有好多嘢，真係估都估唔到。

雖然我一直都覺得嫲嫲嘅死唔係咁簡單，佢冇理由會無端端返大屋，佢嘅死一定同紅姨有關。但係我我估到估唔到原來係紅姨會親手推嫲嫲落樓咁變態，我諗住最多都係兩個人爭執，拉拉扯扯嘅時候，嫲嫲自己差錯腳。

第二樣估唔到嘅係嘉美竟然會突然企番喺正義呢邊。佢之前好似好崇拜紅姨咁，當正佢做偶像，而且佢之前呃完阿卡呃阿圓，屈完阿月屈荷媽，做嘅嘢俾莎姨仲要衰十倍，我哋成家人都唔相信佢會有救。點知佢竟然會爆晒紅姨啲衰嘢出嚟，我諗佢係真心改過架，見到佢同莎姨好番，我都好安樂，我都希望阿圓會接受番佢。

第三樣估唔到嘅係于素秋個心。我原本以為阿秋因為我質問佢而嬲咗我，所以揀咗至信，但係原來佢兩個係夾埋架，佢哋根本乜嘢都冇，只係做場戲嚟呃紅姨，希望將原本屬於JO飽嘅嘢俾番JO鮑。于素秋為咗我哋一家人竟然做咁大場大龍鳳，仲要連自己媽咪都呃埋，佢真係為我哋犧牲咗好多。不過佢嘅犧牲係唔會白廢架，因為我會用我下半世一千倍一萬倍咁還番俾佢，我一定會對佢非常非常之好。我愛你呀，于素秋！

共92個回應

于素秋，我知道我唔應該懷疑你，但係我真係好希望你能夠諒解我嘅心情，嫲嫲對我嚟講係一個好重要嘅人，佢突然之間死咗，對我嘅打撃真係好大，而且佢仲係不明不白咁死，所以我先會對你語氣咁重，叫你將個真相話我知。我知道我講嘅嘢令你好難受，但係我真係冇心架，我唔係想傷害你架，我只係一時衝動架咋。

我知道我而家講乜嘢都唔會有用，有啲嘢做錯咗就係做錯咗，我的確係懷疑過你，我係一個唔合格嘅男朋友，你嬲我係應該架。相比之下，至信可能真係好我好多，論背景，佢只有一個人，簡簡單單，而我哋兩家人就搞到水火不容咁；論身份，你兩個都係醫生，而我只係個整餅仔，佢同你合襯好多；論對你嘅態度，佢之前的確係令到你好辛苦，但係而家就變成我令你好辛苦，我諗我同佢應該都係差唔多。如果係呢三方面評分，我真係比唔上佢。不過講真心，我由細細個就開始鍾意你，我到而家都係咁鍾意你，呢份心情係唔會變架！而且我哋咁艱難先可以喺埋一齊，我唔會咁輕易放棄你架！可能我好多嘢都唔及得佢，但係我會對你更加好，去彌補我比唔上去嘅地方。

于素秋，等你喺雲南返嚟，我會證明俾你睇，你揀我係冇揀錯架。

共25個回應

本來喺呢個時候，我唔應該掛住打blog，但係我已經冇晒辦法，可以搵嘅地方我已經搵晒，我真係諗唔到嫲嫲會去咗邊。一個人嘅力量係有限嘅，雖然我屋企有咁多個人，但係要搵勻全香港所有地方根本就冇可能，所以我希望透過全港網民嘅力量，一齊幫手搵我嫲嫲。

講咗咁多嘢，我都未講到底發生乜嘢事，其實係咁架，今日我去醫院探嫲嫲嘅時候，竟然唔見佢喺房，我問個護士佢去咗邊，護士話可能落咗canteen，於是我落去canteen搵，但係連人影都冇，我搵晒成間醫院架嘞，都係搵唔到嫲嫲。我哋而家發散晒人手去搵嫲嫲，阿月同阿慶留喺醫院，睇吓會唔會有乜嘢暗角位睇漏咗，公公年紀大，唔方便騰嚟騰去，所以叫佢返屋企先，睇吓嫲嫲會唔會返去，我同其他人就喺附近搵。我頭先搵咗好耐嘞，都係搵唔到嫲嫲，而家搭緊的士去我平時成日去嗰個公園仔，睇吓嫲嫲會唔會喺嗰度。

我真係好擔心嫲嫲呀，佢身體咁差，萬一喺條街出事點算呀？我咁搵法都唔知要搵幾耐先會搵到佢，所以我用電話send email update呢個blog，希望大家睇完呢篇嘢之後可以幫吓手，留意吓你周圍會唔會有一個七八十歲咁上下，肥肥地，好富泰，戴眼鏡嘅老人家。如果你見到一個咁嘅老人家，麻煩你即刻打電話通知我吖，我嘅電話係XXXX XXXX。

共57個回應

同于素秋食飯嘅時候，唔知點解，硬係覺得有啲唔聚財，好似有人裝裝吓咁。我以為係自己多心，但係原來我哋真係俾人跟蹤，而嗰個人就係于素秋嘅阿爸！于素秋話佢冇諗過認番阿爸，因為呢個男人當年傷害咗佢同佢媽咪。我好理解于素秋嘅心情，JO飽當年做嘅嘢同強哥冇乜分別，但係JO鮑始終係我阿爸，唔通我要嬲佢一世咩？我覺得于素秋都應該同佢阿爸和解，大家始終係一家人嚟架嘛，就算佢做錯過乜嘢，血緣都係改唔到架。

於是，我瞞住于素秋，偷偷地跟蹤強哥，希望可以說服佢為于素秋做啲嘢，等佢兩個可以好番。強哥見到我好嬲，再一次叫我唔好搞住于素秋，我就同佢講如果佢係真心對個女好，唔應該理佢同乜嘢人做朋友，應該諗吓點樣補償自己當日嘅錯。強哥聽完更加激動，仲即刻慣低咗，佢雖然大大隻隻，但係原來佢係有病架。

如果強哥入咗醫院個女都唔理佢，佢就真係好陰功。我知道有樣嘢于素秋一直都好介意，當年強哥應承過整隻走馬燈俾于素秋，但係未整完就同第二個女人走咗。我諗如果強哥肯覆行當年嘅承諾，于素秋應該會原諒佢。不過強哥而家咁樣，要佢一個人做掂隻走馬燈真係有啲勉強，唯有等我出動啦！大家唔好以為我淨係識整餅呀，其實我整其他嘢都好叻架！哎呀！唔小心拮穿咗塊布……一隻手打字一隻手整燈真係唔OK，都係打到呢度，專心整埋隻燈先，希望今晚可以整得完啦！

共44個回應

除咗于素秋要交一份心情報告俾我之外，我自己都想交一份俾我自己，我都想將我對于素秋既感覺評分。我應承過自己，唔會因為Dr Ling走咗而乘虛而入，我會等到于素秋交一份100分既心情報告俾我，等佢完全忘記咗Dr Ling，我先會去諗我同佢…今日開始，我要密切監察住自己既感覺，唔可以俾自己有太多對于素秋既幻想！

今日我俾我自己20分，因為我諗起好多以前同于素秋既片段，亦有諗到將來同佢既畫面。我記得我細個嗰時，試過執地下既汔水蓋，送俾于素秋同佢求婚，佢珍而重之咁收起個汔水蓋，結果惹晒蟻，佢阿媽幫佢揼咗，佢因為咁喊咗幾晚，我就應承佢，第時大個會買一隻有好大好大粒鑽石既戒指送俾佢，點知佢話唔駛，只要係我送既戒指，就算只係好簡單一個鐵圈，佢都會好開心；我又記得，佢話第時大個要同我影結婚相，我就拎咗張白色枱布俾佢扮婚紗！琴日我發夢，夢見大咗既于素秋，著住嗰件用枱布做既婚紗，同我一齊行入教堂…

太多太多既于素秋喺我腦入面出現喇，所以我只可以俾自己20分！

係呀，我要去敷熱雞蛋喇，今日俾于素秋阿爸打，而家塊面仲腫緊！不過我一定唔會話俾于素秋知，我唔想佢阿爸喺佢心入面，連僅有既分數都冇埋！而且我諗起佢可能有機會係我未來外父…唉，我又亂諗喇！再扣5分！

共53個回應

今日呢篇blog，唔係寫俾于素秋既，係寫俾一個好殘忍既男人！點解你要咁樣傷害于素秋？你應承過我，已經放低咗你之前個女朋友，你好堅決要同于素秋喺埋一齊架！點解？點解你要粒聲唔出咁走咗去？點解于素秋咁好，你都要揼低佢？點解你要同番你以前個女朋友一齊？而家于素秋心入面，一定比我多一千個問號。但係我最想問既，係究竟你有冇真心愛過佢？如果真正愛一個人，係唔會想佢傷心難過，唔會想見到佢流眼淚架！我喺機場見到于素秋嗰個心痛無助既表情，仲有佢不停流出嚟既眼淚，你知唔知道，你帶俾佢呢個傷痕係一世架？

你send俾我個短訊，話呢個係你最後既決定，你要真真正正咁離開于素秋…你叫我應承你，唔好同于素秋講，只有咁樣先至係對佢最好…點解？你咁講係咩意思？點解你唔俾一個交代于素秋？點解要無聲無息咁喺佢生命入面消失？

我知道我可能好傻，換咗其他人係我，都可能想你走，因為你走咗，我先有機會同于素秋一齊…但係當我見到于素秋既眼淚，我就好唔想你走，我真心想你留低，想你愛錫佢，想你一直同佢一齊，一世都令佢幸福…

凌至信，你返嚟啦！

共96個回應

 ……………

好攰…已經冇力…再去講太多…電台播既歌…全部都好似講緊我…

圍繞身邊已六百天 你喜歡過我六十秒嗎 還期望知道這段相處裡 被我暗戀得快樂嗎 也許總有他人懂得愛惜我 然後往後多年愛若是結果 你與他會攜手衷心慶祝我 無奈只是好朋友 別吻我 想想天的一邊 亦有個某某 在等候 一心只等葡萄熟透 嚐杯酒 希望他是真的比我還要愛你 我才會逼自己離開 知己不會隨便分手 只會隨便的享有 特權密友 拖不到手 也會幫手 和你 遠或近仍像終身情人 告別了也共你同渡餘生 往事遠 記憶近 我仍然未死心難甘心 遙望你被人熱吻 這世上除了我 誰能愛你 除了共你 可與誰熱吻 做對普通朋友 心不對口 何用特別親密 製造煩憂 若一點隱秘也沒有　連輕輕親吻也內疚 沒法看破這心理上關口

于素秋，你記唔記得我同你細個既時候，最鍾意聽邊首歌呀？

係張學友既《每天愛你多一些》…不過我諗，你已經唔記得咗喇…

共57個回應

于素秋，唔知由幾時開始，我呢個blog好似變咗一個同你講嘢既地方，有好多說話，我對住你既時候冇辦法講出口，但係喺呢度，我就可以抖啖大氣，然後通通打晒出嚟。特別係今晚，我真係有好多嘢想同你講…我知道嫲嫲入你房偷你啲錄音帶係好錯，但係錯有錯著，係佢令我知道咗一個秘密。係佢解開咗一個困擾咗我好耐既心結。我喺心入目，偷偷地同嫲嫲講咗一聲多謝。

自從你喺英國返番嚟香港之後，我曾經直覺你鍾意番我，不過呢個念頭好快就打消咗，因為當我送個蛋糕俾你，你覆番話當我係哥哥既時候，我就好肯定自己，之前既感覺係一場美麗既誤會。但係，嫲嫲俾我既錄音帶，令我知道，原來之前你真係鍾意過我！你知唔知對我嚟講係幾震撼，我既心情又有幾複雜呀？一方面我好開心我既直覺原來冇錯，但係另一方面我又好失落，既然你鍾意過我，點解你收到我個蛋糕之後，會俾一個咁既回覆？當然，我心入面好快就有答案，因為喺我地既世界入面，出現咗一個我估唔到既人…但係我又不斷喺度諗，如果我喺你對我感覺最強既時候送個蛋糕俾你，或者早一個月，又或者早一個禮拜，一切係咪就會改寫？如果而家同你一齊既係我，你就唔駛承受做第三者既痛苦，唔駛好似頭先咁，為咗我，要當眾承認自己係第三者！

不過如果我真係同咗你一齊，你一樣會好痛苦，一樣會承受好大既壓力，因為你媽咪一定會用盡方法拆散我地…

共53個回應

于素秋，我一直以為自己好了解你。原來我錯晒。嗰晚同阿慶同Kelvin一齊食肥牛粉絲煲既時候，我見到你笑得好開心，嗰一刻我真係以為，你己經忘記咗Dr. Ling，忘記咗同佢既感情，重新做一個開心既于素秋。到我車你走既時候，你收到個電話，我聽住你講電話既語氣，望住你講電話既神色，我就知道，原來我未夠了解你。

你最後都係選擇同番Dr Ling一齊。

我知道忘記一個人好難，我真係知道架，我自己咪一樣忘記唔到同你既感情？但係如果明知嗰個係錯既人，點解你仲要同佢一齊，行一條錯既路？有時我會妒忌Dr.Ling，因為佢有本事令你唔理對錯，唔理其他人既目光，都要同佢一齊。

我知道自己只係扮演一個哥哥既角色，但係我真係好難過，特別係當你同我講，叫我唔需要再借時間俾你既時候…于素秋，我真係諗唔到，如果我啲時間唔借俾你，仲可以借俾邊個？我真係想將我一世既時間，都借晒俾你…

共87個回應

于素秋，你記唔記得呀？細細個既時候，我成日睇啲魔術書，學咗一啲小玩意就懶醒咁表演俾你睇，氹你歡心。但係你好聰明，一定好快就識穿我，嗰時我咪應承過你，我要努力學好魔術，直至變到一個你一世都識穿唔到既魔術俾你睇為止既？我仲話，第時我變咗大魔術師，一定會變一啲你好想要既嘢出嚟俾你，或者隨時隨地，變自己出嚟氹你開心…

但係對唔住呀，我冇兌現到我既承諾，當你過咗去英國讀書之後，我就冇再學魔術，可能係因為你走咗，我覺得好似冇咗動力咁。而家我真係好後悔，如果我仲識魔術，嗰日喺餐廳，我地撞到Dr Ling同佢女朋友既時候，我就可以即刻將佢地兩個變走，或者將我同你變走…好傻呀呵？但係我真係好想變走晒你既痛苦，變走晒你既眼淚…

變番嗰個成日笑，一啲煩惱都冇既于素秋出嚟…

共85個回應