殷紅呢個衰女人嘅賤格嘢真係鬧十日十夜都鬧唔完架！佢想納走家好月圓九成股份，淨係分番一成股份俾阿祖，咁已經夠晒霸道，離晒大譜架啦，點知佢而家仲過份，話一成都唔會留番俾阿祖，淨係肯每個月俾六萬贍養費阿祖喎。六萬蚊？俾乞衣呀？我哋一家咁多口，我、阿祖、阿荷、達叔、阿卡、阿好、阿月、阿圓、阿中、阿莎、嘉美、恩賜、袁老太，就算阿慶嫁咗唔計，都一家十三口呀，六萬蚊邊夠？況且家好月圓係屬於阿祖架嘛，我哋每個月俾番六萬蚊佢就差唔多。

個衰女人以為請個好嘅大狀就贏梗，想創佢呀！唔好以為自己喺公司坐鎮咗咁多年就可以做皇太后、老佛爺，個個都要買佢怕，唔敢話佢唔係老闆，呢個世界係有天理架，無人可以隻手遮天架！我已經諗到有邊個可以證明阿祖有出錢出力搞家好月圓，唔止有人證，我仲有物證添。一陣等我吼啲醫生姑娘唔留意，偷偷地溜出去幫阿祖搵人證物證先，殷紅呢個毒女人今次一定會一敗塗地！

共53個回應

殷紅呢隻西宮唔單止毒過黑寡婦，仲狼過華秀隻狗添呀！家好月圓係阿祖捱出嚟，有血有汗架，佢呢？佢係有捱，但係佢只係做舖面，派吓傳單，賣吓餅，輕鬆工作嚟架咋，講辛苦點及得喺工場日搓夜搓，捱到肺穿窿嘅阿祖呀？阿祖肯分一半俾佢，已經俾多佢嘞，計我話，分番兩三成俾佢就已經夠，不過我阿祖好人，念在一夜夫妻百夜恩，寧願要少啲，同個女人好來好去，點知呢個女人貪得無厭，五成都話唔夠，想要夠九成。係咁意企吓舖面，坐喺個冷氣房他他條條搞吓行政就想要九成，真係想錯佢呀！我信個天有眼架，人心不足蛇吞象，鬼唔望哽死佢呀！

蒼天有眼，法律亦都係公正嘅。全香港人都知道家好月圓個老闆係我個仔，你試吓出去求其拉住個路人甲問吓邊個係家好月圓個老闆吖，佢一定會話係甘泰祖，而唔係殷紅。而且個招牌係叫家好月圓呀，乜嘢係家好月圓呀？咪就係甘永家、甘永好、孫皓月同甘永圓囉，四個都係我嘅孫仔孫女嚟架，邊個同佢有親呀？如果間餅舖係佢嘅就唔應該叫家好月圓，應該叫殷紅餅店、強紅餅店、紅心餅店、強心餅店……激死我嘞，再講落去，我真係要打強心針架嘞，聽日先再鬧隻死人西宮。

共13個回應

嗰隻西宮應承咗俾阿圓上位，但係佢份人咁工心計，我真係信佢會咁順攤。但係阿圓話隻衰嘢真係放晒手俾佢搞，一啲都冇過問過佢。唔通隻西宮轉死性？抑或係上次俾我哋成班人圍住佢鬧，鬧到佢怯咗，所以睇定啲先，唔敢咁快出手呢？總之我就唔會信個衰人係真心讓位俾阿圓，佢一定有陰謀架。不過佢有張良計，我哋都有過牆梯，只要阿圓坐得喺呢個位，有名有實，以佢咁叻仔，一定可以慢慢起革命嘅，將隻西宮啲人一個個掹走，將佢啲黨羽連根拔起。我真係好期望嗰日快啲到。

如果阿圓鏟得走隻西宮，我一定要氹管家仔佢哋返家好月圓。到時，阿圓就做總經理；管家仔鍾意整餅多過搞行政，一於俾個廠長佢做；阿卡做開公關公司，梗係要接管宣傳部啦；阿月同阿卡分唔開嘅，就繼續做阿卡嘅私人助理；阿慶雖然講唔到嘢，但係佢生得咁靚女，一於就叫佢做我哋嘅廣告女郎、生招牌；阿中仔咁鍾意電腦，我哋就開個電腦部，叫中仔將全個家好月圓電腦化。唉吔吔，諗起六個孫仔孫女一齊返家好月圓，我真係瞓著都識笑呀，希望呢一日可以快啲到啦！

共23個回應

殷紅呢個女人真係好歹毒，將自己啲人放晒入管理層，阿祖叫啲伙記解釋吓啲開支呀、政策呀，就個個都話唔知唔理，叫佢問番殷紅。文鈔哥佢哋難得肯返嚟做，阿紅呢個女人表面上就「好呀好呀，大家俾心機」，其實就剝奪晒文鈔哥佢哋嘅實權，淨係俾佢哋掛名，乜都唔俾佢哋過問。我做咗咁多年人，阿紅郁吓條尾我就知佢諗乜嘞，佢咁樣做分明就係想架空阿祖，乘機想吞晒阿祖間家好月圓。家好月圓係阿祖一手一腳捱出嚟，將來諗住留俾管家仔、阿卡佢哋架，我唔會俾呢個毒女人得逞架！

班員工呢，就全部都係隻西宮啲人，我哋要郁都郁唔到架嘞，但係一返到屋企，阿梅、阿恭就算罷嘞，淨係我同阿祖，仲有七個孫仔，夾埋成九個人，淨係人海戰術都浸得死佢隻衰嘢。我班孫仔只係無心同佢爭啫，如果佢哋肯齊心合力，仲點到呢隻西宮企？所以，我同阿祖特登喺正班孫仔返嚟嗰日爆晒佢啲衰嘢出嚟，仲扮晒為咗家好月圓搞到暈喺條街度。班孫仔聽到我哋兩個咁慘，佢哋梗係起勢咁齒阿紅啦！阿紅呢隻喪家犬一把口又點敵得過我哋咁多人吖，最終咪唯有應承俾阿圓上位囉。

阿紅以為自己好工心計，好厲害，但係薑始終係愈老愈辣嘅，佢做得幾多年人？唔好忘記，我後生嗰陣都係奸架，佢呢啲手段我都有得出賣呀。

共17個回應

人總會偏心嘅，所以我從來都冇否認過，我係特別疼錫管家仔！嗰日我見到佢喺公園仔度喊，我從來都冇見過佢喊得咁傷心架，當時我個心真係乸實晒，好心痛呀！我好嬲，係邊個女仔搞到管家仔咁傷心！但係原來管家仔鍾意嗰個係于素秋！佢唔開心，唔係因為于素秋唔鍾意佢，而係因為佢知道于素秋唔開心，所以佢都唔開心呀！正一傻仔嚟嘅！

個傻仔仲為咗維護于素秋，唔想佢更加唔開心，寧願認自己係大話精，搶人女朋友，受盡侮辱，都唔想俾人知道于素秋做第三者！你話，我呢個做嫲嫲嘅，見到佢咁傻，有咩辦法唔心痛吖！

其實管家仔同于素秋細細個感情就特別好架啦！一個係撒亞人，一個係雅典娜公主，簡直係一對金童玉女！我成日諗，如果唔係佢阿爸阿媽發生咗啲咁嘅事，如果唔係阿秋夾硬被人送咗去外國讀書，如果佢地可以一直青梅竹馬，一齊長大，話唔定阿秋已經做咗好嫂，做咗我嘅好新抱，過多兩年我可以抱”瑟”添喇！如果係咁，你話幾咁好！

共20個回應

阿紅呢個女人真係愈來愈過份嘞！佢條狐狸尾巴終於現形嘞！我一定係鬼掩眼，先會錯信咗佢咁多年！阿祖出返餅舖有幾耐啫，佢竟然借啲意燉晒班老臣子，咁咪即係借啲意趕佢地走！阿祖咁多年冇出餅舖，要跟得返啲嘢，本來已經係唔容易架喇，而家佢仲要趕走晒班老臣子，冇佢地撐住，試問阿祖喺餅舖度仲邊度有牙力、有話事權吖！阿梅仲話俾我聽阿紅同面油強呢排行得好埋，我仲聽到阿紅要面油強幫忙搞買舖嘅事，你慌唔係想陰啲陰啲陰乾我地間家好月圓咩！

最慘係阿祖而家仲懵盛盛唔知發生咩事，阿紅信唔過，阿恭又信唔過，連自己個親細妹都講到明唔會幫我，我已經冇人可以旨意，我而家剩係可以靠管家仔架咋！唔係得管家仔呢幾排陪住我出出入入，說掂班老臣子，我一個伯爺婆都唔知點算！我晚晚發夢都見到阿紅同佢個契家佬夾理搶走間餅舖！我真係好驚呀！間餅舖我係要留嚟俾我班孫架！無論點，我都一定要阻止佢地架！

共17個回應

今日，管家仔佢地忽然話搞咩時光倒流十八年一日遊，全家人一齊去遊廟街同布袋澳，話要彌補以前嘅遺憾喎！佢地仲講返當日我為咗阿荷唔俾管家仔食孖條，就一巴車埋阿荷度嗰件事，我見阿荷一路聽仲一路笑得好開心，完全冇芥蒂，但係其實我個心好唔安樂，嗰件事我仲記得好清楚，細細個管家仔就成日咳架喇，好容易就會有氣管炎，嗰日見佢啱啱先好返少少，咪諗住俾佢食吓孖條冇所謂囉，點知阿荷竟然一手搶咗去喎！其實阿荷咁做係啱架，如果繼續俾管家仔食雪條，咪盞佢轉個頭又咳過，但係我一見到阿管家仔好扁晒嘴嗰個樣，我就唔知喺邊度嚟忽然咁好火，一巴扯落阿荷度！阿荷痛唔痛我唔知，但係我隻手就好痛！

今日去到廟街，見到好多嘢都仲同以前一樣，嗰間歌廳同冰室都仲喺度，係啲蛇羹同煎蠔餅嘅檔仔搬晒入舖頭囉！我仲記得以前喺廟街中間有一間賣魚蛋嘅檔仔，啲魚蛋細細粒，唔係一串一串咁賣，係一袋一袋咁賣架，每次經過我都會買一袋俾阿卡佢地幾兄弟姊妹分，佢地又好乖架噃，唔會爭食架噃，管家仔仲會特登留返幾粒拮俾我食添！

呢班孫仔真係好乖架！其實諗返轉頭，本來啲孫仔日日都可以陪住我架，點解會搞到要初一十五先可以同佢地食餐飯架啫？！如果當年我唔係幫阿紅而係幫阿荷，堅持唔俾頭家散，話唔定過去呢十幾年，我地日日都可以好似今日咁過得咁開心…

共26個回應

呢次嘅病，如果我冇醒返，我可能就咁做咗一世嘅糊塗人！其實之前屋企嘈嘈閉，蓮子勇爆大鑊，連阿卡、阿月都數臭阿紅阿恭，我唔係冇感覺架，但係我自私，我剩係想維持現狀，所以處處維護阿紅、維護阿恭…就算我明知阿恭有心阻止阿祖返嚟送我終，我個心好嬲，但係我都諗住隻眼開隻眼閉，由得件事過咗去就算！明明昏昏迷迷嗰幾日，係聽到阿恭逼阿梅唔好打電話俾阿祖，都專登講大話話聽到阿恭喺我牀邊喊，將個責任屈咗落阿月度！

阿月呢個女仔，係我對佢唔住！我成日都覺得佢只係養女，就算要冤枉佢都冇所謂，但係佢就從來都冇咁諗過，佢明知我地冇血緣關係，但係都叫我做嫲嫲，亦都當我真係佢嫲嫲咁嚟錫我、幫我！今次件事我屈咗佢，但係佢都冇嬲過我！佢就同阿荷一樣，阿荷同阿祖離咗婚，佢同我已經無啦無能，但係佢都仲當我係奶奶一樣咁嚟幫我、孝順我！我仲成日咁咒佢，但係佢都冇嬲過我！係荷媽教得好，佢個個仔女都同佢一樣，咁善良，咁正直，仲以德報怨！係我盲咗眼，我先睇唔到！阿月，對唔住！阿荷，我對你唔住！

共33個回應

呢一次我心臟病發，真係好危險，嗰幾日我已經迷迷糊糊，發生咩事都唔知道，矇矇矓矓嘅時候，剩係好想阿祖可以喺我身邊，家好月圓慶中秋成班孫仔都可以喺我身邊，咁我都叫做去得有福氣、去得安落吖！我真係以為我會跟阿齋叔、何恩平佢地帶我走架喇！但係竟然咁都俾我醒得返喎，仲轉個頭就已經龍睛虎猛，又好似以前咁行得走得，乜事都冇喎！我喺度諗，其實係咪個天故意同我開個玩笑，話我老啦，老懵懂啦，老糊塗啦，要我掹大對眼睇清楚，邊個先係好人，邊個係衰人！

喺我已經想放棄、想就咁同啲孫講拜拜嗰陣，竟然係阿荷將我喝醒、喝返番嚟！我自己嘅親生阿妹，同平日對我百般奉承嘅阿恭，竟然夾埋唔俾我個仔返嚟送我終！我自細睇住阿恭大，我知道佢就算再斗膽，冇人指使佢佢一定唔敢咁做！估唔到係阿荷，由鬼門關拉返我出嚟不特止，仲為咗幫我嗌個仔返嚟送終，喺背後做咗咁多嘢，我鬧咗佢十幾年趁地淋，佢都仲咁幫我，我真係欠咗佢太多…如果我咁都仲唔識掹大隻眼睇清楚，我就真係枉為人喇！

共23個回應

嗰日我去睇驗身報告，醫生同我講，話我有心臟衰竭，但係我年紀太大唔適合做手術，雖然我不嬲都有好多朋友跟出跟入，本來多一個唔多，少一個唔少，但係呢一個可能真係會帶我走架！我雖然無出聲，但係其實我真係驚，我好想個仔可以喺我身旁，我好想可以見多幾個孫幾面！但係我都忍住咗冇講出嚟！

前嗰排為咗阿荷嘅事，屋企嘈到翻晒天，有好多嘢邊個著邊個唔著，我都唔想再去諗喇！但係呢排阿祖成日肆無忌憚咁就去阿荷度，阿紅又同嗰隻面油強唔清唔楚咁，眼睇住阿紅同阿祖好似愈嚟愈多問題，我真係唔想因為我嘅病，而再影響佢地！所以我冇話阿祖聽我有病，多一事不如少一事，就由得佢地去環遊世界啦！可能咁樣對大家都好啲！

我本來以為我條命咁硬，應該冇咁快有事，但係今日我為咗追阿好，爬上天橋嗰陣，個心乸住乸住痛得好緊要，喺天橋度碌咗落嚟！阿好，嫲嫲好辛苦呀，嫲嫲好驚以後都見唔到你地呀！究竟我係咪唔應該隱暪我嘅病，我咁做係啱定錯呀？阿祖，你喺邊呀，我好想你喺我身邊，我好辛苦呀，我好驚我到走都見唔到你地最後一面….

共35個回應