自從上次阿卡爆出當年我小產並唔係為左阿圓，只係自己唔小心跌親，阿祖對我嘅態度就冷淡左好多。我同阿祖講，我咁做係因為阿圓曳，想令佢有個深刻嘅教訓，但阿祖冇乜反應，無可無不可咁。我情願佢唔信，大大聲質問我點解仲要作個理由為自己辯護，起碼咁會證明佢仲肉緊我呢個老婆…呢排我晚晚睇《三十六計》，不停諗有邊條計策可以幫我攞返阿祖嘅心？我一計一計咁睇落去，都諗唔到有咩方法，直到第三十六計–走為上計。

係，嗰次俾嗰劇肥嘢當住咁多職員落我面，跟住又俾阿卡喺阿祖面前爆我陰私，我已經兵敗如山倒。趁我未輸晒所有嘢之前，我一定要同阿祖走。

我得一個選擇，就係同阿祖去環遊世界，希望用兩年時間培養返佢對我嘅感情。

阿祖好唔捨得班仔女，問我可唔可以淨係去幾個月，我唯有約特登約阿強，等阿祖緊張吓，佢先肯同我去兩年。

阿祖啱啱先同啲仔女叫做親蜜返，要佢兩年唔見，係好狠心。但我唔淨止對佢狠心，我對自己一樣咁狠心！

你估我好鍾意見到阿強？我望住佢就諗起當年佢點樣拋棄我同心女！諗起當年我想跳樓嗰時係幾咁絕望！

你估我又捨得心女？佢啱啱先讀完書，返番嚟我身邊；佢做醫生有咁大壓力，如果可以嘅話，我真係好想喺佢身邊支持佢！

但係我唔可以！如果今日我唔狠心，我好快就會冇左個老公！而心女就會第二次冇左個阿爸！

心女，兩年好快過嘅啫，媽咪好快就會返嚟你身邊。

共41個回應

中仔細細個就鍾意足球，不過鍾意睇波多過踢波。啱啱送佢去英國讀書嗰時，佢因為仲未適應，成日都悶悶不樂。我唯有帶佢去奧脫福球場睇波，佢一去到不知幾興奮，指住啲曼聯球迷個個著晒紅色波衫，猛咁拉住我話：阿媽，好似個紅海咁呀！我見佢咁鍾意，咪即刻買左件曼聯嘅波衫俾佢著。佢同全場嘅曼聯球迷一齊大嗌、唱歌，仲一齊做人浪。有咁多球迷打氣，曼聯嘅球員當然如虎添翼，嗰場贏車路士2:0。自此之後，中仔理所當然咁做左曼聯嘅球迷。第二年我再去探佢，遇著曼聯作客車路士，佢求我帶佢去睇。於是我帶佢飛去倫敦，一齊著住曼聯嘅波衫入場。但今次見到嘅再唔係一片紅海，而係汪洋嘅藍海，大家唱嘅係車路士嘅會歌。結果嗰場曼聯踢到走晒樣，輸0:3。

曼聯輸波，中仔成個冇晒心機，問我點解呢場曼聯會踢得咁差？我就同佢講，呢個就係主場同作客嘅分別，無論做咩都好，喺自己熟悉嘅地方，有支持自己嘅人，一定會事半功倍。

呢個道理我唔知中仔聽唔聽得明，但我自己就一直記喺心。所以當今日嗰劇肥嘢上嚟家好月圓office搵我，我就知道今次好有機會喺主場大勝！何況嗰劇肥嘢嘅實力點都稱唔上係車路士，極其量只係曼城！

呢場波嘅結果係點，相信你地都好清楚。我俾嗰劇肥嘢鬧到冇聲出，啲員工個個喺我背後竊竊私語，個心梗係唔服！不過我唔係嗰啲淨係識得怨天尤人嘅人，我不斷諗究竟係乜嘢令到我喺奧脫福主場輸波，仲要係輸俾曼城？

突然間我記起一場波，都係當年同中仔睇嘅，曼城作客曼聯。曼城嘅實力同曼聯當然冇得比，但因為係打吡大戰，曼城嘅球員特別落力，踢到曉飛咁，結果竟然贏左0:2！

我終於明白，嗰劇肥嘢面對我，就好似曼城踢打吡大戰咁，背城借一，不容有失！

今次係我失策輕敵，但我會永遠記住呢個教訓！

共98個回應

啱啱我偷睇到阿祖嘅日記，話自己今次視網膜脫落，係因禍得福。因為對眼睇唔清楚，心眼反而更亮。其實今次嘅意外，亦都令到我睇清楚一個事實。

當阿祖喺醫院草地同我講，佢喺嗰劇肥嘢屋企，同啲仔女一齊有幾咁開心，我個心真係好痛。

有人話要知道一個人講嘅嘢真唔真誠，最緊要就係望佢對眼；但如果一個人講嘢嘅時候，對眼乜都睇唔到，完全唔知道對方嘅反應，唔會就住就住，咁佢講嘢嘅都應該係最真誠嘅。

如果阿祖見到我有幾咁妒忌，仲忍唔住流眼淚，就一定唔會對我咁坦白。咁我就唔會知道，喺佢心目中，我永遠都及唔上佢啲仔女。

無論我幾咁辛苦幫佢打理生意、做幾多嘢想留住佢個心，佢最著緊嘅都係佢五個親生仔女。

或者我應該一早就估到，正如喺我心目中，阿心都比阿祖重要。不過有邊一個女人唔希望個老公將自己放喺第一位？老公錫仔女多過自己，就算係親生有時都會呷醋啦，何況佢地唔係我親生？

既然我改變唔到呢個事實，唯有改變客觀嘅環境，令到阿祖個心向返我呢邊。

一個人就算再鍾意一樣嘢、一啲人，如果唔能夠令佢開心，甚至係令佢心煩，佢無可奈何都要選擇逃避。

共36個回應

好多人都鍾意放本書喺床頭，臨瞓之前睇吓，稱之為床頭書。我都有兩本床頭書，一本係阿祖未瞓嗰時我會睇嘅，通常都係《怎樣當個好媽媽》、《生錢之道》之類，總之係對我地屋企有益嘅書。另一本係趁阿祖瞓左我先會拎出嚟睇嘅《三十六計》。點解唔想俾阿祖知我睇呢本書？我諗冇一個老公會想老婆咁多心計，滿肚密圈掛？

我睇左《三十六計》已經十幾年，唔敢話自己係專家，但我夠膽講，如果一個人能夠將呢部書入面嘅三十六條兵法靈活運用，咁佢嘅成就都唔會差得去邊。

好似我咁，當年能夠吸引到阿祖，當然係用左第31計–美人計。

呢十幾年我表面對阿卡、阿圓、中仔佢地笑騎騎，你估我好好過？不過第10計教落，冇計。

又如果唔係我睇《三十六計》，都未必咁快睇得出呢排嗰劇肥嘢想「借屍還魂」，用啲仔女嚟箍住阿祖。

如果我係一般女人，梗係大吵大鬧，話阿祖冇本心。不過既然佢而家個心係同情嗰劇肥嘢，我梗係要同佢同一陣線，眼濕濕咁勸佢唔好再令阿荷傷心。苦肉計，對懦弱嘅男人最奏效。

不過懦弱嘅男人通常都猶豫不決，我知道阿祖唔會話斷就斷，於是特登同奶奶去浸溫泉，欲擒先縱。只有喺嗰劇肥嘢屋企當場捉住阿祖，佢先至唔敢再犯。

不過我左計右計，都計唔到阿祖為左唔俾我見到而衝出馬路，俾車撞到…

如果我早知嘅話，一定唔會咁做，對唔住…

共29個回應

我唔知多唔多男讀者睇我嘅blog，如果有嘅話，我希望你地可以幫我做個簡單嘅問卷調查。女人魅力指數調查

以下嘅項目，請你地分別為我同嗰劇肥嘢打分，10分為最高分，1分為最低分。

1.      樣貌

2.      身形

3.      儀態

4.      談吐

5.      氣質

6.      衣著配搭

7.      持家能力

點呀？填完未？

就算未填完都唔緊要，其實我喺自己個blog度，開得呢個問卷調查，梗係好有信心自己會贏，仲要係每一項都贏成條街！

我咁講唔係因為我自大，係因為對手實在太弱。

講魅力，嗰劇肥嘢十幾年前贏我唔到，今日更加冇可能贏。

可惜女人要留住一個男人，除左魅力，仲有一樣好重要嘅籌碼：仔女。

呢樣嘢，嗰劇肥嘢就贏我成條街。

如果佢唔係幫阿祖生左五個仔女，我一早有方法令到佢地唔再見面。而家阿卡又搬左出去，連中仔都返埋去住，嗰劇肥嘢分明就係想借啲仔女嚟搶返阿祖。

不過賭錢唔係淨係鬥邊個籌碼多嘅，食腦最緊要。

呢樣係我最大嘅籌碼。

共96個回應

我一手一腳將”家好月圓”發展成今日嘅規模，其中一個成功因素，係因為我識得做危機評估，往往喺危機未嚟到之前，已經諗定解決嘅方法。好似大約十年前，我見香港人越嚟越注重健康，而我地嘅月餅又咁高糖份同脂肪，銷量一定會越嚟越差，所以我一早已經搵人研究低糖月餅嘅可能性。到幾年前傳統月餅嘅銷量跌左超過十個百份點，第二年我地即刻推出低糖月餅，結果嗰年我地月餅嘅總銷量唔單止冇跌，仲比前年更加好添！所以話危機評估幾時都咁重要，就算管理頭家都係一樣。近排我就見到屋企有唔少危機：

1. 先係嗰劇肥嘢上嚟數我，雖然奶奶同阿祖都冇怪我，不過我感覺到阿祖個心因為呢件事離我遠左。

2. 我知道阿心亦都因為我送中仔去陪佢讀書嘅事，而覺得好內疚。呢排佢多左好多出街，我問佢去邊，佢話約左啲舊同學。不過佢眼神有啲迴避我，我懷疑佢係上左嗰劇肥嘢度，我最擔心就係佢同阿好會舊情復熾…

3. 阿卡俾公關公司炒左，雖然奶奶未話叫佢返家好月圓做，但如果阿卡有心返嚟爭，我都冇得拒絕。

不過所謂有危就有機，而家奶奶同阿祖都覺得阿卡因為炒股俾人炒，做嘢唔負責任，就算佢話要返舖頭做，我更加大條道理要佢由低做起；至於阿心同阿好以前嘅事，第時應該可以用嚟做對付嗰劇肥嘢嘅藉口…

共105個回應

鍾笑荷，今日你登堂入室，名義上係嚟求我，想我唔好告你細妹，脆脆地收廿萬了左件事，但實際上，你係嚟數我點樣害你啲仔，點樣教壞佢地！你扮晒忍辱負重，就算俾我地冷待都唔肯走，跟住仲要用埋苦肉計，扮扭親條腰，目的就係要阿祖同奶奶心軟！你咁處心積累，無非都係想喺阿祖同奶奶面前打擊我啫！話我因為阿家唔肯叫我阿媽，就特登叫蓮子蓉教佢炒股票，搞到佢而家變左個病態股民，返唔到轉頭！又話我送阿中去英國讀書，完全係為左陪阿秋！我買最好嘅嘢俾阿中，就講成係我特登縱壞佢，等佢唔成材！

你好嘢吖，講到聲淚俱下，膊頭都震晒，講到佢地個個都覺得你係偉大媽媽，我就係惡毒後底乸！係，你講嘅嘢，我認我係有做過，我認我唔係全心對佢地好，想佢地成材，不過咁又點？如果唔係因為我將舖頭越做越大，佢地有得個個讀大學？咪同你嗰邊啲仔女一樣囉，讀書唔成，成世屈喺餅舖度囉！你憑乜話我？

仲有呀，你唔好忘記，阿秋先係我親生女嚟架！有乜嘢人可以錫人地嘅仔女多過錫自己仔女？唔通要我調返轉頭，送阿秋過去陪阿中讀書？就算我咁講你都唔會信啦！

我想阿秋好，希望佢成材，有乜嘢唔啱？呢個世界，唔通淨係你可以做偉大媽媽？

共55個回應

我一早講過，我唔會輸！嗰個阿莎告我搶左佢地「家好月圓」嘅招牌，我未驚過！我地用左個招牌十幾年，佢而家先嚟告，個官自不然會諗佢地當初係心甘情願俾我地用嘅，不過係而家見我地問餅舖越做越大，條氣先至唔順嘅啫！咁簡單嘅道理都唔明就想同我鬥，有乜辦法唔輸？佢輸左都仲唔知醜，竟然係法庭出面、大庭廣眾鬧我係「白粉拆家」！我俾佢鬧冇所謂，因為我行得正企得正！我甚至開心添，佢簡直係俾個藉口我反咬佢一口！

四百萬對我地嚟講係小數目，對佢嚟講就係全副身家！我知有人會覺得我趕盡殺絕，但呢個世界就係咁架啦，要鬥就要出盡全力，贏要贏得徹底！如果今次贏嘅係佢，唔通佢會對我仁慈？佢一定會繼續告我地，話我地呢十幾年嚟憑「家好月圓」呢個招牌賺左咁多錢，而家應該將啲錢嘔返出嚟！話唔定仲會向法庭申請禁制令，唔俾我地繼續賣月餅添！

如果你地覺得我絕，只係因為我係贏家。

共46個回應

我似乎低估咗嗰劇肥嘢。先係行乖孫政策，知道奶奶最錫阿好呢粒孫，就特登駛佢嚟氹奶奶，俾佢哋八月十五正日食中秋飯。

搶咗我個正日都算啦，仲拉埋阿心去同佢哋一齊食！阿心仲呃我話係同舊同學燒嘢食，佢從來冇對我講大話架！都唔知劇肥嘢對阿心落咗啲咩藥！

跟住仲夾埋嗰個蓮子蓉，話當年阿祖個細佬阿全唔係因為嗰劇肥嘢唔肯借錢俾佢而自殺，係因為俾女人飛，為情自殺喎！

哼！估唔到嗰劇肥嘢咁毒，特登揀中秋嚟扮可憐，想奶奶同阿祖原諒佢！仲叫蓮子蓉講到我同阿祖好似姦夫淫婦咁，喺啲仔女面前落我面！

佢呢招的確係好高，不過想一舖搞掂我？冇咁容易！

十幾年嚟，我喺阿祖同奶奶身上落咗咁多功夫，佢哋個心點都係向住我嘅。至於阿家，佢不嬲都唔肯叫我做阿媽，不過佢越唔尊重我，我越表現得寬宏大量，咁就可以喺阿祖同奶奶面前攞分！

阿圓同阿中腦筍都未生埋，以為我咁肯洗錢喺佢哋身上，就係錫佢哋，一早已經叫我阿媽。不過而家咁都唔夠，我要佢哋親我多過親嗰劇肥嘢！

嗰劇肥嘢想搶我阿心吖嘛，我就要佢試吓仔女俾人搶咗嘅滋味！

你睇住嚟啦！

共78個回應

今日阿祖、梅姨同表叔恭去嗰劇肥嘢度講換招牌嘅事，點知俾肥嘢個妹阿莎打到一仆一碌，但後來肥嘢又打嚟話應承換招牌。我唔知嗰劇肥嘢搞乜，不過「家好月圓」呢個招牌係我應得嘅，就算佢唔肯換，我都有方法令到佢換！我知有啲人會覺得我欺人太甚，「家好月圓」呢間餅家係嗰劇肥嘢個阿爸傳佢嘅，後嚟佢同阿祖離婚，已經好大方咁准你哋用返呢個招牌嚟開舖啦，你而家仲想搶埋佢？！

我好明白點解有人會咁諗，不過本來「家好月圓」只係春秧街一間細餅舖，今時今日，「家好月圓」呢個招牌之所以全香港人都識、區區都有分店、年年落成千萬廣告，都係因為我殷紅！講真，如果唔係我做紅咗個招牌，佢哋嗰間又殘又舊嘅餅舖都未必頂都咁多年啦！

我份人就係咁，認為啱嘅一定會爭取到底。好似當年我知道屈喺大陸冇前途，就特登去學游水，游水落嚟香港！到我同阿祖有咗感情，我冇因為嗰劇肥嘢曾經幫過我而放棄。同阿祖結婚之後，我都從來冇諗住等阿祖養，為咗搞好間餅舖，供阿心去外國讀書，我日日朝五晚十一！

總之我今日擁有嘅所有嘢，全部都係我靠自己爭取返嚟嘅，我咩人都唔會怕！

共32個回應