最近，開始同嘉美越嚟越熟，大家越嚟越交心，佢將佢以前唔開心嘅經歷講我知，我亦都將自己嘅往事講佢知，我哋兩個完全唔會防範對方，好安心咁將各自嘅秘密都講出嚟，嗰種感覺真係好舒服！原來嘉美細個嘅時候，有好多唔開心嘅經歷。

因為佢父母冇乜點理佢，搞到佢識埋啲唔三唔四嘅朋友，做咗啲令佢後悔一世嘅事，到而家佢都仲係耿耿於懷，放唔開呢個心結！

其實，每個人都有佢嘅過去，無論係好定壞，都唔駛咁執著，最緊要係現在同埋將來。

以前，我做過揸沽，又做過揸兜，搞到身邊嘅屋企人好傷心。

但係而家，我揸住勤力嘅宗旨做人，搞好揸勤，人生不知幾有方向，幾有目標！

所以話呢，只要肯改過，大家都唔會著意你嘅過去，知道嘛，嘉美？我總支持你呀！

不過，如果有啲人死性不改，利用別人嘅同情心，繼續攞威攞彩攞著數嘅話，大家一定唔會再俾機會佢，而且會狠下心腸，同佢斷絕任何關係！

共28個回應

我哋終於都整好嗰個三十三吋嘅大月餅喇！開頭都唔明白點解jo飽會咁堅持，就算衰完一次又一次，仍然繼續整落去。

我以為佢係鬥氣，要向我哋證明自己係寶刀未老，依然係一個造餅技術高超嘅大師傅。

後來阿慶講番細個嘅事，先知原來jo飽應承過造呢個大餅俾我哋。

今次造呢個大月餅，令到jo飽、荷媽、同我哋幾兄弟姊妹一齊合作，去完成一件事，查實都幾有意義架！

個意義唔係喺舊餅本身，而係一家人合作造餅嘅過程。

雖然我唔係好識搓餅，整到啲麵粉散晒，但係我都有幫手執頭執尾架。

同埋最緊要嘅係，我企埋一邊同佢哋打氣，令到全家人士氣高漲，個士氣一漲呢，做乜都事半功倍啦，所以你都咪話我幫唔到手呀！

Jo飽，你就威啦，經此一役，證明你寶刀未老，下次整個四十吋嘅都仲得呀！

最開心嘅係，當我哋造完個月餅之後，Kelvin竟然攞住紥花，趁大家傾到興高采烈之際，含情脈脈咁向阿慶求婚！

阿慶個傻妹，喺毫無防備嘅情況底下，俾Kelvin嘅甜言蜜語征服咗，甜絲絲咁點點頭，火速答應咗Kelvin嘅求婚！

咁又啱嘅，連Kelvin媽媽都答應俾佢哋一齊咯，拉埋都應該係遲早嘅事嚟嘅。

阿慶，大佬卡祝你同Kelvin一世幸福！

共18個回應

「咪見佢以索呀索自稱，佢雙腳一踢就最心驚，更有一招反手都無得剩，莎姨中招無訂糴…」

估唔到唐山大兄搖身一變，變成「索呀索呀」！

唔單止索呀，而且又talk得，又跳得，簡正係「玩眉」呀！

嘉美喺葡萄牙啱啱番嚟，要俾啲時間適應香港嘅生活，所以我已經約咗佢，由我呢個導遊帶佢遊覽吓香港，等佢感受吓大都市嘅繁榮氣息！

我冇乜嘢企圖架，只係見嘉美嘅童年同自己同病相憐，忍唔住特別關心吓佢啫！

大家話晒一場cousin，好應該互相照顧吓嘅，更何況，佢有一個好似莎姨咁嘅阿媽，都可以話係十世積落嚟嘅冤孽，所以我哋更加應該保護佢、take care吓佢啦！

其實嘉美都幾悲慘架，十六歲嗰年，一放咗學就見到一個男人匿埋喺花糟，一個女人匿埋喺衣櫃，一個係阿媽嘅情夫，一個就係阿爸嘅情人，俾著我都唔知點面對咁樣嘅父母！

所以呢，嘉美真係好缺乏家庭溫暖架，我哋屋企好應該俾多啲溫暖佢架！

* * * * * * * * * * * * * * * * * * * * * * * *

嗰個阿月吖，呢排都唔知佢搞乜，叫佢做親嘢都黑口黑面，平時唔係咁架嘛，好積極格，真係唔明阿月搞乜鬼！

佢係咪見到我哋呢排淨係顧住嘉美，冇乜點理佢，所以呷醋呀？

唉…啲女人真係！

共75個回應

喺我十六歲嗰年，jo飽同荷媽離婚，頭家散晒，六兄弟姊妹要分開，我、阿圓、阿中要同jo飽一齊住，阿好、阿月同阿慶就留喺荷媽身邊。本來我都可以同荷媽一齊，不過荷媽叫我同jo飽一齊住，佢話咁樣可以睇住兩個細佬。我好記得，我跟jo飽返新屋嘅第一晚，阿好唔見咗，兩個細妹唔見咗，荷媽唔見咗，原本嘅屋企唔見咗…

我呆呆咁望住部電視，根本就冇心機睇…

嗰時，我淨係想將注意力集中喺電視上面，因為我唔想諗其他嘢，我唔想望到間新屋，我唔想望到嗰個女人，我唔想接受荷媽唔喺間屋度…

我睇吓睇吓，唔經唔覺睇咗好耐。Jo飽同我講，「阿卡，唔好睇電視喇，早啲瞓啦！我同你阿媽都要返房瞓喇！」然後佢就同紅姨返咗入房。

我聽完之後即刻打咗個冷震，我好驚，點解一切一切嚟得咁突然，點解所有嘢都好似冇發生過，jo飽可以若無其事咁瞓覺，紅姨可以對住我哋笑笑口，嫲嫲可以好理所當然咁叫紅姨做新抱…

究竟發生緊乜嘢事呀？點解一切都嚟得咁理所當然？點解個個人都可以咁若無其事？

我唔見咗個屋企呀，我唔見咗個阿媽呀，唔見咗一個細佬、兩個細妹呀！

由嗰時開始，我好憎jo飽，好憎佢滿不在乎嗰個樣，好憎佢理直氣壯嗰個樣…

佢點可以叫嗰個女人做我哋阿媽呀？仲要叫得咁自然，叫得咁順口…

嗰陣時，佢唔明白呢件事對我哋有幾大傷害…

但係而家，佢終於醒喇！我等咗你醒，等咗十幾年喇！

共36個回應

呢個秘密我收埋咗十幾年喇，我以為我呢世都唔會講出嚟，我以為我會慢慢忘記咗呢件事，但係我今日終於忍唔住講出嚟喇！喺我十七歲嗰年，我親耳聽到紅姨吩咐表叔恭，將紅姨小產嘅原因賴落去阿圓度！我當其時仲細，而且喺屋企冇乜影響力，所以我唔敢講出嚟。

而且，就算我講出嚟，嗰個女人啲手段咁叻，jo飽同嫲嫲一定唔信我而信晒紅姨，到時候我喺屋企就完全冇立足之地，分分鐘會俾紅姨趕走。佢只要求其搵個藉口，jo飽就會聽晒佢話，將我送去英國又好，送去美國又好，總之係有咁遠送咁遠。所以，我為咗自保，就算明知阿圓食咗隻咁大嘅死貓，我都隻眼開隻眼閉，當我乜都冇聽過。

我知我咁做係有負荷媽所託，不單止冇好好照顧兩個細佬，仲要阿圓以為自己累到紅姨小產，內疚咗十幾年，認賊作母十幾年。

我呢個做阿哥嘅真係好自私！為咗自己盤生意，夾硬向一個拆散我哋頭家嘅陰毒女人靠攏，我真係覺得自己好cheap呀！

由今日開始，就算我要乞食，就算揸勤真係變揸兜，我都唔會向嗰個女人搖尾乞憐！我甘永家，講得出，做得到！

阿圓，我知道要你接受呢個真相係好殘忍，不過，你要搞清楚邊個先至係我哋阿媽，邊個係對我哋真心，係無條件付出，仲有邊個對我哋係假意，當我哋係棋子。阿圓，無論你點諗，阿哥只係想同你講一句︰「對唔住！」

共81個回應

好頭痕呀！好頭痕呀！自從成立咗揸勤之後，只係得第一個function叫做比較成功，打響個頭炮，跟住就事事唔順利！

而家公司每個月出糧都要成四十萬，仲未計其他燈油火蠟。

而且單單生意都臨尾撻Q，唔係呢個”吞”軚，就係嗰個縮沙，好似有心玩我咁！

嗰隻”易拉柴”究竟幾時拉柴呀？仲要jer住揸勤jer到幾時呀？

佢根本就係以本傷人，同我哋鬥搶客仔、鬥搶姐仔，係都唔俾揸勤發圍！

嗰隻”易拉柴”之所以咁樣做，無非都係嬲我”挖”咗佢公司三分一人過嚟揸勤啫，而家佢成功報仇啦，日日喺度暗暗咀笑添呀！

再咁搞法，揸勤遲早變揸兜呀！

到時我又多咗個花名嘞，由揸沽變揸勤，再由揸勤變揸兜！

都幾有pattern吖！

唉…而家唔諗得咁多架喇，過得一日得一日啦，話唔埋聽日會有轉機呢，話唔埋聽日就搵到個大客，俾成幾千萬我哋賺呢，有時啲嘢話唔埋嘅，柳暗花明又一村嘛！

好！一於大被冚過頭，一覺瞓醒先算！

共34個回應

嘩！今日好似打完仗咁呀！話說小弟新開嘅PR公司–揸勤，承蒙大型月餅連鎖店「家好月圓」嘅信任與支持，喺某大商場舉行咗本公司第一個大型宣傳活動，並取得空前嘅成功！

【掌聲鼓勵：(((((((((((( 手手 ))))))))))))】

沉醉還沉醉，今日嘅function其實險過剃頭。本來約咗三十八對新人嚟，等大家一齊見證佢哋嘅婚禮，點知啲新人臨時甩底，走晒去拉姐個fuction！

班新人真係毫無口齒，仲學人結婚喎。不過話時話，「新人走得快，一定有古怪」，十成十有人喺背後搞鬼啦！

好彩，我哋成家都唔係浪得虛名嘅，尤其是jo飽同荷媽呀，佢哋有咩風浪未見過吖，小小難關點會難到佢哋呢？今次全靠佢哋，喺台上面帶起個氣氛，個function先至搞得成。

仲有管家仔、阿月、阿慶佢哋，幫手搵啲新人嚟撐住個場，同埋公公呀，搵咗對人瑞夫婦嚟，真係唔該晒佢哋！

今日function嘅主題，就係希望家家戶戶都甜甜蜜蜜，當然唔少得嘅，就係我，阿家嘅家都甜甜蜜蜜，實行「家家甜蜜蜜」！

共36個回應

我搬走，係為咗避開嗰個女人，因為我已經忍夠佢，唔想再同佢住埋同一間屋！但係，亦都係因為我霎時間要搬走，激到嫲嫲絕食，差啲有生命危險！

究竟我係咪做錯咗？

我咁大個人，有權選擇住喺邊度，有權選擇同咩人相處。

我剩係唔想再同嗰個女人朝見口，晚見面啫，又冇話以後都唔返去食飯，點解唔可以俾啲自由我呢？

毫無疑問，嫲嫲真係好係錫我哋，但係佢用錯咗方法。

好似中仔咁，佢住喺嗰度根本就唔開心，點解要逼佢留低呢？

阿好同荷媽一齊住咗咁耐，都要逼住返去，搞到交換人質咁，何必呢？

嫲嫲年紀咁大，又有咁多朋友跟身，我哋班孫仔就吓佢都好應該，但係佢太過執著，硬係要所有人都陪住佢，一逆佢意就絕食抗議，最後搞到大家都唔開心，流咗好多眼淚…嫲嫲，我哋唔係唔緊張你，唔係唔孝義你，只係我哋已經大個仔、大個女喇，唔可以好似細細個咁，成日都黐住你架喇。我哋各自都有自己嘅生活，有自己嘅事業，你可唔可以體諒我哋，考慮多啲我哋嘅感受，就當換個方式同班孫仔相處囉，好唔好？

共40個回應

臨瞓之前，摸到手臂上嘅牙印，個傷口仲係隱隱作痛…不過，就算個傷口幾痛，都唔夠今次慘痛，我足足爭落六十萬孖展數呀！

雖然我喺阿月面前扮到好淡定咁，但係而家連份工都冇埋，我真係唔知點還。

我唔想問jo飽借，因為問佢借即係等於問紅姨借，我又唔想問荷媽借，俾佢知道我炒股票輸咗咁大筆錢，一定會令佢好傷心，我唔想再激嬲荷媽喇。

之前就係因為唔聽佢講，迷頭迷腦咁迷咗落股票度，仲要以為自己係股神，好叻炒股票，覺得荷媽唔明白呢啲「正常」嘅投資，結果搞到而家咁…

唉！搞到今日咁都係我自己攞嚟…

唉！我做無間道已經失晒職，而家仲搞單咁”結”嘅嘢出嚟，荷媽一定對我好失望…就連我都對自己好失望…究竟我點解會變成揸沽架？

而家我得番阿月咋，係得佢可以同我並肩作戰。

阿月呀，你咬到我好痛呀，不過如果我再有下次呢，你就咬埋我另一隻手臂啦！再唔係就咬埋塊面啦，咬到我口腫面腫咁款，等其他人完全唔認得我，到時就實可以重新做人啦！

好！聽日開始要落力啲搵工，等我唱番支歌仔勉勵吓自己先︰

「我要努力向上，不枉諸君寄望，我要努力向上…」

今次我真係下定決心戒股架喇！

共52個回應

預咗架啦，一早就預咗紅姨唔會俾我番餅舖架啦，佢點會咁順攤呀！喺佢眼中，我係搞事份子，成間屋嘅人冇一個會反佢，連阿圓阿中都當正佢係阿媽，係得我同佢句句頂到行，係得我到而家都仲同佢搞對抗！

梗係啦，我嘅角色係無間道吖嘛，點會咁容易俾佢拉攏呀？

所以，紅姨由細到大都睇我唔順眼架啦！佢恨不得趕走我添啦！

你哋諗吓，佢點會俾我番家好月圓幫手吖？佢點會捉隻老鼠入米缸咁笨吖？

Jo飽仲以為佢好大方，真係唔介意我入家好月圓，其實佢喺度不斷諗計保住佢間餅舖，唔俾任何人搶走佢嘅產業！

不過，紅姨份人都幾聰明吖，佢唔會直接阻止我入餅舖，但係就兜個圈嚟試我，要我知難而退！

佢明知我唔會屈就喺鰂魚涌間分舖度做，所以先故意叫我去嗰度做啫！

而且佢仲識得扮偉大，講到自己幾為我好，幾努力做後底乸，幾咁想栽培我成材，其實只係為咗應付嫲嫲同jo飽，等全世界都俾佢嘅「大仁大義」感動！

如果有朝一日，佢又用呢啲假仁假義嘅說話，想感動我、拉攏我，我就會以我無間道嘅身份同佢講：

「對唔住，我係荷媽個仔！」

共42個回應