http://blog.tvb.com/moonlight07 管家孝言 Sun, 21 Sep 2008 14:30:35 +0000 http://backend.userland.com/rss092 en 有好多嘢，真係估都估唔到。 雖然我一直都覺得嫲嫲嘅死唔係咁簡單，佢冇理由會無端端返大屋，佢嘅死一定同紅姨有關。但係我我估到估唔到原來係紅姨會親手推嫲嫲落樓咁變態，我諗住最多都係兩個人爭執，拉拉扯扯嘅時候，嫲嫲自己差錯腳。 第二樣估唔到嘅係嘉美竟然會突然企番喺正義呢邊。佢之前好似好崇拜紅姨咁，當正佢做偶像，而且佢之前呃完阿卡呃阿圓，屈完阿月屈荷媽，做嘅嘢俾莎姨仲要衰十倍，我哋成家人都唔相信佢會有救。點知佢竟然會爆晒紅姨啲衰嘢出嚟，我諗佢係真心改過架，見到佢同莎姨好番，我都好安樂，我都希望阿圓會接受番佢。 第三樣估唔到嘅係于素秋個心。我原本以為阿秋因為我質問佢而嬲咗我，所以揀咗至信，但係原來佢兩個係夾埋架，佢哋根本乜嘢都冇，只係做場戲嚟呃紅姨，希望將原本屬於JO飽嘅嘢俾番JO鮑。于素秋為咗我哋一家人竟然做咁大場大龍鳳，仲要連自己媽咪都呃埋，佢真係為我哋犧牲咗好多。不過佢嘅犧牲係唔會白廢架，因為我會用我下半世一千倍一萬倍咁還番俾佢，我一定會對佢非常非常之好。我愛你呀，于素秋！ http://blog.tvb.com/moonlight07/2008/09/21/%e7%9c%9f%e7%9b%b8%e5%a4%a7%e7%99%bd/ 于素秋，我知道我唔應該懷疑你，但係我真係好希望你能夠諒解我嘅心情，嫲嫲對我嚟講係一個好重要嘅人，佢突然之間死咗，對我嘅打撃真係好大，而且佢仲係不明不白咁死，所以我先會對你語氣咁重，叫你將個真相話我知。我知道我講嘅嘢令你好難受，但係我真係冇心架，我唔係想傷害你架，我只係一時衝動架咋。 我知道我而家講乜嘢都唔會有用，有啲嘢做錯咗就係做錯咗，我的確係懷疑過你，我係一個唔合格嘅男朋友，你嬲我係應該架。相比之下，至信可能真係好我好多，論背景，佢只有一個人，簡簡單單，而我哋兩家人就搞到水火不容咁；論身份，你兩個都係醫生，而我只係個整餅仔，佢同你合襯好多；論對你嘅態度，佢之前的確係令到你好辛苦，但係而家就變成我令你好辛苦，我諗我同佢應該都係差唔多。如果係呢三方面評分，我真係比唔上佢。不過講真心，我由細細個就開始鍾意你，我到而家都係咁鍾意你，呢份心情係唔會變架！而且我哋咁艱難先可以喺埋一齊，我唔會咁輕易放棄你架！可能我好多嘢都唔及得佢，但係我會對你更加好，去彌補我比唔上去嘅地方。 于素秋，等你喺雲南返嚟，我會證明俾你睇，你揀我係冇揀錯架。 http://blog.tvb.com/moonlight07/2008/09/21/%e5%b0%8d%e5%94%94%e4%bd%8f%e5%91%80%ef%bc%8c%e4%ba%8e%e7%b4%a0%e7%a7%8b/ 本來喺呢個時候，我唔應該掛住打blog，但係我已經冇晒辦法，可以搵嘅地方我已經搵晒，我真係諗唔到嫲嫲會去咗邊。一個人嘅力量係有限嘅，雖然我屋企有咁多個人，但係要搵勻全香港所有地方根本就冇可能，所以我希望透過全港網民嘅力量，一齊幫手搵我嫲嫲。 講咗咁多嘢，我都未講到底發生乜嘢事，其實係咁架，今日我去醫院探嫲嫲嘅時候，竟然唔見佢喺房，我問個護士佢去咗邊，護士話可能落咗canteen，於是我落去canteen搵，但係連人影都冇，我搵晒成間醫院架嘞，都係搵唔到嫲嫲。我哋而家發散晒人手去搵嫲嫲，阿月同阿慶留喺醫院，睇吓會唔會有乜嘢暗角位睇漏咗，公公年紀大，唔方便騰嚟騰去，所以叫佢返屋企先，睇吓嫲嫲會唔會返去，我同其他人就喺附近搵。我頭先搵咗好耐嘞，都係搵唔到嫲嫲，而家搭緊的士去我平時成日去嗰個公園仔，睇吓嫲嫲會唔會喺嗰度。 我真係好擔心嫲嫲呀，佢身體咁差，萬一喺條街出事點算呀？我咁搵法都唔知要搵幾耐先會搵到佢，所以我用電話send email update呢個blog，希望大家睇完呢篇嘢之後可以幫吓手，留意吓你周圍會唔會有一個七八十歲咁上下，肥肥地，好富泰，戴眼鏡嘅老人家。如果你見到一個咁嘅老人家，麻煩你即刻打電話通知我吖，我嘅電話係XXXX XXXX。 http://blog.tvb.com/moonlight07/2008/09/19/%e5%ab%b2%e5%ab%b2%e5%94%94%e8%a6%8b%e5%92%97%ef%bc%81/ 同于素秋食飯嘅時候，唔知點解，硬係覺得有啲唔聚財，好似有人裝裝吓咁。我以為係自己多心，但係原來我哋真係俾人跟蹤，而嗰個人就係于素秋嘅阿爸！于素秋話佢冇諗過認番阿爸，因為呢個男人當年傷害咗佢同佢媽咪。我好理解于素秋嘅心情，JO飽當年做嘅嘢同強哥冇乜分別，但係JO鮑始終係我阿爸，唔通我要嬲佢一世咩？我覺得于素秋都應該同佢阿爸和解，大家始終係一家人嚟架嘛，就算佢做錯過乜嘢，血緣都係改唔到架。 於是，我瞞住于素秋，偷偷地跟蹤強哥，希望可以說服佢為于素秋做啲嘢，等佢兩個可以好番。強哥見到我好嬲，再一次叫我唔好搞住于素秋，我就同佢講如果佢係真心對個女好，唔應該理佢同乜嘢人做朋友，應該諗吓點樣補償自己當日嘅錯。強哥聽完更加激動，仲即刻慣低咗，佢雖然大大隻隻，但係原來佢係有病架。 如果強哥入咗醫院個女都唔理佢，佢就真係好陰功。我知道有樣嘢于素秋一直都好介意，當年強哥應承過整隻走馬燈俾于素秋，但係未整完就同第二個女人走咗。我諗如果強哥肯覆行當年嘅承諾，于素秋應該會原諒佢。不過強哥而家咁樣，要佢一個人做掂隻走馬燈真係有啲勉強，唯有等我出動啦！大家唔好以為我淨係識整餅呀，其實我整其他嘢都好叻架！哎呀！唔小心拮穿咗塊布......一隻手打字一隻手整燈真係唔OK，都係打到呢度，專心整埋隻燈先，希望今晚可以整得完啦！ http://blog.tvb.com/moonlight07/2008/09/18/%e7%84%a1%e4%bb%87%e4%b8%8d%e6%88%90%e7%88%b6%e5%a5%b3%ef%bc%8c%e4%bd%86%e4%b8%80%e5%ae%b6%e4%ba%ba%e5%a7%8b%e7%b5%82%e4%bf%82%e4%b8%80%e5%ae%b6%e4%ba%ba/ 除咗于素秋要交一份心情報告俾我之外，我自己都想交一份俾我自己，我都想將我對于素秋既感覺評分。我應承過自己，唔會因為Dr Ling走咗而乘虛而入，我會等到于素秋交一份100分既心情報告俾我，等佢完全忘記咗Dr Ling，我先會去諗我同佢...今日開始，我要密切監察住自己既感覺，唔可以俾自己有太多對于素秋既幻想！ 今日我俾我自己20分，因為我諗起好多以前同于素秋既片段，亦有諗到將來同佢既畫面。我記得我細個嗰時，試過執地下既汔水蓋，送俾于素秋同佢求婚，佢珍而重之咁收起個汔水蓋，結果惹晒蟻，佢阿媽幫佢揼咗，佢因為咁喊咗幾晚，我就應承佢，第時大個會買一隻有好大好大粒鑽石既戒指送俾佢，點知佢話唔駛，只要係我送既戒指，就算只係好簡單一個鐵圈，佢都會好開心；我又記得，佢話第時大個要同我影結婚相，我就拎咗張白色枱布俾佢扮婚紗！琴日我發夢，夢見大咗既于素秋，著住嗰件用枱布做既婚紗，同我一齊行入教堂... 太多太多既于素秋喺我腦入面出現喇，所以我只可以俾自己20分！ 係呀，我要去敷熱雞蛋喇，今日俾于素秋阿爸打，而家塊面仲腫緊！不過我一定唔會話俾于素秋知，我唔想佢阿爸喺佢心入面，連僅有既分數都冇埋！而且我諗起佢可能有機會係我未來外父...唉，我又亂諗喇！再扣5分！ http://blog.tvb.com/moonlight07/2008/09/17/%e7%ae%a1%e5%ae%b6%e4%bb%94%e7%9a%84%e5%bf%83%e6%83%85%e5%a0%b1%e5%91%8a1/