯，我知佢個心一直耿耿於懷。所以為咗八月十五食飯，要我將家好月圓個招牌俾番阿祖做交換，我都願意，因為我只想阿爸佢老人家開心，還到佢心願，我就心足。

今晚喺酒樓度，同六個仔女共聚天倫，我有一種好安慰既感覺。阿卡佢真係好識搞氣氛，唱歌仔氹我地開心；阿月個傻女呢，仲係諗住我同阿祖可以喺番埋一齊，唉，阿祖而家已經有自己既家庭啦，我既心，真係如止水。嗰個阿莎唔通氣，係都要唱《相思風雨中》，話係送俾我同阿祖喎！真係得啖笑！不過見到啲仔女同我一齊聽歌聽到笑咗出嚟，我覺得好安樂！好事總多磨，殷紅呢個女人出爾反爾，應承咗俾我地食飯又上嚟搶人！呢個女人十幾年前已經上門搶走我啲仔女，點解到今日都唔放過我？我同佢前世有咩仇怨？佢地又一次重提我害死阿全件事，我個心好難過，蓮子蓉為咗幫我出啖氣，竟然爆出一個大秘密！原來當年我冇害死阿全，阿全唔係因為我唔肯借錢俾佢還賭債跳樓，佢係因為被女人拋棄先自尋短見！我聽到之後，成個人呆住咗，我自責咗咁多年，終於釋放。我已經冇再去諗，阿祖聽到之後會點諗，佘老太聽到之後又會點，我只係感覺到，一個放咗喺心十幾年既心結，終於解開。

共52個回應

咁多位網友，好對唔住，我今日心情真係好低落，琴日先同大家講，我係一個開心既荷媽，今日就俾大家見到一個悲傷既荷媽…對我嚟講，今日係一個黑色星期二。本來我如常咁，開開心心喺餅舖度教班街坊整餅，但係我以前既奶奶佘老太，失驚冇神氣沖沖咁衝入餅舖度，當住咁多街坊面前，鬧到我狗血淋頭。佢怪我害到管家仔同阿慶要做整餅妹整餅仔，佢叫我「趁地冧」！佢好激動咁鬧，我一句都冇反駁，我心入面只係諗，如果佢鬧完會舒服一啲，咁我忍一時又有乜相干？

我同佢之間既恩怨，真係三日三夜都數唔清；佢對我既恨意，亦都一樣係三日三夜都唔會鬧得完！我知道佢喺背後叫我做「嗰劇肥嘢」，我冇嬲佢，佢咁憎我，我係完全明白，因為…係我害死佢個細仔阿全既！如果我一定要開口同佢講嘢既話，我諗我只係會同佢講一聲，對唔住…世上一切既事情，可能都有先兆。琴晚我又夢到阿全，我紮醒咗…到今時今日我仲係好內疚，係我累死咗佢，我真係好難過…

共43個回應

大家好！我叫鍾笑荷，成個北角區既街坊都叫我做荷媽，我啲仔女都係咁嗌我。我雖然係個淨係識整餅既肥師奶，不過都好新潮，我見啲仔女晚晚臨瞓前，都喺電腦度寫blog，於是我又照辦煮碗，寫吓啲生活點滴！

今日我細妹阿莎由葡萄牙返咗嚟香港，佢份人口直心快，hurt人為樂，我預咗佢返嚟，一定會不斷提番以前既嘢，不斷揭番我啲舊傷口，不過就真係冇諗到，個傷口原來仲會識痛…

我鍾笑荷既上半生可以話係好失敗，被老公拋棄、仲帶走咗我三個仔…

有一個女人既名，我到而家都放唔低，佢叫做殷紅。呢個女人曾經同我情同姐妹，但係一個我當係妹嘅人，竟然破壞咗我一生人嘅幸福…

諗到呢度，我又忍唔住眼紅紅，以前既事，真係唔想再提…

而家雖然只係得番三個仔女跟我，但係我曾經講過，我鍾笑荷下半生乜都唔會做，淨係會做一件事，就係教好啲仔女！我言出必行，唔止要敎好佢地，仲要令佢地活得快樂。

為人父母，當然想啲仔女只有歡笑冇愁苦，我阿爸改我個名叫做鍾笑荷，亦都係呢個意思。到我做母親既時候，心情原來都係一樣，想帶好多歡樂俾啲仔女，所以我要做一個開心既荷媽！呢十幾年嚟，我儲埋儲埋好多爛gag，最鍾意講俾啲仔女聽氹佢地開心！各位網友，你地有冇啲乜嘢爛gag分享吓，等我得閒又可以講嚟氹吓啲仔女開心？

共61個回應