如果你已經過左大半世，想搵一個地方過埋餘生，你會揀邊度呢？相信好多人都會揀自己嘅鄉下。

不時都會聽到人講，我鄉下風景好靚架，啲人又單純，唔似得呢度啲人咁複雜。究竟鄉下嘅風景係咪真係咁靚，天下無雙呢？啲人又會唔會個個都咁單純？係咪鄉下嘅人一定好過而家生活緊嘅地方？

其實單純嘅唔係鄉下嘅人，而係我地自己。

我地喺鄉下長大，童年嘅我地，未受污染，生活簡單，係最純真嘅歲月。

後來為左尋求更好嘅生活，我地離開鄉下。我地唔再係細路仔，要喺成人嘅世界生存，我地學識左計算、自私、虛偽，然後覺得呢個世界越嚟越冷漠。

我地懷念嘅唔係鄉下，而係喺鄉下嘅生活，同埋遺失左喺鄉下度嘅自己。

喺監獄呢幾年，我成日都夢到細個喺新會嘅嘢，嗰陣時我好鍾意笑，爬樹又笑，掟石頭又笑，流鼻涕都笑一餐。

出左獄之後，我有諗過返去鄉下度住，不過我覺得而家嘅我，仲未面對到嗰個咁純真嘅自己。

不過我都唔可以再喺香港度住喇，或者喺監獄度習慣左靜，出返嚟之後總係覺得周圍太嘈。紐西蘭嘅好處係羊多過人，羊咩聲大過人聲。

我望住啲羊，佢地有草就食草，有毛就剃毛；陽光好嘅時候咩咩叫，落雨嘅時候都係咩咩叫。

我諗對多啲佢地，我好快就可以開開心心咁返鄉下。

共50個回應

呢排心緒不寧，為左同阿祖單官司，亦都為左心女。晚晚都瞓唔著，比以前更多時間睇書。其中一本散文集，寫得麻麻地，但有一篇就講得好有道理。個作者話，第一次犯錯係無知，第二次再犯相同嘅錯誤，就係蠢。

我管理家好月圓咁多年，曾經跟過我嘅下屬，大大話話成幾千人，最明白呢個道理。對於第一次犯錯嘅員工，可能係冇經驗，太緊張，唔應該責罰佢地，而係耐心咁教佢下次應該點做；但如果佢第二次都犯一樣嘅錯，就證明佢根本係蠢，留低都冇用。

不過呢個道理唔適用於感情上。

男人第一次出軌，可能係佢一時定力唔夠、逢場作興，又可能係佢遇到真愛；當佢第二次出軌，就證明佢根本就係個賤男人！甘泰祖就係人辦！

至於女人，第一次遇到賤男人，俾人拋棄，可能係因為佢倒霉；第二次遇到賤男人，又俾人拋棄，咁就同運氣無關，怪只怪佢自己有眼無珠，冇眼光！

我承認我喺感情上冇眼光，不過我唔係一個蠢人。

上一次俾阿強黐埋第二個女人度，嗰時我無知，乜都冇爭取過，仲試過貼埋錢俾佢地；今次阿祖中返埋佢前頭婆度，人我唔會再爭，但我一定要攞返屬於我嘅嘢！

共88個回應

我相信好多人生兒育女，都係為左延續自己嘅生命，所以當佢地見到仔女生得似自己，或者表情動作有自己嘅影子，都會特別開心感動。心女細個嗰時一啲都唔似我架，塊面肥嘟嘟，鼻扁扁咀大大，如果我同嗰劇肥嘢帶住班細路出街，個個都以為心女係佢個女嚟！我每次聽到都好唔開心，心女係我十月懷胎生出嚟架嘛。好彩個女識似，越大越似我，由佢十幾歲開始，人人見到都話我地似兩姐妹。

唉，可惜心女個樣越嚟越似我，但性格就越嚟越唔似，單純到不得了…我唔係話想佢攻心計，想佢去害人，不過呢個世界好無情，佢咁單純遲早會受到傷害。

我最近發現，反而嗰個阿莎個女嘉美嘅性格同我有啲似，佢好清楚知道自己要咩，唔會理啲無謂嘅道德觀念。所以佢會主動接近我、引誘阿圓，無非都係想擺脫自己嘅出身，改善生活質素啫。見到佢咁有野心，一步一步咁攞到自己想要嘅嘢，我就好似望住以前嘅自己咁。

個女唔似自己，反而死敵個姨甥女似，呢個世界真係諷刺。

共29個回應

我曾經相信婚姻嘅承諾，我同阿強喺鄉下游水落嚟，咩都冇，但我相信只要兩公婆一齊捱，同甘共苦，都會生活得開開心心！結果阿強識左第二個女人，拋棄左我同心女。然後到阿祖，佢應承過我，唔會好似阿強咁對我。結果呢？係，佢冇識過第二個女人，不過中返去個前頭婆度，一路同我結婚，一路當住我同嗰劇肥嘢面眉來眼去！

我對男人、對婚姻已經絕望喇，只係希望可以喺阿祖拋棄我之前攞返我應得嘅嘢，以後同心女開心咁生活。點知心女同阿祖一樣，三日唔埋兩日就中上嗰劇肥嘢度，以為人地係真心對佢好！仲為左佢鬧我，話從來都係我搶嗰劇肥嘢嘅嘢！

唉，連親生女都唔明白我，我以後仲可以啲乜嘢？仲可以信邊個？唯有信自己。

共28個回應

每個人喺一生入面都會飾演唔同嘅角色，今日我想為一個人所飾演嘅唔同角色評分。

甘泰祖 飾 老公

甘泰祖曾經飾演鍾笑荷嘅老公，鍾笑荷安排佢入自己阿爸間餅舖學做餅，幫佢生左六個仔女，但甘泰祖因為鍾意左我而拋棄佢。佢飾演呢個角色得分應該係負分。

後來甘泰祖飾演我嘅老公，頭嗰十幾年都算係個好老公嘅，雖然舖頭要我幫佢打理，但佢都會時不時氹我，對我個女阿心亦都唔錯。不過近呢一兩年佢成日上鍾笑荷屋企，密謀再度拋棄老婆。所以佢飾演呢個角色嘅得分係0分。

甘泰祖 飾 老豆

甘泰祖係六個仔女嘅老豆，佢同鍾笑荷離婚，唔捨得拋棄啲仔女，結果爭返三個返嚟養。不過佢爭左返嚟之後，又冇俾心機去教，將個責任推晒俾我，結果教唔好就賴我。仲有，佢見到鍾笑荷嗰邊啲仔女好似乖啲孝順啲，就想黐返埋去，坐享其成。所以佢飾演呢個角色嘅得分都係0分。

甘泰祖 飾 老幾

呢個係甘泰祖最新接演嘅角色。佢想重新執掌家好月圓，問啲高層公司嘅情況，冇人肯答佢；佢仲傻到叫阿圓查我買嘅舖，因為佢唔知道阿圓有把柄喺我手，結果搞到自己喺咁多人面前出醜。哼，想同我鬥？佢算老幾？！

佢飾演呢個角色嘅得分係100分，因為佢只係一個老幾！

共48個回應

我喺新會落嚟香港已經廿年，但係到今時今日，有時仲覺得廣東話好奇怪。同一個字，可以有兩個意思，而且可以完全唔啦更。好似個「愛」字咁，我諗大家都識得解，但喺廣東話入面，「愛」字又可以解做「要」，我唔愛即係我唔要。

我唔愛你愛我，你話幾奇怪。

不過都唔夠個「恨」字奇怪，書面語嘅「恨」字，即係憎恨，不過如果講廣東話，就好少會話我恨你咁文雅。反為會成日講，我好恨啲乜乜嘢，女人恨名牌手袋啦，男人恨買靚車，恨，即係渴望。

憎恨同渴望，竟然係同一個字，我一直都唔明有咩關係，不過今日終於明白。

我恨同阿祖結婚恨左十幾年，用左咁多心思希望搞好個婚禮，嗰劇肥嘢竟然教班仔女當眾向佢敬酒，祝佢同阿祖永遠幸福快樂！根本係存心要我難堪！

破壞我恨左咁耐嘅嘢，我恨你，鍾笑荷！

共94個回應

因為阿祖鍾意唱歌，我哋屋企都有好多卡拉ok碟。不過呢排屋企成日都冇人，已經好耐冇唱過卡拉ok喇。嗰日悶悶地，我隨手攞左隻碟出嚟播，聽到有首國語歌叫《好眼淚壞眼淚》，我忍唔住諗，咩叫做好眼淚，咩叫做壞眼淚呢？有一句歌詞咁講：好眼淚 壞眼淚 我都曾為你流 感動和悲傷都是理由。

填詞人應該覺得，因為感動而流嘅眼淚就係好眼淚，相反，壞眼淚係因為悲傷而流。呢首係情歌，咁寫無可厚非嘅，不過喺愛情以外，眼淚又有冇分好壞呢？

其實區分好同壞嘅眼淚，未必係用流淚嘅原因，個結果反為更加重要。

流一次眼淚，除左感情嘅發洩，仲可以為你帶嚟啲咩？傾慕？憐憫？不屑？

其實係咩都唔緊要，最重要係達到你心目中想要嘅效果。

好似我今日勸阿祖唔好再過嗰劇肥嘢度，忍唔住講到喊，最終阿祖都應承左我。可能有人會覺得我功利，根本係用苦肉計，流嘅眼淚都係假嘅。不過如果你老公或者老婆成日去左佢以前個伴侶度，淨番你喺屋企，一個人唱卡拉ok，你會唔會流淚？

就算我喊喺嗰一刻係有目的嘅，都唔代表啲眼淚係假。

好壞，真假，從來都難以分辨，亦好難講得清。

共27個回應

呢幾日屋企嘅人都好沉默。我知道阿祖同奶奶個心諗咩，佢地都懷疑係我背後指使阿恭，叫佢唔好講俾阿祖知奶奶病重嘅事，所以無論我點扮冇嘢，點關心佢地，佢地都好冷淡。

至於阿恭同佢阿媽，佢地好想同我講嘢，不過我一定要同佢地劃清界線。

屋企好靜，不過都唔係冇好處。

平時要應付舖頭嘅事，返到屋企又要照顧咁多人，真係冇咩時間靜落嚟。

最近佢地對我冷淡，反而令我有機會靜啲諗吓嘢，將平時冇時間整理嘅諗法沉澱。

究竟點解會搞到今日咁嘅地步？

我以為今次plan同阿祖去旅行，可以將佢個心拉返去我度，點知結果竟然弄巧反拙。

係咪我太急進，太衝動？

可能我越想諗方法對付嗰劇肥嘢，就越容易犯錯，反而俾佢有機可乘。

呢一次我真係要好好諗清楚下一步點做，再錯一步嘅話，就可能冇得翻身。

敵不動，我不動。

共55個回應

本來表叔恭打嚟話我知奶奶大步檻過，我放下心頭大石，以為可以同阿祖繼續去旅行，點知好衰唔衰，嗰隻阿月竟然聽到表叔恭同梅姨講，係專登唔俾阿祖知奶奶嘅情形，唔俾佢送終！阿祖知道之後好嬲，我個心都好驚！唔知究竟阿月聽到幾多，如果俾阿祖同奶奶知道其實係我隱瞞阿祖，我以後都唔駛返甘家。

返到香港之後，嗰劇肥嘢唔想件事鬧大，影響奶奶嘅情緒，特登叫阿月認錯，話自己根本聽唔清楚，誤會左表叔恭。我當堂個心都定晒，今次話唔定可以反客為主，咬返阿月同嗰劇肥嘢一口！

唔知佢當旺定我當衰，原來嗰劇肥嘢又聽到表叔恭同梅姨講，係因為虧左公司公款，所以唔想我同阿祖返香港！我質問嗰劇肥嘢，呢個世界有冇咁橋呀，佢咁啱見到表叔恭同梅姨喺車度爭執，又咁啱佢識唇語，知道佢地講乜！

係，今次我同阿祖去旅行嘅計劃俾佢地破壞左，純粹因為咁橋，係佢地好彩。

不過，佢地咁好彩都聽唔到我同表叔恭通電話，證明最好彩嘅唔係佢地。

而最後勝利嘅都唔會係佢地。

共36個回應

奶奶：

你點呀？阿恭打電話俾我，話你心臟病發，情況好危險。我而家同阿祖喺意大利，返唔到嚟探你，唯有寫封信問候你。

奶奶，你咁多朋友跟住尾，而家又多個新朋友，講真嗰句，就算過得到今次，都唔知過唔過到下次。唔怕同你講，如果你問我係咪真心孝順你，好似阿祖一樣咁重視你呢，又唔係囉。唔止因為你唔係我親生媽媽，係你性格真係好難頂！你恃住阿祖孝順你，喺屋企成個佘太君咁，要全家人都就晒你！你朝朝晨咁早去公園耍太極，就算我夜晚搞舖頭嘅嘢搞到幾夜都好，都要陪你去，有時我起唔到身，你把口雖然唔會講啲咩，但塊面就黑起晒！咁多年嚟我都要睇住你面色做人，為左討好你，我都唔知花左幾多心思，用左幾多腦汁！

如果你知道我咁講，一定會成個彈返起身，吊起把聲乸埋塊面咁鬧我！如果咁可以激返起你嘅求生意志，我唔介意講多幾句難聽嘅說話！唉，同你做左咁多年婆媳，朝見口晚見面，鍾意唔鍾意都好，點可能冇感情，我唔會衰到想你死嘅。而且我更加唔想你喺呢個時候去，你一走嘅話，我同阿阻就要返嚟，即係代表我個出走計劃失敗，阿祖實會黐返去嗰劇肥嘢度。

奶奶，你死，我就亡。你都唔想阿祖同返你最憎嗰個女人一齊架？所以你一定要撐住！

阿紅

共55個回應