對唔住，我令你擔驚受怕咗四年…

每晚瞓覺嘅時候，你都特登放隻手喺我心口度，因為你想聽住我嘅心跳聲瞓覺…

每次搭車嘅時候，你都會攬得我好實，因為你好珍惜同我一齊嘅時光…

每次手拖住手行街，你都唔敢行得太快，因為你驚住會刺激到我個心臟…

喺呢四年裡面，我俾唔到安全感你，我唔係一個好男友、好老公…

我好想錫你多啲，愛你多啲，但係我驚自己會失驚無神走咗去…

我唔夠膽再玩熄燈遊戲，唔敢再諗「下一下心跳係咪最後一下」，因為我每一下心跳，都牽動著你，連繫著你…

如果俾我揀，我真係希望有心臟病嗰個係你，唔係我…

我希望為你擔驚受怕，都唔希望你再為我擔驚受怕…

我有心臟病，但係一啲都唔痛苦，因為佢要嚟的話，只係剎那間嘅事，但係你所受嘅傷痛，就係一生嘅事…

我好怕死，因為我怕你難過，怕你傷心…

可能因為咁，呢四年嚟我嘅鬥志都好強，我成日話俾自己聽︰「甘永家呀甘永家，你千祈唔好熄燈呀，你一熄燈，就會有人做孤兒寡婦架喇…」

就係咁樣，講吓講吓就講咗四年，講吓講吓就講到脫離咗危險期！

而家，我終於可以舒一口氣，終於可以安心照顧你、愛錫你！

我唔會再要你擔心，我要你無憂無慮過日子！

老婆，我愛你！

共48個回應

萬眾期待！荷媽勝利回朝！！狐狸精慘變孤獨富婆！！六粒黐頭芒守候多年，終於等到歷史性嘅一刻︰jo飽荷媽重修舊好，破鏡重圓！

經過我哋嘅威逼利誘，jo飽喺眾人面前錫咗荷媽一啖，「家好月圓」正正式式家好月圓，以後一家團圓！

今次我哋有番頭家，實在要多謝紅姨，多得佢搞風搞雨，jo飽同荷媽先至患難見真情，重新擦出愛火花！YEAH！多謝紅姨！

唔知大家有冇聽過孔明同周瑜嘅故事呢？

話說三國時期，周瑜好妒忌孔明嘅才華叻過自己，於是諗咗好多毒計想整死孔明，點知佢啲毒計全部被孔明悉穿晒，最後仲被孔明激死咗！

你哋成日聽到嘅「賠了夫人又折兵」，就係嚟自佢兩個嘅故事。

如果周瑜係紅姨，孔明係荷媽，咁紅姨今次就上演咗一幕「賠了丈夫又折兵」，不但止冇咗個老公，仲要嘥晒啲律師費！

如果根據故事嘅發展，周瑜最後應該會被孔明激死。

不過，我諗紅姨好硬淨嘅，佢唔似周瑜，被孔明激三次就死，佢已經被荷媽激過無數次啦，要死一早死咗咯！

共8個回應

嫲嫲走咗…我哋連佢嘅遺願都聽唔到…

點解嫲嫲淨係想見紅姨一個？

嫲嫲咁憎紅姨，冇理由會想見佢架？

我真係百思不得其解…

我只知道，嫲嫲臨去嘅時候，係指住紅姨架！

紅姨一定對嫲嫲做咗啲嘢，如果唔係，嫲嫲唔會剩番最後一口氣都要指住佢！

究竟嫲嫲嘅遺願係乜呀？紅姨，你講啦！

你俾我哋班孫盡番些少孝心啦，我哋剩係想知嫲嫲嘅遺願，想知道佢想我哋做啲乜嘢啫，佢老人家都去咗啦，唔好搞到佢有遺憾咁走得唔得？

如果你肯講，就算將家好月圓俾晒你都無所謂，有乜嘢緊要得過嫲嫲吖？

紅姨，我求求你啦，你講啦，念在咁多年婆媳之情，你講啦！

求求你……

共19個回應

而家已經係深夜，我瞓喺張床度，眼光光望住天花板。個腦一直諗緊家好月圓嘅宣傳大計，想停都停唔到。

既然瞓唔著，我就索性起身打吓blog，打吓自己啲感受啦！

呢排我開始留意自己嘅心跳，我好鍾意feel吓個心點樣跳，卜卜、卜卜、卜卜…我摸一摸心口，感覺到個心一下一下咁跳，佢跳完一下，下一下又好快接住落去…

我經常喺度都諗，會唔會冇咗下一下心跳呢？

呢一下完咗，會唔會從此玩完，冇咗下一下呢？

對我嚟講，冇咗下一下心跳嘅機會係百分之五十，即係有一半機會冇咗下一下…

可能呢一刻嘅心跳就係最後一下，亦都可能跳多十幾下就玩完，又有可能跳多百幾下先至玩完…

我將呢個「等待最後一下心跳」嘅遊戲，命之為熄燈遊戲，因為個原理就好似熄燈一樣，撳一下掣，盞燈就”叮”一聲……熄咗，唔會再有光，唔會再閃吓閃吓，永遠變成黑暗…

熄燈遊戲並唔好玩，因為我次次玩親都輸。

我次次都以為下一下心跳就係最後架喇，點知唔係喎，下一下之後又有下一下，下一下之後又有下幾下，同埋下幾百下，冇一次估得中！

每當我估唔中嘅時候，我都會諗︰「咦！又有一下呀，正！」

而家每一下嘅心跳，對我嚟講都好重要，因為我冇乜幾多下架喇！

共32個回應

阿圓同嘉美結婚嗰晚，我睇住佢哋行婚禮，越睇就越擔心！我好想話俾阿圓聽，嘉美唔係你諗得咁簡單！

佢表面上好似好純品，但係骨子裡好有機心！

佢會喺你背後盤算好多嘢，耍好多手段，目的可能係為咗自己利益，亦有可能係為咗傷害其他人！

總之，同嘉美一齊，就等於玩火！

我好想將嘉美嘅真面目，原原本本，一五一十咁講晒俾阿圓聽，希望佢考慮清楚。

但係，嗰時阿圓咁愛嘉美，佢根本唔會聽我講，而且會覺得我係生安白造，甚至會認為我係因為唔抵得嘉美揀佢唔揀自己，先會講呢啲嘢嚟中傷佢！

所以，我一直都忍住把口，以免傷咗兄弟和氣。

其實，荷媽同我都一樣，好擔心佢哋嘅婚姻。

我都有同佢商量過，究竟應唔應該阻止佢哋呢？

但係荷媽話，條路係阿圓自己揀嘅，我哋唯有尊重佢，同時希望嘉美係真心愛阿圓，唔係玩玩吓！

我都係咁希望，不過我希望多一樣嘢，就係希望荷媽可以幫莎姨教好嘉美！

我諗，嘉美嘅心腸唔係真係咁惡毒，佢只係一個比較有野心，識得耍手段嘅女仔啫，趁佢仲未做過咩壞事之前，教番好佢都仲唻得切架！

希望嘉美有朝一日會識醒啦！

共26個回應

呢個阿圓搞乜鬼架，我哋咁辛苦先own到佢上總經理個位，佢不但止冇大展拳腳，仲對紅姨唯命是從，根本就係幫緊紅姨做嘢！佢辜負咗成家人對佢嘅期望！最離譜嘅係，佢竟然容許紅姨串通面油強，陰乾晒家好月圓啲資金！

阿圓呀，你究竟知唔知嗰個女人喺度做乜架？佢想搶晒jo飽盤生意，一個月餅都唔留俾我哋呀！你仲當佢神咁拜？對佢又敬又畏？有冇搞錯呀！

早知嗰日我就唔推你上去啦，等我仲滿心歡喜，以為打贏咗紅姨，成功將佢拉下台，原來乜都係假！紅姨一早就知道你會企喺佢嗰邊，所以先至咁老定，肯咁”順攤”讓番個位出嚟，其實佢預咗你會聽晒佢話架喇！

點解你要咁做呀？係咪想激死jo飽呀？

經歷咗咁多嘢，點解你仲唔醒呀？仲未睇清楚紅姨係咩人呀？

不如等我提一提你啦，當年紅姨為咗拉攏你，為咗要你死心塌地對佢，不惜將自己冇咗個胎單嘢卸咗落你度，”質”你食咗十幾年死貓，累你白白內疚咗十幾年呀，唔通你唔記得晒咩？一個咁自私嘅女人，你敬佢乜嘢呀，你畏佢啲乜嘢呀？

阿圓，阿哥希望你諗清諗楚，唔好俾人利用，唔好認賊作母呀！

共14個回應

本來，我以為嘉美真係知錯，我諗住俾多次機會佢，俾多次機會大家…我仲同嘉美諗咗好多理由︰佢之所以變成咁，都係因為莎姨啫！以前嘅莎姨，講大話唔駛貶眼，又鍾意攞威攞著數，嘉美由細到大見到莎姨咁，咪有樣學樣囉，覺得講大話都唔係咩一回事，最緊要係自己嘅利益啫…

根本就唔關嘉美事嘅，佢本質唔壞架，只要俾啲時間同耐性，佢一定可以重新做人，變番一個純純品品嘅嘉美架！

原來呢啲全部都係藉口，嘉美根本就係處心積慮，搵個爛仔Jimmy，做幾場大龍鳳，呃呃氹氹咁想氹我原諒番佢…

弊就弊在我真係對佢仲有feel呢！

嗰日喺醫院，佢錫咗我一啖，嗰一剎那我真係控制唔到自己！

我同自己講，唔好咁衝動，呢個人試過三番四次冤枉阿月架！

雖然我個腦識得咁諗，但係我個心一早就飛咗去嘉美到！

直到嘉美同我講分手，我先至發覺，原來我係咁天真！

以為自己真係可以改變嘉美，以為我哋真係可以抺晒所有嘢，重新嚟過…

甘永家，你真係一個不折不扣既戇-居-仔呀！

共45個回應

同志們，革命終於成功喇！家好月圓光復喇！我們一家重見光明！

紅姨霸咗家好月圓咁耐，而家終於都要下台，俾阿圓執掌大權！

以表叔恭為首嘅牛鬼蛇神，因為失去咗個大靠山，將會改邪歸正，重新做人！

新任嘅圓總經理，雖然年紀輕輕，但係志向不小。

佢有一個遠大嘅抱負，就係將家好月圓嘅月餅變成香港人嘅手信，等全世界有華人嘅地方都可以買到家好月圓嘅餅！

我哋齊齊預祝佢計劃成功！

今次逼宮行動咁成功，全賴我哋六粒黐頭芒團結一心，共抗外敵！

我們不怕紅姨嘅威逼利誘，不怕表叔恭嘅煽風點火，上下一心同佢哋撐到”行”，當然取得空前嘅成功！

不過，今次嘅行動，原來背後有兩個策劃人，一個係jo飽，一個係嫲嫲。

佢哋不惜虛報身體狀況，煽動我哋向紅姨逼宮，借大家嘅手嚟達到目的！

佢哋咁樣嘅行為絕對需要譴責，好啦，一於禁止佢哋再理家好月圓嘅任何事務，強制佢哋享受兒孫福，以後”他他調調”過埋下半世！

共16個回應

我份人真係好自私，竟然為咗維護自己女朋友，睇住阿月俾人冤枉都唔出聲！我知架，我一早就知架喇，嘉美佢一直都講大話呃我，佢真係有個仔叫Ronald！

有個仔咁又點啫，細個嘅時候一時糊塗做錯事，好多人都會架啦，我真係唔會介意架！

但係點解要呃我啫？點解要設局屈阿月啫？點解要夾埋全家搞大龍鳳啫？

點解你嘅心腸咁壞架？點解你為求目的可以不擇手段架？

本來我諗住自己呃自己，當我一直誤會咗你，等件事不了了之。

我真係諗住唔再理、唔再諗呢件事，當你係一個冇機心，只有上進心嘅小女孩。

點解你仲要得寸進尺，害完阿月一次又一次？！

我個心好痛呀，我好唔捨得呀！

我喺度諗，點解個天安排一個咁有feel嘅女仔俾我，但同時佢又咁有城府，咁攻於心計？

我以前嘅女朋友，都唔會好似嘉美咁啱傾，咁投契。

同佢一齊真係好舒服，好輕鬆，大家相處得完全冇壓力，唔駛專登搵話題傾，唔駛絞盡腦汁去氹佢開心，兩個人自自然然就好enjoy，好明白對方感受。

咁難得同一個女仔咁合key，而家要我「大義滅愛」，我真係好傷！

不過，我就算幾傷都好，點都唔會再俾嘉美傷害阿月！

我唔可以再睇住阿月受委屈，唔可以為咗自己開心，就犧牲阿月！

阿月，對唔住，阿哥以後都唔會咁自私架喇！

共61個回應

個塊銷魂面真係夠晒毒呀！逼jo飽搞結婚週年紀念都不特止，仲要請埋荷媽去，再用餅舖嘅利益逼晒班兄弟姊妹去，果然夠陰毒！

佢想攞威嘛！佢見jo飽成日走去荷媽屋企食飯，見到我哋一家團聚，於是咪搞咁大壇嘢嚟攞威囉！佢要同全世界講，我殷紅先至係甘泰祖嘅老婆，係家好月圓慶中秋嘅阿媽，我哋全家人都兄友弟恭、父慈子孝，一家樂也融融！

Sorry喎！我哋真係一家樂也融融，不過冇佢份喎！

我哋一家人，只有甘泰祖一個阿爸，亦都只有鍾少荷一個阿媽！

殷紅算係邊個呀，一隻狐狸精咋，想升做元配夫人呀，發夢啦！

就算俾你逼到荷媽嚟嘞，俾你逼到我哋幾兄弟姊妹嚟嘞，so what？

我哋心入面只有jo飽同荷媽，絕對冇殷紅嘅存在，我哋當呢個係甘泰祖同鍾少荷嘅結婚週年紀念，我哋只會祝福佢哋兩個永遠幸福快樂！

本來我都唔明白jo飽點解咁渣，塊銷魂講乜就乜，叫佢請埋荷媽去飲，佢又真係跟住做，一啲反抗都冇。

不過荷媽解釋過之後，我開始明白jo飽嘅苦心！

家好月圓係jo飽艱苦經營嘅成果，佢付出過不少血汗先至有今日嘅成績。

而家佢慢慢老嘞，自然想將佢嘅產業留俾班仔女。我哋成日話唔要唔恨，其實係辜負咗jo飽嘅一番心意！

所以，家好月圓我就要硬架喇，第時幾歹都同嗰個女人鬥搶呀！

共60個回應