今日俾班姨甥仔女笑我睇預防橙皮紋嘅網頁。其實我都唔明有咩好笑，扮靚一向都係女人嘅終身事業，但扮靚嘅前題係護膚，如果你啲皮膚唔靚，點扮都冇用；咁護膚嘅前題係乜？唔駛講梗係防紋。女人著衫最講究花紋。直間橫間波點花花草草，最好一個禮拜七日都唔同花紋；相反喺靚衫底嘅肌膚就最緊要無紋，唇紋頸紋魚尾紋法令紋妊娠紋橙皮紋萎縮紋，如果一個禮拜七日，女人每日喺自己身上發現多一條紋，佢應該唔會再有意欲扮靚出街。

扮靚同防紋應該係天敵嚟，例子隨便都數到一大籮：

笑令人美麗，但笑得多容易有魚尾紋。

搽唇膏唇彩令到女人成個樣精神晒，吸引力大增，但搽得多難免有唇紋。

蹺腳坐斯文大方、著窄身衫褲線條盡現、著高跟鞋就婀娜多姿…呢啲女人嘅美麗定律相信冇乜人會反對，不過原來通通會影響你嘅血液循環、積聚毒素、令細胞脫水，形成橙皮紋！

女人護膚都係為左靚，但扮靚又會影響肌膚，你話做女人幾難！

每一季都有潮流嘅時裝，流行唔同嘅花紋圖案，會唔會有一日，潮流興法令紋彩妝、妊娠紋粗Belt、橙皮紋legging？

咁嘅話女人就唔駛再將身上面嘅紋遮遮掩掩，可以大大方方show出嚟，真紋扮假紋！

嘩，係嘅話一年咪可以慳返好多護膚錢？！

共38個回應

唔知你地一睇呢個題目，會覺得係咩意思呢？我諗大部份人都會認為係”過天橋”咁解。不過我今日係想講嘅，係”借人過橋”個”過橋”。

咁你地而家一定諗：哦，你想講你自己，你成日都借人過橋架啦！

係，我認架，我叫阿祖個衰人同埋阿姐成班仔女嚟扮鬼扮馬，又出賣自己啲臭屎，話阿姐當日點樣救我出火坑，講到懶感人咁，名義上係幫阿姐慶祝生日，其實係想佢開心啲，放低心入面條刺，俾班仔女返家好月圓度幫手。

仲有，我喺阿姐面前扮接到嘉美電話，都係借嘉美過橋，希望阿姐信我真係為左嘉美嘅將來，先至咁想佢俾啲仔女打理返家好月圓。

阿姐知道之後，鬧我發錢寒！我反駁話，發錢寒有咩唔啱？我唔係為駁而駁架！我真係唔覺得恨錢有咩問題喎，呢個世界有人嫌錢腥嘅咩？只不過係我夠膽講出口咋嘛！

好似‘過橋”咁，我都唔覺得係貶意架喎！我又唔係過橋抽板，講真，就算我想”抽板”都抽唔到啦，家好月圓啲舖點都冇我份嘅！佢地攞返啲舖，我黐少少金糠，你好我好。既然中間有少少障礙，我只不過係用少少方法去達到目的啫。即係你想過對面馬路，但中間俾啲車塞住，咁你都會行天橋啦，係咪？

所以話”過橋”呢個題目，無論你理解到”過天橋”抑或”借人過橋”，其實都係同一個意思！

共31個回應

俗語話：「有頭髮邊個想做癩痢？」呢句說話相信冇乜人會反對。同理，如果話「有皇帝做，邊個想做太監？」，應該都好合理。

但世事往往係唔合理嘅，尤其係我啲屋企人，我懷疑佢地同「常理」有仇，最鍾意做啲不合情理嘅事。

我阿姐得間又殘又舊嘅餅舖，日做夜做先賺到份人工，搞到啲仔女冇個有出息嘅。

管家仔本來生得四四正正，人又醒目，可惜自細跟住佢荷媽，唔係喺餅舖搓餅，就係出街送貨，真係老土又辛苦。

阿月做個OL仔，朝九晚十，捱到個樣殘晒，想吊到金龜婿都難。

阿慶就唔駛講啦，啞鬼左，本來安安份份做人都OK，點知衰天真，走去同個正常人拍拖，俾人玩完即飛，兩個字，折墮！

阿卡同中仔本來好地地，一黐返阿姐，一個工都冇埋，自己開公司又冇backup，搞到要喺商場做馬騮戲俾人睇；另一個有書又唔讀，連sales都做唔成！

你地話嘞，佢地日日卑躬屈膝，抬唔起頭做人，同做太監有咩分別？

但係如果佢地要左家好月圓個八成股份就唔同咯，即刻個個變晒皇帝仔皇帝女啦！管家仔唔駛再管家，十幾間餅舖俾佢管；阿月唔駛再捱，得閒就同啲公子哥兒去吓ball，晒吓命；阿慶變左有錢女，到時唔止正常男仔，大把型仔靚仔爭住撲埋去；至於阿卡同中仔就做返有錢人，重踏正途！

皇帝同太監，天堂與地獄，偏偏佢地就鍾意留喺地獄！

咁如果我第時上左天堂，就唔好怪我。

共28個回應

今日想同大家分享一個故事：白雪公主喺一個富裕嘅城市入面一個唔係咁富裕嘅家庭出世。皇后死得早，好彩父王同姐姐都好錫佢，童年生活幾愉快。大個左之後，佢試過幾次遇人不淑，最後終於搵到一個深愛嘅王子，為咗佢，白雪公主甘心離開自己嘅家人，去到陌生嘅歐洲小城生活。

白雪公主同王子生左個女，每日嘅生活，除左湊女之外，就係幫老公手打理小生意。好快過左十幾年，白雪公主個女亭亭玉立，生意亦都越做越大。本來白雪公主覺得上天對自己都算係咁，點知有一日返到屋企，見到個後生女，不過佢唔係白雪公主個女，而係王子嘅情婦！

白雪公主心都碎埋，唯有返番去老家啦。白雪公主同屋企人十幾年冇見，感情有啲生疏；同班姨甥仔女都唔係咁夾，佢地仲成日頂撞白雪公主…不過白雪公主覺得一家人唔應該咁計較，諗住「以德報怨」，對佢地多啲關懷。點知佢地以為白雪公主出賣佢地，父王嬲到成個湯殼扑落白雪公主個頭度，白雪公主姐姐仲鬧足白雪公主成餐飯…

咩話？你地覺得個故仔熟口熟面？梗係啦，「白雪公主」咪即係我鍾笑莎囉！

點解我要寫呢個故仔？唔通一把年紀仲幻想自己係白雪公主？

錯錯錯！我咁寫係為左提醒自己，而家普遍流傳嘅《白雪公主》，只不過係呃細路嘅故仔！話白雪公主「以德報怨」，同王子結婚之後，原諒左害佢嘅繼母，只不過係格林兄弟為左提高銷量，足足改左七次嘅版本！

喺初版格林童話入面，白雪公主邀請繼母參加佢同王子嘅婚禮，特登準備左一對燒紅左嘅鐵鞋，逼佢繼母著，熱到佢繼母係咁跳跳跳–跳死左！

證明喺童話入面嘅人物都唔會以德報怨，何況係現實世界？

我今次係自己攞嚟衰，抵死嘅！

所以只此一次，下不為例。

共48個回應

而家諗返，以前嘅我真係幾乞人憎。對好多嘢都睇唔順眼，講嘢又不留情面，聲大夾惡，鬧到人地冇聲出就覺得自己啱晒！其實阿月都講得啱，以前我真係罵人為樂。不過自從過左一個令人咁感動嘅生日，我覺得自己應該學識感恩，對身邊嘅人多啲尊重同關懷。亦都因為咁，我生平第一次感受到咩叫做為善最樂！

好似我介紹蓮子蓉去澳洲做嘢咁，講真我同佢又唔係有親，幫佢都係為咗令阿姐開心啫！不過當我見到佢打電話同個妹講呢件事，開心到成塊面都紅晒，我竟然都感染到佢嘅快樂喎！

又好似佘老太咁，我本身就唔多like佢架喇，話晒當年都係佢間接令到阿姐同姐夫離婚嘅！不過我見到佢一把年紀，成日含住口怨氣做人，真係有啲唔忍心！於是即管試吓勸吓佢啦，點知真係幫佢解開左個心結！而家佢笑容多左，成個人望落都後生左，我都好開心可以幫到佢。

我知你地當中，實有人同蓮子蓉一樣，覺得我對佘老太好，都係為左佢啲錢，甚至特登將中仔返嚟香港嘅事爆俾佢知，搏取佢嘅信任！

我承認我因為親近佘老太而得到一啲好處，不過呢啲只係意外之財，同中六合彩本質係一樣嘅！試問有邊個中六合彩係唔開心嘅呢？

至於中仔嘅事，由頭到尾我都唔贊成佢唔讀書。我覺得喺人生入面，追求知識係最快樂嘅事！就算中仔資質唔係咁好，都應該盡量去讀，袋得幾多知識落袋就袋幾多。因為無論親情、愛情定財富，眨眼間就可能無晒，唯有知識永遠都屬於我地自己嘅。

我只係唔想中仔失去可能會令佢後悔一生嘅快樂啫，又有咩唔啱？

共51個回應

今日係我四十五歲生日。一個女人四十五歲，其實都幾大鑊！開講都有話啦，「男人四十一枝花，女人四十爛茶渣」！爛茶渣又俾無情嘅歲月揸多五年，真係揸乾揸淨，想唔換都唔得，正式踏入更年期！

女人一開始更年期，就會急速衰老。無論你之前keep得幾好，啲皺紋都會走晒出嚟，敷幾多mask都擋唔住！更加慘係，女人一生中最重要嘅親戚會逐漸同你疏遠，最後永遠離你而去，令到你失去左作為女人最寶貴嘅能力！

一個四十五歲嘅女人，如果婚姻美滿，兒孫滿堂，生活無憂都好啲，因為起碼佢地有個窩，可以擋一擋殘酷嘅現實…

得喇，你地唔駛提我，我知我冇咁好彩。婚姻失敗，個女又唔鍾意跟我，搞到要寄人籬下！對於我嘅情況我好清楚嘅。

咁點解我仲咁大方，大大聲話你地知我已經成為咁可悲嘅女人？

大家記唔記得我啱啱開始寫blog，曾經寫過「香港十大奇景」？喺我四十五歲呢一日，我見證左香港第十一大奇景。

當我以為冇人記得我生日嘅時候，阿姐佢竟然整左我最鍾意食嘅餸，擺到成枱都係。跟住突然有人嗌媽咪，原來係佢地安排左嘉美同我web cam呀，之前仲特登夾埋嘉美，扮唔記得我生日，俾surprise我！

喺香港呢個咁金錢掛帥嘅社會，竟然有人咁勞心勞力幫我慶祝生日，唔係奇景係乜？

共14個回應

我喺士砵亭住左咁多年，葡萄牙文同英文梗係有番咁上下，不過中文就因為太少機會用，有啲生疏。尤其是同管家仔佢哋講嘢，成日都唔明佢地講咩咁。咁我一向都好學，前排行開書局，就諗住買返啲書進修吓中文啦。點知俾我見到一本叫《香港潮語學習卡》嘅書喎，入面介紹左好多詞語，咩「屈機」呀、「潛水」呀、「寸嘴」呀咁，我先知我聽唔明管家仔佢地講嘢，唔係因為我啲中文退步，而係佢地成日都講呢啲「潮語」！我梗係唔執輸，即刻買返本嚟睇啦！

其實呢本書寫得唔錯，唔單止圖文並茂，仲有中英對照添！不過有啲詞語，我就始終唔多明，好似「蝕桌」咁，究竟同「蝕底」有咩分別呢？又點解唔叫「蝕椅」或者「蝕茶几」呢？

不過到左今日，我先知真係要將呢啲潮語融入生活入面，先可以完全明白佢哋嘅意思！你地都知啦，我喺法庭外面鬧個狐狸精係白粉拆家，佢告我誹謗，要我道歉兼賠返四百萬俾佢！其實我唔驚架，因為我講嘅係事實，佢真係導前頭婆個仔吖嘛！不過阿姐話要去佢地屋企幫我擺平喎，咁我唔想阿姐擔心，就由得佢囉。

阿姐返到嚟，話幫我搞掂晒，淨係賠左廿萬！嘩，你地知唔知我當時諗咩呀？我個腦淨係得兩個字：蝕桌！明明係佢地搶左我地個招牌，而家仲要翳佢地要廿萬？！呢單嘢真係唔止「蝕底」咁簡單，更加唔係「蝕椅」或者「蝕茶几」可以形容得到。廿萬喎！唱晒一百蚊紙，一張櫈邊夠擺呀，加埋個茶几都唔掂，鋪滿成張枱都得啦，咁仲唔係「蝕桌」係咩呀？！

共32個回應

我鍾笑莎喺葡萄牙生活左十幾年，有個老公，生左個女，做過三間超級市場嘅老闆娘，連啲葡萄牙熟客見到我都嗌聲Sa姐。雖然而家冇左個老公，冇埋三間超市，連個女都唔黐我，但至少有一個得著，係我一生受用嘅，就係招牌嘅重要。

我初初嫁過葡萄牙，個衰佬只係得間豆腐潤咁細嘅士多仔，仲要差唔多執笠！鬼咩，佢話要入鄉隨俗，個招牌都要用葡萄牙文，叫”Se A Vida E”，即係”生活就是這樣”喎！你諗吓嘞，如果喺香港，見到有間士多叫做”生活就是這樣”，你梗係會懷疑個老闆short short地架啦！仲點會想去幫襯？

我叫個衰佬改名，但佢唔肯認衰，死都唔俾我改。於是有一日，我趁佢去一個朋友嘅婚禮，偷偷地將個招牌換左，就叫做”香港”。結果每一個人經過都好好奇，走入嚟問我呢兩個正方形圖案究竟係咩意思？佢哋入得嚟問嘢，梗係唔好意思唔買嘢啦。我一路答一路收錢，嗰日嘅生意多過平時五倍！個衰佬返嚟望吓個招牌，又望吓啲錢，梗係冇聲出啦！

就係咁，我地用”香港”呢個招牌越做越大，最後仲發展成三間大型超級市場。

招牌係咩，好多時比你賣嘅係乜嘢重要！

所以”家好月圓”呢個老字號招牌，我一定要攞番！

共19個回應

我都唔明點解阿姐要幫住個”攞女”，我係佢親生細妹嚟架，佢究竟記唔記得邊個先同佢有血緣關係？！嗱，我唔係話記仇，記住個”攞女”鬧我賣淫為樂，先至針對佢嘅！其實我根本唔係針對佢，只係講事實！

事實1：佢真係阿姐攞返嚟養嘅。

事實2：阿姐同陳世美離婚嗰時，如果唔係個”攞女”霸咗個quota，中仔就可以跟返阿姐，唔駛阿姐而家成日心掛掛。

事實3：”攞女”咁多年嚟食咗阿姐咁多米飯，家用就俾得雞碎咁多。

事實4：搵錢已經少，仲要攞啲錢去貼仔！

事實5：明知自己冇錢，學人搬出去住，搞到日日食快餐店，走去健身室沖涼喎！根本係佢自己攞嚟嘅，有幾可憐呀？駛唔駛成村人走出去搵佢？

最攞命係，阿姐竟然為咗個”攞女”鬧我！話我係”攞婆”，淨係識攞錢攞著數攞便宜！

我知，阿姐唔鍾意我踢爆佢唔識教女吖嘛，忠言逆耳，總之我今次真係攞苦嚟辛！

共43個回應

今日繼續數香港十大奇景：

6. 移城大法。香港嘅舊區十年如一日，但新樓盤嘅名就屢獻新猶喎！個個發展商都練咗「移城大法」咁，咩「比x利山別墅」、「曼克x山」、「荷里活x庭」…將美國嘅城市通通搬晒嚟！而且連古蹟都唔放過，開個窿就係「凱旋門」，佩服！

7. 冷氣雨。今日俾阿慶拉咗去旺角，話帶我見識吓最潮嘅嘢喎！點知行行吓就有幾滴水滴落我個頭度，我以為落雨啦，阿慶竟然若無其事咁話係冷氣機水嚟，行出少少就冇事！可以對「冷氣雨」視若無睹，唔通咁就叫做潮？

8. 相機融雪。聽聞香港人只得兩種：Blogger同Non-blogger。一枱人食飯，對住啲嘢食猛咁影嘅就係Blogger，因為要將啲相放上blog喎。今日我因為唔想再淋「冷氣雨」，就拉咗阿慶去食嘢，見到隔離枱嗰個blogger對住杯雪糕新地起勢咁影，直到…杯雪糕融咗！

9. 做歪秋。香港人鍾意做節，咁多個節入面，做中秋係最緊要嘅！但我今日先知，原來呢十幾年嚟，我哋屋企都係八月十六先做中秋嘅，因為狐狸精嗰邊要做正日喎！話明做中秋，梗係八月十五做架啦，十六先做咪即係做歪秋？！

10. 鍾笑莎怒打陳世美。冇錯！最後一個奇景係我有份嘅！嚴格嚟講係我製造出嚟嘅！今日我個過氣姐夫突然走上嚟，話要攞返我哋「家好月圓」嘅招牌！呢個咁嘅陳世美，拋妻棄子不特止，仲想連我哋個招牌都搶埋！我梗係兜個地拖打落去啦，打到佢哋眼鏡都爛埋，無鞋挽屐走。

好，數完！敷返個mask先！咩話？你話我做咩日日都敷mask，敷得太多唔好？我今日係敷手mask呀，枝地拖”鞋”架，唔潤番點得？

共39個回應