姓名：于素心/秋﹙鍾嘉欣飾﹚
年齡：約25歲
觀看鍾嘉欣的網誌
記得上年睇過一齣日劇，講男主角係一個鋼琴高手，但一心想去歐洲深造，做個世界級嘅指揮家。女主角係一個鋼琴學生，雖然天份好高，但係佢嘅志願只係做一個幼稚園教師，彈琴俾小朋友聽。直至佢愛上左男主角，喺男主角影響之外，佢更加努力練琴。後來更加為左同男主角一齊去歐洲深造，參加全國鋼琴比賽，希望可以攞到獎學金。女主角閉關練琴，過完一關又一關，但終於都係同獎學金擦身而過，冇得去歐洲。
女主角好失望，匿埋左喺鄉下度。男主角雖然平時好似對女主角冇意思咁，但當女主角消失，佢先知道女主角嘅重要，佢不停咁打電話，但女主角根本就冇開電話…
最後男主角忍唔住去女主角嘅鄉下搵佢，途中打電話俾女主角，竟然接通左。兩個人通話期間，男主角仲見到女主角。男主角落左車，一路同女主角講電話，一路喺後面跑向女主角，突然喺後面攬住佢。女主角又驚喜又感動，兩個人就喺夕陽之下相擁…
呢一幕真係好感動呀，我睇到眼濕濕…忍唔住諗，唔知將來有冇人會咁樣攬住我，唔知個感覺係點嘅呢？
今日喺南丫島嘅時候，當凌B突然間喺後面攬住我，我終於知道個感覺係點喇，原來真係好浪漫…
可惜凌B同日劇嘅男主角唔同，佢已經有一個對佢情深義重嘅女朋友…
從後擁抱，試過便好。
呢排發生左兩件事。第一件係關於嫲嫲嘅。嫲嫲不嬲都有好多朋友跟住佢，前排又多左個，仲差啲因為呢個新朋友而離開我地…
第二件係關於撒亞人，其實都關於我嘅。撒亞人突然送左個蛋糕俾我，上面仲寫住”我愛于素秋”。
呢兩件事冇咩關係，但同時令我明白左一樣嘢。
人嘅命運係點，好多時只係一線之差。
我好記得喺醫院嗰一晚，嫲嫲條氣好促，好辛苦…佢醒返見唔到JO飽，氣息更加差，塊面越嚟越白。我雖然實習左唔係好耐，我已經見過三次類似嘅情況，有兩次個病人都救唔返。我睇住嫲嫲對眼想合埋，都唔知應該點知…
好彩有荷媽喺度，佢為左激勵嫲嫲，特登話管家仔、阿慶同阿卡都拍緊拖，就嚟結婚，仲話即刻搵嫲嫲未來嘅孫新抱、孫女婿嚟探佢，嫲嫲先撐過左嗰關。
管家仔嘅事都係一樣，原本我好期待佢會送咩禮物俾我，但到佢真係送俾我，我嘅感覺已經唔同左。好似打機咁，過關過得咁辛苦，通常都係為左攞寶物；但到左下一關，如果得到相同嘅嘢，就唔再覺得興奮。
因為有啲嘢過左就係過左…
如果撒亞人喺約定嘅星期日送禮物俾我，件事就可能完全唔一樣。
或生或死，或榮或枯，都只係一線之差。
感情如是，生命如是。
心：大家好，我係于素心。我唔係做醫生嗰個于素心，佢係我嘅主人，而我係佢個本名，于素心。
秋：你地好，我嘅主人都係做醫生嗰個于素心，但我係佢嘅花名，于素秋。于素心呀，我地共侍左一個主人廿幾年，一直都冇乜傾過計，你今日約我出嚟做乜？
心：唉，阿秋，其實你知唔知我一直都好羨慕你？
秋：羨慕我？你係正印嚟架喎，主人嘅身份證、畢業證書全部都寫住你，我呢個花名冇身份冇名份架喎！
心：係，我的確係正印，不過我知道主人一直都鍾意你多啲！次次聽到人叫于素秋，主人就特別開心！
秋：主人鍾意聽到人叫我，唔係因為佢鍾意我多啲，係鍾意叫佢嘅人啫！荷媽啦、阿月、阿慶、阿家，仲有阿好，主人一聽到佢地叫于素秋，就覺得特別親切。
心：講起阿好，佢係最鍾意叫你嘅一個，我都唔知幾耐冇聽過佢叫主人做于素心咯。
秋：唉，我情願佢唔好再叫我…
心：點解咁講呀？
秋：你知唔知呀？主人一聽到阿好叫佢做于素秋，就會諗起「家好月圓慶中秋」，每次都好似提醒主人，佢同阿好永遠都係兄妹嚟…我情願冇人再叫我，都唔想主人唔開心…
心：阿秋，但係阿好今日冇叫你，主人都唔開心呀！
秋：你係講蛋糕上面嘅字？
心：咪係囉！主人一見到「雅典娜」三個字，成個呆左，仲到而家都未瞓得著…
秋：阿心，主人一心諗住安份做于素秋，唔再諗同阿好嘅事，點知撒亞人突然現身，叫返佢做雅典娜，仲加多三個字…唔煩就假啦！
心：咁又係…今次點算好？
*********************************************************************
于素心／秋／雅典娜：唉，我都唔知點算好…
今日返工好開心呀，因為我遇到三個仔。大家唔好誤會，我冇響醫院識男仔，更加唔係之前生過三個仔失散左，今日撞返佢地呀！(係就唔會話俾你地聽啦，哈哈！)
其實我遇到嘅第一個仔，就係「咭仔」，即係今日凌醫生俾我睇嗰張感謝咭。其實嗰日喺商場撞到個鄭太作動，我都冇幫到啲乜，不過凌醫生話，如果嗰日唔係我叫啲圍觀嘅人散開，等啲空氣流通啲，可能鄭太已經喺商場度暈左喎！點都好啦，見到咭上面嘅BB咁得意，真係好開心！
因為呢張咭仔，凌醫生帶左我去睇第二個仔–立仔，即係我地睇住佢出世嘅BB呀！我隔住嬰兒房嘅玻璃望立仔，佢雖然唔算係肥B，但對腳仔同手仔就郁嚟郁去，好健康，個樣仲似足鄭太，大個一定係靚仔嚟！
因為立仔，我搵返第三個仔，即係我細個嘅鄰居仔凌醫生，原來佢同我係同年同月同一間醫院出世架！即係話嗰時我地應該瞓喺附近嘅BB箱，當時可能望過對方，仲可能一齊喊過添，唔怪得我一識佢就有種好親切嘅感覺啦。
立仔，希望你健健康康咁成長，到你識字嘅時候，要親手寫張咭仔俾我地呀！仲要努力啲讀書，將來好似我個鄰居仔咁，做個出色嘅人！
對一般人嚟講，一分鐘可能只係好短嘅時間，但對我地醫生嚟講，一分鐘就可以好重要。一分鐘，可以由生轉死，亦都可以由死轉生。
好似我喺商場度，遇到一個孕婦就嚟要生，本來諗住同佢入警衞室即刻幫佢分娩，好彩啱啱有個姓凌嘅醫生經過，佢好果斷咁樣問左個孕婦幾個問題，知道佢有高血壓，就決定一定要送個孕婦去醫院開刀，因為如果佢自然分娩會好危險。
如果凌醫生遲一分鐘出現，就可能會影響到兩條人命。
到我第一次幫手做心臟手術，本來一直都進行得好順利，點知突然間個病人出現併發症，我睇住佢嘅心電圖，喺一分鐘之內由越嚟越微弱，到變為一條直線…
我為左呢件事好唔開心，撒亞人就同我講，人梗係有時開心有時唔開心，不過我今日只係淨返兩個鐘五十九分鐘唔開心。
一般人安慰人，通常係話你開心係咁過，唔開心又係咁過，咁不如開心啲過啦。但撒亞人就唔同。兩個鐘五十九分鐘即係一百七十九分鐘，正常長度九十分鐘嘅戲，都可以睇到兩套，聽落都好長。但我明白撒亞人嘅意思，你可以唔開心，但最重要係唔可以俾唔開心嘅時間長過開心嘅，即使係一分鐘都好。
聽完佢講，令到”一分鐘”又好以加添左另一層意義。我同自己講，我要縮短每日唔開心嘅時間，每日減一分鐘。
呢排可能同撒亞人見得多左，又聽返佢嗰時錄俾我嘅錄音帶，我諗返起好多我地以前細個一齊嘅事。有時係搭搭吓車返工諗起，有時係喺醫院CANTEEN，食食吓飯嗰時突然間記起，尋晚仲發夢夢見返有一次佢激嬲左我，佢為左氹返我，喺海邊一個人食晒一盒兩公升嘅雪糕，話代表佢對我嘅熱情無論點樣都唔會減退喎。而嗰日，係嗰年冬天最凍嘅日子。今晚原本同撒亞人打邊爐，但佢為左買對新嘅隱形眼鏡俾我，嘢都唔食撲左出去搵。最後我地買左粥同埋炒麵，拎去海旁度食。管家仔叫我帶返副眼鏡，唔駛對眼咁乾澀咁辛苦。我同佢講，我唔會隨便俾人見到我戴眼鏡個樣，一係殺佢滅口，一係就逼佢娶我。
其實我唔係講笑架，以前我真係好介意俾人見到自己戴眼鏡嘅傻樣，尤其是係撒亞人，嗰時我明明睇嘢唔清楚，但死都唔肯戴眼鏡，睇戲嗰時又矇查查，要佢讀字幕俾我聽…
後來媽咪逼我配左副眼鏡，嗰日佢又提議去睇戲，話難得我終於睇到字幕喇喎！點知去到戲院，原來佢買左飛睇忍者龜！佢帶住奸笑咁話，四眼龜，我幫你搵返啲同類喇！
而家我唔介意喺佢面前做四眼龜，因為我明白外貌並唔係咁重要；不過當我諗起同佢嘅往事，然後不自覺咁傻笑，我就寧願自己係隻忍者龜，唔好俾佢見到。
撒亞人同我講，呢排阿慶好唔開心，因為公司調佢職，要佢做一個成日對外溝通嘅職位，佢做唔嚟，所以打算辭職。撒亞人不嬲最緊張阿慶，梗係好擔心啦，就叫我問吓究竟阿慶喺公司發生咩事。點知世伯話阿慶喺佢公司做得好好，啲同事又鍾意佢，亦都冇話要調佢職。
後來我地終於知道阿慶點解要辭職喇，原來佢同公事嘅同事Kelvin拍拖，不過Kelvin始終都唔可以完全接受阿慶嘅缺憾，要同佢分手…
雖然阿慶好傷心，但佢冇嬲過Kelvin，仲覺得Kelvin係一個好好嘅男仔。
可能會有人覺得阿慶係自己攞嚟，自己係啞嘅，如果可以同個同樣有缺憾嘅人有段美滿嘅姻緣已經好好啦，點可以奢望同個正常人拍拖？
不過我就覺得阿慶好勇敢嘞，佢唔係唔知道同正常人拍拖嘅難處，但佢選擇去面對，去克服，而唔係試都唔試就調頭走左去。
我問自己，如果換轉係我，有冇咁嘅膽量？
我諗我冇。嗰時媽咪反對我同撒亞人一齊，要送我去英國讀書，我都冇嘗試過反抗。甚至撒亞人寄信俾我，我都唔敢拆開嚟睇。
我唯一做嘅嘢，只係逃避。
面對愛情，阿慶真係比我勇敢好多。
絕食後面通常跟住抗議兩個字，因為啲人絕食，通常係因為佢地對政治嘅現實不滿，以絕食作為非暴力抵抗嘅一種方式。呢種絕食好常見，但原來除左政治抗爭之外，仲有好多人為左其他理由而絕食。
明知結果係可以致命，都仍然選擇絕食，個原因可能係旁人無法理解，但對佢地嚟講都係值得嘅。
例如俄羅斯一個男人將自己困喺莫斯科鬧市一間玻璃屋入面，絕死48日，成為絕食時間最長嘅健力士紀錄。佢為左呢項挑戰，之前仲準備左三年，試過歷時不一嘅絕食，希望令到身體適應。我諗佢一生嘅目標，就係成為健力士紀錄嘅保持者。
模特兒為左上時裝雜誌封面，絕食減肥。對佢地嚟講，成唔到名嘅生命並無意義。
情人想分手，有人唔願意接受現實，會用絕食嚟要脅情人，佢地將情人睇得比自己嘅生命重要。
仲有我嫲嫲，為左想阿卡同中仔返屋企住，寧願唔食嘢，餓到震騰騰暈陀陀。我見到佢咁樣梗係心痛啦，不過如果唔係絕望，邊個想搵自己條命嚟較飛？
每人一個絕食理由，如果我絕食可以令到我地屋企同荷媽屋企開開心心咁相處，我唔介意試吓。
一個人一世總會經歷唔同嘅吻。同唔同嘅人，唔同嘅情景，喺唔同嘅地方，就會有唔同嘅氣氛，亦都因為咁，成為令人難以忘懷嘅回憶。有一啲吻，係我地未出世嗰時已經經歷嘅，因為爸爸會隔住媽媽嘅肚皮錫我地，一邊同我地講，bb，你快啲出世啦，爸爸好想見到你呀。
到我地出左世，爸爸媽媽、爺爺嫲嫲、公公婆婆、叔叔嬸嬸、舅父舅母等等…所有錫我地嘅人都鍾意將心意轉為行動，錫我地。
到我地大小小，就識得錫返呢啲曾經錫過我地嘅人，為左表達我地一樣咁錫佢地，或者，純粹為左粒糖。
然後係初吻。無論你之前錫過幾多你細細個已經開始錫你嘅人，只有第一次同鍾意嘅人接吻，先叫做初吻。
初吻又分兩種。Passive型，即係第一次俾鍾意嘅人錫；Active型，第一次主動錫鍾意嘅人。兩種初吻，對象可能係同一個人，亦都可能係兩個人。
以上咁多種唔同嘅吻，我都試過，但冇一個吻，及得上今晚嗰個咁難忘。
難忘唔係因為我鍾意管家仔，呢個吻好有愛情feel。反而係因為喺錫佢嗰一刻，我咩都冇諗，淨係想佢感受到我嘅關心，令佢可以開心啲。
係好純粹，毫無雜質嘅一個吻。
我永遠都會記住呢種感覺。
最近屋企好亂，莎姨告JO飽同媽咪搶左”家好月圓”呢個招牌嚟用，到個官判左我地贏，以為可以告一段落啦，點知媽咪又告莎姨鬧佢係白粉拆家，要求莎姨公開道歉同埋賠償四百萬。荷媽上嚟求媽咪，脆脆地收二十萬，唔好告莎姨，但媽咪點都唔肯。荷媽話當年媽咪係特登叫蓮子蓉教阿卡炒股嘅，而送中仔去英國讀書，都係為左陪我…我當時真係好激動呀，估唔到媽咪會做啲咁嘅事…不過而家靜落嚟，我知道佢咁做都係因為太錫我。由佢選擇同JO飽一齊，到佢送中仔嚟英國陪我，都係為左俾我好啲嘅生活、為左我嘅前途著想。另一方面，我又覺得好對唔住中仔、撒亞人佢地，但又唔知自己可以做啲乜…
如果話我寧願自己冇得去外國讀書，冇得做醫生，好似太虛偽。我只係諗，如果當初我讀嘅係心理醫生，對於而家屋企發生嘅事，係咪可以handle得好啲？
Copyright 2010 TVB.COM Limited
A Member of TVB Group
