今日陪阿月去睇超聲波，我個外甥已經有手有腳，仲好活躍，成日喺媽咪肚入面跳舞。當我同佢say hi，佢又好似聽到咁同我揮手…好：睇吓你吖，恨仔恨到出晒面，不如自己生返個啦！

秋：蝦，我寫blog關你咩事呀？夾埋搶左人個keyboard嚟打都有嘅！

好：我都係俾啲意見你啫，我地都過左二人世界幾年，係時候生返個啦。

秋：你就梗係想啦，又唔駛你生，你問吓至信吖，生仔好辛苦架！

好：最多咁啦，生出嚟無論係仔定女都好，都叫做甘苦，以紀念你呢個媽媽咁偉大咁生佢出嚟！

秋：你黐線架，叫個仔做甘苦！係都叫甘甜，希望佢一世甜甜蜜蜜啦！

好：計我話呢，真名可以慢慢先諗，因為花名反而可能叫得仲多呀，好似啲人叫我做管家仔多過甘永好，叫你做于素秋多過于素心嘅！

秋：唏！咁就容易啦，佢係你個仔嚟，就叫做管家仔仔啦！

好：吓？！咁如果係女呢？

秋：咪叫管家仔女囉！夠晒易記！

好：嘩，咁就難搞喇，以後我冇咩事都係唔好叫你。

秋：咩呀？關我咩事？

好：咁你個女叫管家仔女吖嘛，你係佢阿媽，咪叫做管家仔女媽囉！…喂，你攞我個枕頭去邊呀？

秋：管家仔仔爸，你今晚瞓廳吧！

好：哎吔，講吓笑咋嘛！唔好咁啦，管家仔仔同管家仔女好想快啲出世呀！你聽吓…佢地問爸爸去左邊呀…喊緊添喇！

秋：管家仔仔乖，管家仔女乖…唔駛驚，管家仔仔爸喺大廳！

共92個回應

雅典娜一直在神殿等待星矢解救聖域，與十二宮黃金聖衣作戰的，卻是撒亞人。身邊的人都說，雅典娜，你不應讓撒亞人繼續作戰，佢根本不是你要等的人。

因為撒亞人除了打鬥，甚麼也不會，知識水平太低。而你呢，你與他不同，你出身高貴，學歷也好，你們是不相襯的。

看著撒亞人一步一步前進，把金牛宮、巨蟹宮的黃金聖衣逐一打敗，雅典娜也曾掙扎，是不是應該離開？但雅典娜並不是嫌棄撒亞人，只是她愛上了一個不值得愛的人，對撒亞人的愛，恐怕無力回報。

雅典娜走了，跟隨那個不值得愛的人。

然後，她又回來。她覺得自己己經不是從前那個雅典娜。但撒亞人仍然在努力，他已打敗了最後一個黃金聖衣，但他沒有走上神殿，他在等她決定。

雅典娜看著撒亞人，還有甚麼需要猶豫呢？她把手伸向他。

撒亞人與雅典娜，也許真的不相襯，但相愛。

共109個回應

0-2歲

心跳 呼吸 身高 體重 學行時間 說話時間

3-6歲

智商 可愛度 上鏡度 歌唱技巧 跳舞技巧

7-16歲

各學科科目成績 課外活動成就 外貌 身形 朋友多寡 男朋友外形

17歲

會考成績 男朋友多寡、外形

18-19歲

高考成績 男朋友多寡、外形

19-25歲

大學成績 獎學金金額 男朋友多寡、外形、成績、家世

現在

每天想起至信的次數

共45個回應

我講過，同返至信一齊，係我最後一次任性。當撒亞人同我講，今晚返英國嘅唔止詠琳一個，至信會同佢一齊返去，我係好愕然，好傷心，但係我冇嬲，因為我知道，至信已經盡左最大嘅努力同我一齊，我會尊重佢嘅決定。

我同至信喺機場度對望，諗返起好多同佢一齊嘅片段，仲記起一首叫《記得忘記》嘅歌：

明天過後　來揮一揮手
天高地厚　就此各自暢遊
忘記玩偶　忘不了蕩過韆鞦
縱使雙手多麼緊扣　亦要走

從此以後　誰也不回頭
一早熱透　汗水切勿倒流
忘記沒有　忘不了路過沙丘
愛到枯乾都找不到綠洲

你在我記憶旅行　每步也驚心
跟你踏過許多足印　捨不得轉身
你贈我太多見聞　拿不走的熱吻
多努力放低偏不會忘記　苦戀紀念品
純屬過路風箏不懂愛別人

至信，時時提醒自己去忘記一個人，可能根本就唔想去忘記。

不過你放心，我知道終有一日我可以忘記你，當我唔再需要提醒自己去忘記。

共91個回應

本來，我應該一直跟撒亞人一起的，如果媽媽沒有與Jo飽結婚的話。

本來，回來香港後，我應該再一次跟撒亞人走在一起的，如果那晚的大貨車沒有在荷媽老餅家外經過，讓我一下子洩了氣的話。

本來，沒能跟撒亞人一起，我一個人也可以好好過，如果凌b沒有出現的話。

本來，凌b是我的理想情人，幽默、自信、有愛心，如果他沒有詠琳這個女朋友的話。

本來，我應該一早便了斷與凌b的關係，如果我在他面前不是那麼軟弱的話。

本來，為了他我已甘心當個第三者，如果詠琳沒有來找我，告訴我她曾為了凌b墮胎的話。

本來，我已經鐵了心跟凌b了斷，如果他不是跟詠琳分手的話…

本來就不該有那麼多「本來」，但既然事情已發展至此，就讓我將一切「本來」都拋諸腦後吧，讓我任性最後一次…

共55個回應

我應承過自己，唔可以再理凌b。我好驚守唔到呢個承諾，不斷咁提醒自己。但每提醒一次，就即係諗起佢一次。每諗起佢多一次，我對自己守諾嘅信心就減少一分。

簡直係惡性循環。

好彩有管家仔陪我，只有同佢一齊嘅時間，我先至可以暫時忘記凌b。

管家仔話佢係借時間俾我，仲摘低晒我總共爭佢嘅時間。

我當然知佢咁講係為左氹我開心啦，其實時間又點可以借？一個人一生嘅時間，由出世到死嗰日，係咁多就係咁多。用左嘅時間，永遠都收唔返。

管家仔用佢嘅時間陪我，我欠佢嘅唔係時間，係恩情。

凌b同詠琳就啱啱相反。

凌b欠詠琳恩情，所以就算唔開心，佢都甘心同詠琳一齊七年。

佢欠詠琳嘅恩情，只可以用時間嚟還。

我試過發夢咁諗，如果管家仔真係可以借啲時間俾我，我會將佢地用喺我生命嘅最開頭。咁我就可以早啲出世，早過詠琳識到凌b。

不過如果我早左出世，就唔會同管家仔做到兄妹，佢又點借到啲時間俾我呢？

冇可能嘅嘢，就算係發夢都冇可能。

共146個回應

近一兩年，有唔少電視劇同小說以「惡魔」為題，外國有《穿Prada的惡魔》，台灣代表係《惡魔在身邊》。惡魔本來梗係作惡嘅，不過係呢啲小說同電視劇入面，為左引起觀眾對「惡魔」既好感，都設定「惡魔」係可惡之外，同時都有佢人性化、甚至係可愛嘅一面，令人又恨又愛。

不過係現實裡面，就唔係個個惡魔都咁得人鍾意。

本來我係個Sleep Monster，無論喺邊度、環境有幾嘈我都瞓得著。以前有個roommate話我直頭係Sleep Devil，因為我啲鼻鼾聲都唔嘢少，成日嘈到佢瞓唔到。佢為左可以好好咁瞓一覺，試過唔俾我早瞓過佢、開大個電視想嘈醒我、塞啲硬物入我床褥度，希望我瞓得冇咁好、趁我瞓左偷偷地夾住我個鼻。所以雖然我呢個Sleep Devil成日搞到佢冇覺好瞓，但又帶俾佢好多樂趣喎！

可惜呢排我再唔係Sleep Devil喇，我一合埋眼就諗起凌B，就算張床幾舒服、環境有幾寧靜我都好難瞓得著…

本來唔做Sleep Devil都唔緊要，我最擔心係我會變左做Splitting Devil，拆散一對相戀左七年嘅情侶。

于素秋，無論你有幾咁鍾意凌B都好，呢個惡魔你點都唔可以做。

共47個回應

• 1. 南丫島好寧靜，得閒去行吓，個人好relax。
• 2. 南丫島風景優美，又有沙灘，吹海風一流。
• 3. 南丫島有好多海鮮舖，又靚又抵。
• 4. 南丫島單車多過車，空氣清新。
• 5. 南丫島係香港最早嘅考古出土所在，遠古已經有人聚居。
• 6. 南丫島係離市區最近嘅離島，半個鐘就出到中環。
• 7. 南丫島分榕樹灣同索罟灣，各有特點。
• 8. 南丫島嘅鹹魚好香。
• 9. 南丫島有大風車。
• 10. 南丫島有你。

共56個回應

記得上年睇過一齣日劇，講男主角係一個鋼琴高手，但一心想去歐洲深造，做個世界級嘅指揮家。女主角係一個鋼琴學生，雖然天份好高，但係佢嘅志願只係做一個幼稚園教師，彈琴俾小朋友聽。直至佢愛上左男主角，喺男主角影響之外，佢更加努力練琴。後來更加為左同男主角一齊去歐洲深造，參加全國鋼琴比賽，希望可以攞到獎學金。女主角閉關練琴，過完一關又一關，但終於都係同獎學金擦身而過，冇得去歐洲。

女主角好失望，匿埋左喺鄉下度。男主角雖然平時好似對女主角冇意思咁，但當女主角消失，佢先知道女主角嘅重要，佢不停咁打電話，但女主角根本就冇開電話…

最後男主角忍唔住去女主角嘅鄉下搵佢，途中打電話俾女主角，竟然接通左。兩個人通話期間，男主角仲見到女主角。男主角落左車，一路同女主角講電話，一路喺後面跑向女主角，突然喺後面攬住佢。女主角又驚喜又感動，兩個人就喺夕陽之下相擁…

呢一幕真係好感動呀，我睇到眼濕濕…忍唔住諗，唔知將來有冇人會咁樣攬住我，唔知個感覺係點嘅呢？

今日喺南丫島嘅時候，當凌B突然間喺後面攬住我，我終於知道個感覺係點喇，原來真係好浪漫…

可惜凌B同日劇嘅男主角唔同，佢已經有一個對佢情深義重嘅女朋友…

從後擁抱，試過便好。

共87個回應

呢排發生左兩件事。第一件係關於嫲嫲嘅。嫲嫲不嬲都有好多朋友跟住佢，前排又多左個，仲差啲因為呢個新朋友而離開我地…

第二件係關於撒亞人，其實都關於我嘅。撒亞人突然送左個蛋糕俾我，上面仲寫住”我愛于素秋”。

呢兩件事冇咩關係，但同時令我明白左一樣嘢。

人嘅命運係點，好多時只係一線之差。

我好記得喺醫院嗰一晚，嫲嫲條氣好促，好辛苦…佢醒返見唔到JO飽，氣息更加差，塊面越嚟越白。我雖然實習左唔係好耐，我已經見過三次類似嘅情況，有兩次個病人都救唔返。我睇住嫲嫲對眼想合埋，都唔知應該點知…

好彩有荷媽喺度，佢為左激勵嫲嫲，特登話管家仔、阿慶同阿卡都拍緊拖，就嚟結婚，仲話即刻搵嫲嫲未來嘅孫新抱、孫女婿嚟探佢，嫲嫲先撐過左嗰關。

管家仔嘅事都係一樣，原本我好期待佢會送咩禮物俾我，但到佢真係送俾我，我嘅感覺已經唔同左。好似打機咁，過關過得咁辛苦，通常都係為左攞寶物；但到左下一關，如果得到相同嘅嘢，就唔再覺得興奮。

因為有啲嘢過左就係過左…

如果撒亞人喺約定嘅星期日送禮物俾我，件事就可能完全唔一樣。

或生或死，或榮或枯，都只係一線之差。

感情如是，生命如是。

共67個回應