父母為仔女改名，如果唔係搵風水先生講，希望配合返仔女嘅命格，就通常都表達左父母對仔女嘅寄望。阿姐同阿祖希望將仔女改名做「家好月圓慶中秋」，就係希望一家人可以永遠喺埋一齊，永遠團圓。不過我發現除左團圓嘅意思，佢地嘅名又真係好似襯返個性格咁，好啱架！唔信你地睇睇：

甘永家：身為甘家嘅大仔，雖然佢好似吊兒郎當咁，但其實將「家」庭放喺第一位，為左細妹阿月，忍痛同嘉美分手。

甘永好：顧家、孝順、體貼、專一，唔駛講，「好」仔一個！

甘皓月：攞女雖然成枝頂心杉咁頂住我，但其實呢個都係佢嘅優點：愛恨分明，擇善固執，好似一輪「皓月」咁。

甘永圓：「圓」，可以話係圓滑，亦都可以話係冇主見。

甘詠慶：善良聰慧，係全家嘅心肝寶貝。有佢，係甘家最值得「慶」賀嘅事。

甘永中：唔特別乖，唔特別壞；唔係聰明，亦都唔算蠢。就同佢個名一樣，「中」中庸庸。

我唔知道係佢地本身性格就係咁，定係佢地望住自己個名嚟做人，但我知道作為

一個阿媽，我改名係完全失敗！

路嘉美：「嘉」，嘉許。「美」，美麗。一個只知道美麗會被嘉許嘅人，除左靚之外，應該一無是處。

本來，嘉美除左靚之外真係一無是處，不過今日佢終於醒覺嘞！佢竟然喺爆左嗰隻狐狸精害死甘老太太嘅事！嗰一刻，我真係好感動！

證明人未必如其名嘅！

共16個回應

記得我寸過嗰隻狐狸精，如果發仔瘟嘅話，不如自己生返個啦，所謂「唔知醜，生到四十九」！今日阿姐用我做例子嚟教訓嘉美，話我四十幾歲人先嚟改，係好難，但我都好努力咁去改，係因為我唔想嘉美一世都學我，我想以身作則。

阿姐講得好啱，其實我今次真係「唔知醜 改到四十九」。49歲先生BB，梗係高齡產婦；我四十到抆先改，應該叫高齡改婦。

上網睇到，高齡產婦所生嘅bb，唔單止染色體異常嘅機會率高好多，仲會面對好多風險，睇落同我呢個高齡改婦嘅癥狀都好脗合，例如：

好嘞，講住咁多先，我要去敷MASK喇。

咩話？你話我唔係真心改，同以前一樣咁揮霍，日日敷MASK？哎吔，你地體諒吓我啦。你地知唔知呀？醫生話高齡產婦應該多啲補充深海魚油架。

關我咩事？因為我敷嘅係深海魚油MASK囉！

共20個回應

阿姐：

而家已經係半夜兩點喇，唔知你瞓左未呢？我就瞓唔著，因為我真係好擔心嘉美…我成日都諗，我得一個女已經咁煩，你有六個仔女，仲要三個得三個跟自己，三個跟個狐狸精，日日擔心佢唔知對自己啲仔女做啲乜嘢，你嗰種操心法我淨係想像已經覺得頭痛。

阿姐，見到你將阿好、阿慶佢地教得咁好，我真係好想學你架，我初時以為，嘉美今年廿三歲，仲有得教嘅，教三年教唔好嘅，咪教六年、教十年囉！如果喺佢三十三歲嗰時我可以教返好佢，起碼佢都仲有幾十年可以行返條正路丫！但係而家我擔心係唔得架，唔係佢太壞教唔好，而係我懷疑自己根本冇能力去教！

或者係我壞得太耐喇，雖然我極力咁去做返個好人，但有啲是非對錯原來我係唔識分嘅！好似嘉美同我講，佢要去墮胎，因為個BB可能係JIMMY嘅，我竟然幫佢隱瞞呀！點解我當時諗唔到，無論個BB係邊個嘅，佢都係嘉美嘅骨肉，我嘅外孫呀！點可以因為怕俾人威脅，就隨隨便便咁殺死自己嘅骨肉？！

阿姐，到我醒覺嘅時候，我真係好嬲好嬲，只識得用藤條打嘉美，但打完之後又點呢？我真係唔知…阿姐，你要幫我呀，幫我救返嘉美！

阿莎

共33個回應

我啱啱睇左嘉美嘅blog，佢set左lock唔俾我睇架，係我特登裝佢嘅密碼，自己login睇嘅。我知我咁做係侵犯佢私隱，不過除左咁做，我真係唔明呢個女而家究竟諗緊乜。佢今日篇日記嘅題目係「阿卡VS阿圓」，佢狂踩阿卡，話阿卡係淨係識得黐住荷媽嘅裙腳仔，又太重親情，成日提住六粒痴頭芒，好惡頂。同時就猛捧阿圓，話阿圓唔會講爛gag咁白痴，唔駛降格同佢做啲低能嘢，相處得好舒服。

但我一路睇，個心就好唔舒服。

我唔係覺得嘉美踩阿卡有咩唔啱，我好明白有啲女人確實需要一個男人將自己放喺第一位，連屋企人都要行埋一邊。至於阿圓，佢除左認嗰個狐狸精做阿媽之外，都確實冇咩唔好，外型唔錯，學歷又好，性格都純品，女人對佢有好感一啲唔出奇。

不過第二個或者睇唔出，但我好肯定，嘉美一啲都唔鍾意阿圓，甚至連阿卡都冇鍾意過。成篇日記入面，無論對阿卡定阿圓嘅評價，佢都講到好有道理咁，其實喺佢眼中，兩個都係傻仔，如果潮啲咁講，就係kai子。根本所有男人對佢嚟講都係一樣，只不過係俾佢玩弄於股掌之間、俾佢攞著數嘅kai子。

我會咁清楚，當然因為我以前都同佢一樣，樣樣都搞到好有道理咁，其實只係為左自己好，當全世界都係kai子。

不過總有一日，佢會明白其實自己先係最kai嗰個。

共14個回應

講我自己講到悶悶地，今日想數吓其他人。數啲乜好？不如數吓我最憎我屋企人啲乜嘢啦！

阿爸：我最憎佢偏心阿姐，如果激親佢，佢仲會當住啲細嘅成個湯殼兜頭扑落嚟，完全唔顧我嘅面子！

阿姐：我最憎佢講嘢懶有道理，好似淨係得佢啱冇人啱咁。

阿卡：呢個唔駛講啦，我最憎佢梗係飛左我嘉美，搞到佢好傷心。

阿好：我最憎佢太管家仔囉，吓吓幫佢荷媽管住我！

阿月：我最憎佢成日咀gel gel，鬧我罵淫為樂罵左七次，仲有都唔知係咪同佢鬧交鬧得太多，搞到我都做埋攞女。

阿圓：um….我最憎佢….最憎佢太少返嚟阿姐呢邊，搞到我連憎佢啲咩都講唔出。

阿慶：我最憎佢同我同一日做新娘，影到我老晒！

阿中：我最憎佢同我講”You monster shut up”，俾第二個鬧都算，俾個半文盲嘅細路鬧喎，你話幾hurt！

好，數完！

其實我係想話，雖然佢地有咁多缺點，不過就同時有一個優點：佢地容忍力特強，我啲衰嘢多過佢地十倍，但佢地一次又一次咁原諒我，仲用心良苦令到我同嘉美和好。

佢地淨係呢個優點已經贏晒啦！

共24個回應

前排阿姐叫我返屋企食飯。關於推阿紅落樓梯件事，佢唔聽我解釋。

我唔想返葡萄牙，想喊，嘉美竟然笑。

阿卡一齊笑，然後個個都跟住笑。

我先知佢哋玩我。

阿姐話知道我係想幫佢出氣。

仲叫我返屋企住，我開心到唔識講嘢。

恩賜竟然返埋嚟，同我復合。

嘉美似乎接受左佢，冇再對佢黑口黑面。

我做左咁多衰嘢，佢哋都冇放棄我。

我第一次覺得，我真係好幸運。

咩話？你哋覺得我呢篇日記怪怪地？

句句短切切？

因為我以前成日一輪咀，搞到成家人唔開心。

從今以後，我要學習環保，減少噪音污染。

不過對我嚟講好難，始終幾十年嘅習慣。

所以用日記嚟練習，一篇唔過廿句，每個廿字內。

你話我不過將一句嘢break開晒？

啱啱開始係咁架喇，將就吓好冇？

等唔到你答我，因為夠廿句，要收工喇！

共48個回應

最近，生活出現左太多意料之外。我以為阿姐唔係阿爸親身嘅，點知原來我先係攞女。

我以為恩賜會同我白頭到老，點知佢同我結婚幾日，就話要離婚。

我以為嘉美係我個女，點都會幫我，點知佢一見到我偷偷地返屋企就大嗌。

意料之外，我而家先明白，人生根本就唔可以意料。

正如我以前對耶穌最反感，叫人如果俾人摑右邊臉，要俾佢摑埋左邊喎，邊有啲咁戇居嘅人？仲有呀，呢個世界年中都唔知幾多人係枉死架啦，佢俾人釘十字架咋嘛，有幾偉大？

不過前排冇得返屋企嘅日子，我晚晚對住公寓出面個十字架，望吓望吓，唔知點解有啲眼濕濕。我試吓對住佢祈禱啦，又好似感覺到有人聽緊咁…

我成五十歲人，第一次攞起本聖經嚟睇，原來入面好多說話都好有道理。其中一句令我最印象深刻：

《傳道書》5:15 他怎樣從母胎赤身而來、也必照樣赤身而去．他所勞碌得來的、手中分毫不能帶去。

我睇到呢句嘅時候，真係心頭一震。

我細個嗰時雖然唔算有錢，但食嘅著嘅從來都唔駛擔心。後來嫁過去葡萄牙，叫做捱過一陣，好快已經搵到第一桶金開超級市場。

其實我咁大個人都冇捱過窮，點解我要咁貪錢？每個人都係赤條條咁嚟，赤條條咁走，我點解要為左一啲帶唔走嘅錢，不斷去傷害我嘅家人，搞到今時今日搞到咁折墮？

所有物質都係虛空一場，我會好好記住呢個道理。

共19個回應

今次同嘉美返嚟嘅，仲有我嘅情人恩賜，同埋佢媽媽袁老太。但係我咁緊張，絕對係因為嘉美，我地母女之間有太多誤會，難得佢肯返嚟香港同我一齊住，我真係好想可以留個好印象俾佢。至於恩賜，我地一齊嘅日子都唔短喇，亦都好明白對方係咩人。

雖然我好愛恩賜，但係對我嚟講，最重要嘅人始終都係嘉美。

我前姐夫今日窒我，點解我咁嘅人會生得出嘉美咁好嘅女？我表面梗係要同佢鬥嘴啦，其實心入面我好贊成架。嘉美除左靚呢樣嘢似我之外，其他樣樣都係青出於藍！

佢細細個已經好識人情世故，唔似得我成日口沒遮欄。人又聰明，靚不特止，又識得人情世故，一個咁完美嘅女，試問我又有咩辦法唔緊張呢？

可惜佢對恩賜有啲誤會，始終都接受唔到恩賜做佢step-father。

唉…

(今次唔係又有人搞事，令到我篇日記完得咁突然，而係呢件事真係令我好苦惱，我都唔知講咩好…)

共34個回應

喺嚟緊嘅一段時間，有以下嘅嘢要做：

一、買mask。我知架！你地個心梗係諗：Sa姨，你平時都係攞阿月阿慶甚至係荷媽啲mask嚟用架啦，乜你會自己買嘅咩？你地講得好啱！所以我諗住幫佢地幾個一次過買mask，咁就可以join VIP，大把新產品嘅tester用，咁就可以唔駛錢試到新嘢啦。

二、敷多啲mask。我又知你地諗乜喎！你已經晚晚都敷mask喇喎，仲敷多啲？咁你夠晚晚都食飯啦，日頭又食？好嘢冇話嫌多嘅！

三、溫葡文。語文真係好奇怪，雖然我喺葡萄牙生活左咁多年，葡文一早已經講得好流利，但返嚟幾個月竟然有啲生疏，可能始終唔係母語啦。趁呢段時間一定要練返好，唔係就可能溝通唔到架喇…

四、習慣早起。早睡早起身體好，皮膚好，記性好，item1-3嘅效果更加好。

五、煮早餐。嘻嘻，未見過我煮嘢食呢？你地唔會有機會見到架喇，我先至唔會煮俾你地食！

六、執房。其實係要叫阿月阿慶執房，等我搬過去同佢地孖房，迎接一件開心事。

七、度橋。要佢兩個小心眼同我逼埋一齊，佢地一定多多事實推三推四。一定要度條橋出嚟令佢地就範，最好就逼埋佢地出去，咁我就可以同佢多啲獨處時間，慢慢培養返感情。

共18個回應

呢幾日甘老太因為心臟病發入左醫院，有一晚佢嘅情況好危急，半昏迷狀態，仲一路嗌住阿祖阿祖，希望見到個仔嘅最後一面。睇到甘老太咁可憐，我都覺得好心酸。或者你地會覺得好奇怪，平時我把口唔收，做咩突然間咁感性？

唉，雖然我火滾起上嚟會鬧人趁地淋，但其實我都知道，如果一個人死嘅時候冇仔女送終，就算佢生前搵到幾多錢，有咩豐高偉績，都唔會死得眼閉。

我忍唔住諗，如果我突然間有咩急病，嘉美又喺葡萄牙返唔到嚟，一定係我一生最大嘅遺憾。

我已經好多個月冇見過嘉美喇。上次我同阿姐講嘉美要我喺香港開間健身院先肯返嚟，呢個雖然係大話，但都唔假得晒。其實我叫過幾次嘉美返嚟架喇，不過佢都冇乜反應，敷衍我幾句就算。

又係嘅，嘉美住慣葡萄牙，周圍風景靚到不得了，空氣又好，間屋又大過香港嗰啲幾倍，要佢返嚟香港，點會住得慣？

本來我都唔諗住勉強佢，女大女世界，佢開心咪得囉！不過見到甘老太咁嘅情形，我就有啲擔心，特別掛住佢…

頭先打電話俾佢又飛左去留言，msn又冇開，唔知道去左邊？

嘉美，你睇唔睇到媽咪嘅日記呀？睇到就打個電話俾我啦，留個言都好吖！

共22個回應