我咁大個仔，為咗其他人既事緊張就試過(比如阿慶去見工)，為咗自己既嘢而緊張成咁，都算係第一次。我既示愛行動比預期中遲咗幾日，喺今晚，終於將個示愛蛋糕送咗俾于素秋，係呀，最尾我揀咗整蛋糕，因為蛋糕先夠大，放我整既撒亞人同雅典娜公主吖嘛！(我知係好老土，但係我有誠意搭夠)

共167個回應

女人心真係好難捉摸，前幾日燒嘢食既時候，莎姨問于素秋鍾意咩類型既男仔，佢諗都冇諗就話鍾意啲浪漫型嘅，最好就一見鍾情。仲有佢話鍾意啲成熟嘅男人，最少都要大佢七八年。女人係咪都係口是心非既動物呢？明明呢排我感覺到佢對我係有嗰種感覺架嘛…唉，講起口是心非，其實男人咪一樣！莎姨問我鍾意咩類型既女仔，我咪又係口是心非！我話我鍾意啲浪漫型嘅女仔，都係要一見鍾情，而且我個人比較大男人，所以佢可以唔係咁靚，但係唔可以叻過我，仲有呀仲有呀，我話我三年內都唔想拍拖呀！真係離晒譜呀！其實我都唔知點解，喺于素秋面前，我下意識地會掩飾我自己心入面諗既嘢，可能係因為我始終唔肯定佢係咪真係鍾意我，我…真係大男人囉，要面囉…

不過我講完之後不知幾後悔，所以我唯有主動約番于素秋食宵夜囉！佢把口就話好忙收唔到工，但係又偷偷地嚟咗餅舖門口等我，到我問佢既時候，佢又唔認…一個女仔咁反覆…我諗，我唔會錯架喇！做男人要主動啲行前一步，我知道幸福係要自己爭取既！我決定駛出我既看家本領，整一個示愛蛋撻送俾佢！

各位，你地要祝福我呀！

共102個回應

唔知係咪所有熱戀中既情侶，都會為對方做啲肉麻到痺，娘到爆既事呢？如果問我既話，我舉手認架！記得細個既時候，我知道于素秋鍾意聽歌，於是就諗到一個自己認為冧死女既方法氹佢開心。我會學啲電台DJ咁鍊起把聲，懶感性咁講啲肉麻說話，根住再加埋啲情歌，一次過錄晒喺盒錄音帶度送俾佢。基本上九十年代所有hit過既情歌我都錄過俾佢架喇！錄好餅帶之後呢，我仲會喺帶上面寫住《撒亞人的情歌集》，有齊volume 1至 30架！講真吖，今時今日我自己都唔敢聽番，我驚我會嘔呀！我以為于素秋已經將啲帶丟晒架喇，冇諗到今日居然俾我喺佢架車度，聽番自己細個嗰把聲，原來于素秋仲留住我送俾佢既錄音帶架…

一路聽番盒帶，我記番好多以前同佢拍拖既嘢，好多好多片段，原來仲係咁深刻，有時我仲會諗到笑咗出嚟添！

今日同于素秋打邊爐嗰陣，佢話自己份人好專一，細個鍾意食啲咩，大個咗一樣鍾意。唔知喺愛情方面，佢又係咪一樣呢？佢咁講，唔通有啲咩暗示？唉，男人老狗，喺度亂諗乜嘢吖？真係頂自己唔順，又要早啲抖喇！

共114個回應

阿慶失戀，我呢個阿哥真係好渣，唔識得點幫佢。阿慶好傻，覺得自己講唔到嘢，而Kelvin係一個好叻既男仔，佢地之間有好大既距離，佢地既感情唔會開花結果。于素秋聽到之後，問咗我一個好老土既問題，佢問我究竟男同女之間，係咪都存在住唔同既距離？如果有距離出現，應該點樣拉近？當時我唔識答佢，但係返到嚟屋企之後，唔知點解，就不斷諗起佢既問題。

我開始諗番起以前同我拍過拖既女仔，我地分開係因為乜嘢原因。我同婷婷分手，係因為我地對大家既期望有距離，佢期望我將佢放喺我屋企人之上，而我就希望佢唔好將自己同我啲屋企人比較，就係咁，我地既諗法就出現咗好大既距離。

至於我同于素秋分手，我諗係因為地域既距離啩。當時佢去咗英國讀書，我就留喺香港，就咁我地就分開咗喇。哈，突然間我有一個好戇居既諗法，而家于素秋返咗嚟香港啦，我地唔再有地域既距離，咁係咪代表我同佢又可以拉近番？

唉吔，甘永好，你諗乜嘢呀？佢係醫生嚟架，而我只係個賣餅仔，咪一樣有距離？早啲抖啦！

共84個回應

細細個既時候，阿慶話嫲嫲好似月亮，初一十五不一樣。但係喺我腦海入面，只有八月十五既嫲嫲，只有佢好錫我地既片段…

記得細個既時候，我地做錯嘢，荷媽要打我地，嫲嫲一定擋喺我地面前，點都唔俾荷媽打我地…

我記得大熱天時，嫲嫲唔怕大汗揼細汗，都會行到去好遠嗰間士多，買我最鍾意既提子孖條返嚟，同我孖份食…

我記得我隻鐵甲人俾阿圓整爛咗，嫲嫲成晚唔瞓，幫我砌番好…

我記得嫲嫲好鍾意帶我坐電車，我成日喺電車度走上走落，追到嫲嫲氣喘，但係嫲嫲塊面永遠只有笑容…

我記得嫲嫲成日話，我地幾個就係佢既命根，佢一生人最錫既就係我地…

不過，呢啲都係十幾年前既片段。呢十幾年嚟，好似有一片烏雲遮住成個天空，將我地既月亮遮住咗。我腦海入面既嫲嫲好似唔見咗咁，我知道紅姨就係嗰片烏雲，係佢令我地唔見咗嫲嫲架！

嫲嫲，我地幾兄弟姐妹一直都等緊八月十五，等緊見番我地入面嗰個你…

共87個回應

今日，係我同婷婷第二次分手。我咁大個仔，只係拍過三次拖，十三歲同于素秋嗰段puppy love唔知算唔算，淨番嗰兩次，都係同婷婷。婷婷係我中學既師妹，我地畢咗業之後幾年冇見，有次喺街撞番佢，佢知我喺餅舖做緊，就成日拖住個喼嚟買餅，後尾我同咗佢一齊，先知道佢中學嗰時已經鍾意我…其實我都唔知佢鍾意我啲乜嘢，我淨係知道佢唔鍾意我啲乜嘢，佢覺得我錫啲屋企人多過錫佢，就係呢個原因，我地第一次分手。

至於第二次分手，原因都係一樣，情況唔同既係，佢仲有另一個選擇。

其實我好認真咁諗過，如果我當婷婷係屋企人，係咪可以解決到問題？定係我根本唔夠愛佢？我嘗試諗番同婷婷一齊既片段，但係我發覺係有啲模糊，反而同于素秋一齊puppy love嗰啲無聊好笑嘢就好深刻，唔知係咪人越大，越遠既記憶反而越清楚？又或者同于素秋一齊既時候，大家都細個，個世界好簡單好單純，只有快樂，乜都可以笑一餐。但係同婷婷一齊，人已經大個咗，太多計較太多嘢遷就太多改變。

婷婷講得啱，屋企人係永遠唔會變既，佢地永遠都喺我身邊…

共169個回應

「一葉輕舟去 人隔萬重山 鳥南飛 鳥南返 鳥兒比翼何日再歸還…」
今日同于素秋喺老人院唱咗呢支歌，好受啲公公婆婆歡迎呀，搞到我好好唱口，返到屋企無論沖涼食飯去廁所都哼住佢，而家打blog都哼緊架！阿月個八妹聽到我唱《鳳閣恩仇未了情》，伸個頭入嚟問我同邊個未了情喎？激死！哈，唔知而家啲卡啦ok有冇呢支歌仔唱呢？一陣要打電話俾于素秋，叫佢喺屋企練習吓先！呢支歌要唱得好唔易架，要唱出佢既味道，就一定要用特別既唱腔，我就自創咗隻粵曲腔撈少少流行曲beat fusion咁去唱：

一呀ar葉 輕er舟er er去呀

人ar ar隔呀萬呀重山呢
鳥er南飛 鳥er南返
唏，鳥兒比翼何日再歸還呢
哀我何孤單…何孤單…

共99個回應

所謂日行一善，做咗善事，心情都靚啲！我sponsor咗于素秋參加盲俠行，呢個係一個幫盲人籌款既活動，前幾晚佢拉埋我去同佢一齊行呀！我同佢瞌埋眼一齊行，感受吓盲人既世界。原來喺一個黑暗既世界入面，會浮現番好多細路哥時候既畫面架…

細個嗰陣我好百厭，試過拖住于素秋，一齊喺街上面扮盲呃其他人。有一次我拉住于素秋喺馬路邊扮盲乞錢，反晒眼七情上臉咁，真係有人信架！佢地掟錢俾我呀！我好開心咁拎住啲錢去買朱古力俾于素秋食，買完之後又走番去馬路邊乞過，結果有把聲叫住我…吖，把聲咁熟既？我抬高頭望上去，原來係荷媽嚟架！嗰時我伸直咗隻手”行乞”緊架嘛，咁佢梗係冇俾錢我啦，佢好大力咁拍咗落我隻手度，係咁鬧我咋！于素秋仲幫我求情，話請荷媽食啲朱古力，叫荷媽唔好打我喎！哈，佢真係好傻呀！

估唔到個傻妹由細傻到大，今日佢竟然傻到喊住同我道歉，話自己有份搞散我頭家。其實喺我心入面，我係唔會嬲佢既，佢冇破壞到我頭家呀，「家好月圓慶中秋」，呢頭家有咗佢，反而變得更加完整！

共67個回應

我真係好嬲！你地一定會以為係Sa姨激到我咁，因為佢偷睇阿月SEND俾阿慶既EMAIL吖嘛！係，Sa姨咁做係好唔啱，但係阿月既行為，真係令我好失望！之前Sa姨同公公激親佢，我以為已經氹番掂佢！點知佢要搬出去住，講真我已經唔係幾高興，後尾仲被我地知佢搬出去同嗰個eric住！嗰個衰男人，以前呃過阿月架，一腳搭幾船，嗰年阿月中五，佢失戀搞到意志消沉，考唔到會考！個傻女點解仲要痴番埋佢度？如果愛情係盲目既，我呢個阿哥就要幫阿月擘番開雙眼！

我知阿月冇面目見我地，呢個妹表面硬頸，其實個心好自卑，因為佢唔係jo飽同荷媽親生既…不過我真係好想同佢講，咁多年嚟，我己經當咗佢係親生妹妹一樣，佢做得唔啱，我會好嬲好心痛，佢匿埋咗唔見我地，我一樣會好擔心好難過！

好彩，我地成家人出動去搵佢，佢終於肯同荷媽道歉，肯返嚟同我地一齊住！

呢個周末，我地餅舖要幫個老人中心做幾百個老婆餅呀！聽朝一早要開工，唔同你地講住喇！

共114個回應

我有得「管家仔」呢個花名，當然唔係浪得虛名。我頭家事冇大小，屋企人有乜頭暈身慶，我都會緊張到暈。成日有人讚我好錫頭家，但係我亦都試過被以前既女朋友怪我太錫頭家，仲因為咁要同我分手。可能細細個見荷媽為咗我地，吃過唔少苦，我作為呢頭家唯一既男人(公公咁老唔計)，總係覺得要孭起一家之主呢個重責，唔想荷媽操心。

成家人我最緊張既，就係我細妹阿慶。我呢個妹，講唔到嘢架，佢只係識用手語同人溝通。雖然佢有呢個缺憾，但係佢份人好樂觀，冇埋怨過乜嘢，所以我好錫佢。

不過呢排我真係好擔心佢既前途，佢畢咗業之後，日日留喺餅舖幫手搓餅，叫佢出去搵工佢就死唔肯。我好了解佢，佢係驚出到去做嘢，啲人唔知會點睇佢。我試過夜麻麻見佢喺廳睇日劇，睇到眼濕濕。第二朝我偷偷地拎套日劇嚟睇，原來套劇係講一個啞女既遭遇，其中一集講佢番工，不斷俾啲同事歧視同欺負！個傻妹好傻，佢個心不知幾想出去見識吓，有時啲ＯＬ嚟我地餅舖買餅，佢望住佢地既眼神不知其羡慕！所以我呢個阿哥經已決定咗，無論如何，支持鼓勵佢出去闖佢既天地！

共109個回應