今晚阿好、阿月、阿慶、中仔佢地圍晒喺我身旁，一路拉住我一路猛話嫲嫲，你唔好再聽佢講嘞，嫲嫲，紅姨想搞到我地家無寧日先安樂架，嫲嫲，佢想搞到我地個個流眼淚咋！嗰陣時，我真係唔知點算好！阿卡話阿紅個肚係佢自己整唔見嘅，但係就賴落阿圓度，等阿圓個傻仔一直都好內疚，呃足我地咁多年！阿月話阿紅故意叉禍阿卡公司搞嘅第一個function，差啲搞唔成，要出醜！阿慶又話阿恭偷偷地吊住阿祖尾，見阿祖盲中中差啲俾車車死都唔出手幫佢，就係為咗唔俾佢上阿荷屋企！佢地話阿紅做咁多嘢，就係想佢地唔開心，想佢地流眼淚！我真係好混亂，呢啲嘢到底係咪真？阿紅喺我身邊咁多年，一直都係一個好家嫂，佢點會做出啲嘅嘢？但係嗰班係我班孫，佢地無理由會呃我！我到底應該要信邊個？

共64個回應

我唔明，我始終都唔明，點解阿好佢地係都唔肯返嚟家好月圓？！點解阿荷係都要阻佢地，唔俾佢地返嚟？！就連阿月都係咁！你幾時見過做人後底乸做得好似阿紅咁大方，將份身家拎出嚟同前頭婆啲仔女分！

講真，阿紅第一次同我講，打算離開香港，同阿祖去旅行，將成間餅舖交晒俾阿卡、阿好佢地嘅時候，我都好愕然！雖然我一直都打算將餅舖留俾幾個孫，但係我無諗過係咁快嘅事，況且呢幾年嚟餅舖一直都係由阿紅打骰，個個都當晒佢先係老闆娘，我無諗過阿紅竟然會提議將呢個位讓出嚟！但係佢咁做，對佢一啲好處都冇，唯一可以講嘅，就係佢可以同阿祖離開香港，離開鍾笑荷！為咗個老公，犧牲一切！既然阿紅都願意讓位，點解阿荷係都唔俾佢地返嚟？唉，我唔知應唔應該再繼續逼佢地…究竟我幾時先至可以等到一家團聚嘅一日！

共24個回應

今日阿紅俾咗阿卡喺商場幫家好月圓搞嗰個宣傳活動嘅碟俾我睇，我真係睇到呆晒！阿祖同阿荷著住鳳冠霞珮出嚟，當住咁多人面前，面不紅氣不喘咁講返晒以前啲往事出嚟，原來阿祖咩都記得，佢同嗰劇肥嘢以前嘅每一個細節佢都仲記得好清楚！最後仲同嗰劇肥嘢一齊拋繡球，就好似真係結婚咁！試問做女人嘅，可以點忍？我都係女人，我好明白阿紅有咩感受，佢為咗顧存阿祖嘅面子，先至冇當眾發惡，只係等阿梅、阿恭佢地走晒之後，先嚟同我呢個伯爺婆哭訴！當佢喊住口咁同我講，話佢可以咩都唔要，剩係想箍返阿祖嘅時候，我睇得出，佢真係好愛阿祖！

我個仔都係男人，男人梗係貪心，梗係得一想二架啦！攬住個老婆就想要個二奶，到個二奶變咗老婆，又掛住個前頭婆！既然呢個新抱係我揀嘅，我一定要為佢做返啲嘢，支持阿祖同阿紅去環遊世界，唔可以俾佢再黐住嗰劇肥嘢！

共23個回應

一連兩日無食過嘢，先至真正感覺到自己身體到底有幾差，啲朋友一次過走晒出嚟，個胃乸住乸住痛，耳水不平衡，個頭天旋地轉，血糖又低，腳步浮浮，手軟腳軟，瞓喺張牀度，個心卜卜卜卜咁亂跳，快到好似停唔到，又好似隨時會停咁，有一下子我真係以為我會就咁去咗！或者你會覺得我好固執，我都知道我一把年紀，條命仔唔可以隨便攞嚟較非，但係當我攤喺牀度，望住個天花板，揞住個心口，估緊佢仲可以跳多幾下嘅時候，我真係覺得如果啲孫唔可以陪喺我身邊，個心仲跳定唔跳我都冇所謂！阿卡、阿好、阿圓、阿慶、中仔，佢地每一個都係我嘅孫，每一個都係我嘅心肝命掟，點解要分開我地？阿好、阿慶本來就已經成日唔喺我身邊，要我眼白白再睇住阿卡同中仔一個又一個咁離開我，我個心真係好酸！係我自私，我唔鍾意佢地個個都黐嗰劇肥嘢，就算佢地分開咗咁多年，個心都仲係向住佢！我真係好憎阿荷，我好妒忌佢，由細到大，有咩事班孫剩係識講唔駛驚，荷媽喺大廳，幾時見佢地會講，唔駛驚，嫲嫲喺大廳吖！但係我冇諗到我咁樣做，原來係會令班細路咁唔開心，令佢地流咁多眼淚…中仔，對唔住！…阿好，對唔住！…阿卡、阿慶，對唔住！…

共55個回應

作反喇！作反喇！中仔竟然書都唔讀，偷偷雞返咗嚟香港咁耐，都唔話俾我知！仲要夾埋阿卡、阿好佢地成班嚟呃我，又扮睇波！你地當嫲嫲係三歲細路哥，任得你地呃呀，你地個心仲有冇我呢個嫲嫲架！最激氣嘅，係佢暪住我都不特止，仲黐埋去嗰劇肥嘢度住！中仔不嬲都好乖、好聽話嘅，我嗌佢做乜，佢從來都唔敢逆我意嘅，唔駛問阿貴一定係劇肥嘢唆擺佢，佢先學得咁大膽啦！好彩有莎莎同我通風報信，唔係我真係俾佢地呃得透喇！

有人勸我話莎莎係個貪錢婆，靠唔住，叫我唔好信佢…但係唔信佢，我又信得邊個吖！你睇阿卡、阿好佢地成班夾埋扮喺英國打3G電話嚟暪住我，就知佢地一個二個個心都係向住劇肥嘢，而家連阿祖都三之無日就走過去嗰邊，冇人會同我講真話架喇！莎莎話要十萬八萬買爐，你估我真係老到懵咗，唔知佢其實係想貪錢咩，不過我真係好想知道阿好同中仔佢地嘅狀況吖嘛，又唔係好多錢，少少甜頭咪由得佢囉！我冇辦法，我擔心啲孫，我要知嗰邊嘅真實情況，莎莎係我惟一嘅方法！

共28個回應

最後，我都係選攞咗相信阿紅。《菜根譚》中有句說話：「老妓晚景從良，一世胭花無障；貞婦白頭失節，半生清苦俱非」，我唔想好似啲世俗人咁膚淺，為咗一件事就定阿紅嘅罪，抹殺佢呢十幾年嚟嘅功勞，所以我一定要行出嚟幫阿紅講句說話，係我心目中佢仍然係我嘅好家嫂。

阿紅過門之前，我就搵相士佬同阿紅睇過，相士佬話阿紅係旺夫益子相，而家你睇到家好月圓開到成行成巿，你就知個相士佬所言非虛。老實講，其實我一直都唔鍾意阿荷，佢未同阿祖離婚嗰陣，我已經成日俾佢激到紮紮跳，呢劇肥嘢自以為是，目中無人，成日霸住我啲孫仔嚟教，我同啲孫仔去玩又唔得，請啲孫仔食嘢又唔得，鬧到我啲孫狗血淋頭，鬧仔鬧仔鬧鬧吓仲連我呢個老人家都鬧埋；對阿祖又刻薄，成日要佢捱到半夜三更，捱到面珠仔都無忽肉，成個人瘦晒，我見到就心痛，所以當阿祖話佢要同阿荷離婚，要同阿紅一齊，我係第一個舉腳贊成架！其實呢十幾年嚟，我地兩家人都總算風平浪靜，咁辛苦先搣得甩劇肥嘢，同佢一刀兩斷，我真係唔想再見到佢！如果唔係嗰個貪錢婆阿莎，一返嚟香港就喺度搞風搞雨，一時又話中秋要食八月十五，一時又話要攞返家好月圓嗰個招牌，係都要纏住我地一家人唔放，我真係諗住同阿荷呢一世老死不相往還架嘞！呢個貪錢婆成日吼住我地啲金糠，今次就當係俾一個教訓佢啦！最怕佢唔識學乖，有佢喺度一日，恐怕我地都好難有餐安樂茶飯食喇！

共19個回應

嗰日阿荷走嚟我地屋企，話阿紅專登叫人教阿卡賭期指導佢升仙，又話阿紅送中仔去英國只係為咗陪心女讀書，我聽完個心真係好唔舒服，眼光光望住個天花板，囉囉孿咗成晚都瞓唔著…阿荷呢個人又刻薄又固執，我雖然好唔鍾意佢，但係我知道佢份人心直口直，有嗰句講嗰句，斷唔會生安白造無中生有作個咁大嘅大話出嚟呃我！

話雖然係咁，但係我更加無辦法相信阿紅會咁毒，咁樣嚟害我啲孫！呢十幾年嚟阿紅對我呢個家婆不知幾孝義，成日陪我去晨運，個個禮拜親自陪我去覆診，噓寒問暖，事事周到；個個孫仔都俾佢栽培到大學畢業，心女更加係大醫生；餅舖嘅事一樣親力親為，搞到有聲有色，完全唔駛阿祖操心！無論屋企內同屋企外嘅事阿紅都兼顧周到，喺我心目中佢真係入得廚房、出得廳堂嘅模範家嫂！

如果你係我，你會信邊個？

共30個回應

第一次聽到阿祖叫阿卡返家好月圓度做，我真係好開心！最好連阿好佢地都返埋嚟！間舖係佢地伯爺一手創立嘅，遲早都係留返俾佢地架啦，有名你叫架，個舖名都叫做家好月圓啦，由佢地幾個返嚟接手就最啱架啦！

可惜吖，阿紅同阿卡都傾唔埋欄！我明阿紅諗乜嘅，做人後底乸你估咁易咩，可以好似阿紅咁，將前頭婆個仔都當係自己仔女咁湊，已經係好難得架喇！嗰隻阿卡又係唔爭氣嘅，係都唔肯叫阿紅做阿媽，阿紅個心有啲硬住硬住都唔出奇吖！做女人都係小器架啦，最衰嗰隻阿卡，鬼死咁硬頸，先頭只要佢肯低聲下氣，阿紅一定會心軟，俾佢返總舖，唔駛佢去鰂漁涌做店長架！唉，阿卡再係咁鬥氣落去，蝕底嗰個係佢自己咋！

我幾廿歲嘞，老嘞，仲成日有一大班朋友跟出跟入，睇唔到佢地幾耐架嘞！我冇嘢求，惟一最大嘅心願，就係見到家好月圓慶中秋成班孫一齊返嚟餅舖度幫手，一家人齊齊整整，咁我就心滿意足嘞，只係唔知我呢個伯爺婆有冇咁長命可以等到呢一日啫！唉…

共12個回應

尋晚嗰隻蓮子蓉為咗討好劇肥嘢，竟然生安白造，話阿全嘅死，唔關劇肥嘢事，我梗係唔信佢啦！隻蓮子蓉本來係牆頭草，兩邊擺架啦！今日佢話阿全係失戀跳樓殉情，聽日佢話阿全有愛滋因病厭世都得架啦！如果件事係真嘅，點解當年佢唔講出嚟吖！想我信佢？好難嘞！

其實阿全真係好命苦架，當年阿祖出世嗰陣，佢伯爺都仲喺度，屋企環境點都叫做過得去，食嘅著嘅都唔使愁，但係到咗阿全出世無耐，佢伯爺就死咗，我地幾個孤兒寡婦無依無靠，有好一段日子日日都係白粥麵包當三餐架咋！我仲記得有一次，阿全去同學仔屋企玩，喺人地廚房搵到一罌乾瑤柱，阿祖細個就食得多啦，阿全就真係冇乜點見過，佢第一次食，覺得好好味，偷偷雞將人地成罌乾瑤柱食晒，返到嚟仲唔敢話俾我地聽，一直到半夜三更，佢攬住個肚仔痛到瞟冷汗，我地先送佢去醫院。醫生話佢生食咗太多乾瑤柱，再飲咗啲水，結果啲乾瑤柱吸咗水發漲，”硬”住咗個胃，咪胃痛囉！等夜啲啲乾瑤柱消化晒就冇事架嘞喎！我睇住阿全痛咗成晚，我真係覺得好心痛！

由細到大，我一直都覺得我係欠咗阿全，礙於環境，冇辦法俾最好嘅嘢佢！雖然佢讀書唔夠聰明，做嘢又冇阿祖咁醒目，但係呢啲都冇辦法，佢都唔想架！阿全份人就係太單純，你睇佢點對劇肥嘢就知啦，佢成日以為同人地交咗心，其實佢當人係寶，人地當佢係咸水草咋！成日俾個大嫂恰，俾佢使喚！有事嗰陣居然見死不救！鍾笑荷害死我阿全架，我點都唔會放過佢！

共28個回應

有人問我點解要咁惡？點解係都唔肯俾幾個孫返去同佢阿媽食一餐飯？阿祖同嗰劇肥嘢雖然離咗婚，大家做唔成親戚啫，點解唔可以和平相處？點解要好似仇人咁？我嚟問你，你可唔可以同一條毒蛇同枱食飯？你可唔可以同一個殺人犯分一個麵包？你可唔可以笑住對住一條伏喺你屋企門口、隨時準備一有人行出嚟就大啖噬落去嘅食肉獸講隨便啦、鍾意食乜就食乜喎，唔駛客氣？

鍾笑荷呢個女人心腸歹毒，佢唔單只蝦我個仔，恰我啲孫，仲係害死我個孻仔嘅兇手喎！都過咗十幾年嘞，佢都仲死心不熄，日夜吼住，搵機會想爭返啲嘢，拆散我地屋企！如果你係我，試問你點同佢和平相處呀？我佘君麗話過我永遠都唔會原諒呢個女人！

我仲好記得阿全跳樓自殺嗰一日，我撲到去醫院，喺急症室外面等，我好驚，個心跳得好快，仲好亂，醫生話我唔受得刺激架，但係我己經唔理得咁多，我只係希望阿全唔好有事，到醫生出嚟話阿全救唔返，我個腦登時一片空白，成個人冇晒力，坐咗落地，有一刻我以為我會跟埋阿全去架喇！啲姑娘推阿全出嚟嗰陣，阿全都仲係好似平時咁嘅樣，但係我嗌極佢佢都唔應我，無論我點嗌佢都冇反應嘞！

係嗰劇肥嘢，係佢有心害死阿全架！以前嗰劇肥嘢就已經好鍾意撩我嗌交，我俾燒賣啲孫仔食佢又鬧，同佢地打機佢又鬧！佢明知我心臟有事架嘛，都仲成日同我拗，分明就想激死我！佢梗係宜得我地死啦，我地死咗，成間屋佢霸晒，全屋人都要聽佢話事！好彩阿祖開眼，終於睇清楚劇肥嘢嘅真面目，揀咗阿紅！肥嘢我話你聽呀，你唔駛旨意返嚟爭返啲乜嘢呀，我好命硬架，我會留番條命喺度慢慢同你鬥！

共16個回應