心：大家好，我係于素心。我唔係做醫生嗰個于素心，佢係我嘅主人，而我係佢個本名，于素心。

秋：你地好，我嘅主人都係做醫生嗰個于素心，但我係佢嘅花名，于素秋。于素心呀，我地共侍左一個主人廿幾年，一直都冇乜傾過計，你今日約我出嚟做乜？

心：唉，阿秋，其實你知唔知我一直都好羨慕你？

秋：羨慕我？你係正印嚟架喎，主人嘅身份證、畢業證書全部都寫住你，我呢個花名冇身份冇名份架喎！

心：係，我的確係正印，不過我知道主人一直都鍾意你多啲！次次聽到人叫于素秋，主人就特別開心！

秋：主人鍾意聽到人叫我，唔係因為佢鍾意我多啲，係鍾意叫佢嘅人啫！荷媽啦、阿月、阿慶、阿家，仲有阿好，主人一聽到佢地叫于素秋，就覺得特別親切。

心：講起阿好，佢係最鍾意叫你嘅一個，我都唔知幾耐冇聽過佢叫主人做于素心咯。

秋：唉，我情願佢唔好再叫我…

心：點解咁講呀？

秋：你知唔知呀？主人一聽到阿好叫佢做于素秋，就會諗起「家好月圓慶中秋」，每次都好似提醒主人，佢同阿好永遠都係兄妹嚟…我情願冇人再叫我，都唔想主人唔開心…

心：阿秋，但係阿好今日冇叫你，主人都唔開心呀！

秋：你係講蛋糕上面嘅字？

心：咪係囉！主人一見到「雅典娜」三個字，成個呆左，仲到而家都未瞓得著…

秋：阿心，主人一心諗住安份做于素秋，唔再諗同阿好嘅事，點知撒亞人突然現身，叫返佢做雅典娜，仲加多三個字…唔煩就假啦！

心：咁又係…今次點算好？

*********************************************************************

于素心／秋／雅典娜：唉，我都唔知點算好…

共65個回應

今日返工好開心呀，因為我遇到三個仔。大家唔好誤會，我冇響醫院識男仔，更加唔係之前生過三個仔失散左，今日撞返佢地呀！(係就唔會話俾你地聽啦，哈哈！)

其實我遇到嘅第一個仔，就係「咭仔」，即係今日凌醫生俾我睇嗰張感謝咭。其實嗰日喺商場撞到個鄭太作動，我都冇幫到啲乜，不過凌醫生話，如果嗰日唔係我叫啲圍觀嘅人散開，等啲空氣流通啲，可能鄭太已經喺商場度暈左喎！點都好啦，見到咭上面嘅BB咁得意，真係好開心！

因為呢張咭仔，凌醫生帶左我去睇第二個仔–立仔，即係我地睇住佢出世嘅BB呀！我隔住嬰兒房嘅玻璃望立仔，佢雖然唔算係肥B，但對腳仔同手仔就郁嚟郁去，好健康，個樣仲似足鄭太，大個一定係靚仔嚟！

因為立仔，我搵返第三個仔，即係我細個嘅鄰居仔凌醫生，原來佢同我係同年同月同一間醫院出世架！即係話嗰時我地應該瞓喺附近嘅BB箱，當時可能望過對方，仲可能一齊喊過添，唔怪得我一識佢就有種好親切嘅感覺啦。

立仔，希望你健健康康咁成長，到你識字嘅時候，要親手寫張咭仔俾我地呀！仲要努力啲讀書，將來好似我個鄰居仔咁，做個出色嘅人！

共66個回應

對一般人嚟講，一分鐘可能只係好短嘅時間，但對我地醫生嚟講，一分鐘就可以好重要。一分鐘，可以由生轉死，亦都可以由死轉生。

好似我喺商場度，遇到一個孕婦就嚟要生，本來諗住同佢入警衞室即刻幫佢分娩，好彩啱啱有個姓凌嘅醫生經過，佢好果斷咁樣問左個孕婦幾個問題，知道佢有高血壓，就決定一定要送個孕婦去醫院開刀，因為如果佢自然分娩會好危險。

如果凌醫生遲一分鐘出現，就可能會影響到兩條人命。

到我第一次幫手做心臟手術，本來一直都進行得好順利，點知突然間個病人出現併發症，我睇住佢嘅心電圖，喺一分鐘之內由越嚟越微弱，到變為一條直線…

我為左呢件事好唔開心，撒亞人就同我講，人梗係有時開心有時唔開心，不過我今日只係淨返兩個鐘五十九分鐘唔開心。

一般人安慰人，通常係話你開心係咁過，唔開心又係咁過，咁不如開心啲過啦。但撒亞人就唔同。兩個鐘五十九分鐘即係一百七十九分鐘，正常長度九十分鐘嘅戲，都可以睇到兩套，聽落都好長。但我明白撒亞人嘅意思，你可以唔開心，但最重要係唔可以俾唔開心嘅時間長過開心嘅，即使係一分鐘都好。

聽完佢講，令到”一分鐘”又好以加添左另一層意義。我同自己講，我要縮短每日唔開心嘅時間，每日減一分鐘。

共36個回應

呢排可能同撒亞人見得多左，又聽返佢嗰時錄俾我嘅錄音帶，我諗返起好多我地以前細個一齊嘅事。有時係搭搭吓車返工諗起，有時係喺醫院CANTEEN，食食吓飯嗰時突然間記起，尋晚仲發夢夢見返有一次佢激嬲左我，佢為左氹返我，喺海邊一個人食晒一盒兩公升嘅雪糕，話代表佢對我嘅熱情無論點樣都唔會減退喎。而嗰日，係嗰年冬天最凍嘅日子。今晚原本同撒亞人打邊爐，但佢為左買對新嘅隱形眼鏡俾我，嘢都唔食撲左出去搵。最後我地買左粥同埋炒麵，拎去海旁度食。管家仔叫我帶返副眼鏡，唔駛對眼咁乾澀咁辛苦。我同佢講，我唔會隨便俾人見到我戴眼鏡個樣，一係殺佢滅口，一係就逼佢娶我。

其實我唔係講笑架，以前我真係好介意俾人見到自己戴眼鏡嘅傻樣，尤其是係撒亞人，嗰時我明明睇嘢唔清楚，但死都唔肯戴眼鏡，睇戲嗰時又矇查查，要佢讀字幕俾我聽…

後來媽咪逼我配左副眼鏡，嗰日佢又提議去睇戲，話難得我終於睇到字幕喇喎！點知去到戲院，原來佢買左飛睇忍者龜！佢帶住奸笑咁話，四眼龜，我幫你搵返啲同類喇！

而家我唔介意喺佢面前做四眼龜，因為我明白外貌並唔係咁重要；不過當我諗起同佢嘅往事，然後不自覺咁傻笑，我就寧願自己係隻忍者龜，唔好俾佢見到。

共44個回應

撒亞人同我講，呢排阿慶好唔開心，因為公司調佢職，要佢做一個成日對外溝通嘅職位，佢做唔嚟，所以打算辭職。撒亞人不嬲最緊張阿慶，梗係好擔心啦，就叫我問吓究竟阿慶喺公司發生咩事。點知世伯話阿慶喺佢公司做得好好，啲同事又鍾意佢，亦都冇話要調佢職。

後來我地終於知道阿慶點解要辭職喇，原來佢同公事嘅同事Kelvin拍拖，不過Kelvin始終都唔可以完全接受阿慶嘅缺憾，要同佢分手…

雖然阿慶好傷心，但佢冇嬲過Kelvin，仲覺得Kelvin係一個好好嘅男仔。

可能會有人覺得阿慶係自己攞嚟，自己係啞嘅，如果可以同個同樣有缺憾嘅人有段美滿嘅姻緣已經好好啦，點可以奢望同個正常人拍拖？

不過我就覺得阿慶好勇敢嘞，佢唔係唔知道同正常人拍拖嘅難處，但佢選擇去面對，去克服，而唔係試都唔試就調頭走左去。

我問自己，如果換轉係我，有冇咁嘅膽量？

我諗我冇。嗰時媽咪反對我同撒亞人一齊，要送我去英國讀書，我都冇嘗試過反抗。甚至撒亞人寄信俾我，我都唔敢拆開嚟睇。

我唯一做嘅嘢，只係逃避。

面對愛情，阿慶真係比我勇敢好多。

共41個回應

絕食後面通常跟住抗議兩個字，因為啲人絕食，通常係因為佢地對政治嘅現實不滿，以絕食作為非暴力抵抗嘅一種方式。呢種絕食好常見，但原來除左政治抗爭之外，仲有好多人為左其他理由而絕食。

明知結果係可以致命，都仍然選擇絕食，個原因可能係旁人無法理解，但對佢地嚟講都係值得嘅。

例如俄羅斯一個男人將自己困喺莫斯科鬧市一間玻璃屋入面，絕死48日，成為絕食時間最長嘅健力士紀錄。佢為左呢項挑戰，之前仲準備左三年，試過歷時不一嘅絕食，希望令到身體適應。我諗佢一生嘅目標，就係成為健力士紀錄嘅保持者。

模特兒為左上時裝雜誌封面，絕食減肥。對佢地嚟講，成唔到名嘅生命並無意義。

情人想分手，有人唔願意接受現實，會用絕食嚟要脅情人，佢地將情人睇得比自己嘅生命重要。

仲有我嫲嫲，為左想阿卡同中仔返屋企住，寧願唔食嘢，餓到震騰騰暈陀陀。我見到佢咁樣梗係心痛啦，不過如果唔係絕望，邊個想搵自己條命嚟較飛？

每人一個絕食理由，如果我絕食可以令到我地屋企同荷媽屋企開開心心咁相處，我唔介意試吓。

共63個回應

一個人一世總會經歷唔同嘅吻。同唔同嘅人，唔同嘅情景，喺唔同嘅地方，就會有唔同嘅氣氛，亦都因為咁，成為令人難以忘懷嘅回憶。有一啲吻，係我地未出世嗰時已經經歷嘅，因為爸爸會隔住媽媽嘅肚皮錫我地，一邊同我地講，bb，你快啲出世啦，爸爸好想見到你呀。

到我地出左世，爸爸媽媽、爺爺嫲嫲、公公婆婆、叔叔嬸嬸、舅父舅母等等…所有錫我地嘅人都鍾意將心意轉為行動，錫我地。

到我地大小小，就識得錫返呢啲曾經錫過我地嘅人，為左表達我地一樣咁錫佢地，或者，純粹為左粒糖。

然後係初吻。無論你之前錫過幾多你細細個已經開始錫你嘅人，只有第一次同鍾意嘅人接吻，先叫做初吻。

初吻又分兩種。Passive型，即係第一次俾鍾意嘅人錫；Active型，第一次主動錫鍾意嘅人。兩種初吻，對象可能係同一個人，亦都可能係兩個人。

以上咁多種唔同嘅吻，我都試過，但冇一個吻，及得上今晚嗰個咁難忘。

難忘唔係因為我鍾意管家仔，呢個吻好有愛情feel。反而係因為喺錫佢嗰一刻，我咩都冇諗，淨係想佢感受到我嘅關心，令佢可以開心啲。

係好純粹，毫無雜質嘅一個吻。

我永遠都會記住呢種感覺。

共100個回應

最近屋企好亂，莎姨告JO飽同媽咪搶左”家好月圓”呢個招牌嚟用，到個官判左我地贏，以為可以告一段落啦，點知媽咪又告莎姨鬧佢係白粉拆家，要求莎姨公開道歉同埋賠償四百萬。荷媽上嚟求媽咪，脆脆地收二十萬，唔好告莎姨，但媽咪點都唔肯。荷媽話當年媽咪係特登叫蓮子蓉教阿卡炒股嘅，而送中仔去英國讀書，都係為左陪我…我當時真係好激動呀，估唔到媽咪會做啲咁嘅事…不過而家靜落嚟，我知道佢咁做都係因為太錫我。由佢選擇同JO飽一齊，到佢送中仔嚟英國陪我，都係為左俾我好啲嘅生活、為左我嘅前途著想。另一方面，我又覺得好對唔住中仔、撒亞人佢地，但又唔知自己可以做啲乜…

如果話我寧願自己冇得去外國讀書，冇得做醫生，好似太虛偽。我只係諗，如果當初我讀嘅係心理醫生，對於而家屋企發生嘅事，係咪可以handle得好啲？

共38個回應

信真係一件好奇妙嘅嘢。喺英國嗰時，撒亞人寫左好多封信俾我，嗰時我唔敢逆媽咪意，一封都冇睇過。

不過，我一封都冇揼過。

我一直都唔知道點解要留起佢哋，係唔捨得揼？定覺得終有一日自己會拆開嚟睇？

而家我終於明白，每一樣嘢存在或者消失，都有佢嘅理由。

同撒亞人講起佢寄俾我嘅信，咁啱嗰晚呢啲信就運到返嚟。我終於拆開佢哋嚟睇，先知原來當年撒亞人為咗早啲落舖頭幫荷媽手，特登唔溫書，搞到啲成績退步晒，仲同荷媽講自己讀唔上…

第二日，媽咪話要成家人去唱卡啦ok，慶祝我考到醫生。點知去嘅途中，就見到撒亞人喺街度送貨，佢一個人好狼狽呀，仲差啲俾車撞到…

因為呢一幕，又令我諗起另一封信，係一封媽咪寫俾”JO飽”嘅信。當年如果唔係我送呢封信，”JO飽”就唔會同返媽咪一齊，咁撒亞人頭家亦都唔會散，佢亦都唔駛扮讀唔成書，而家都唔駛日日咁辛苦送餅。

我冇咩可以補償，只可以同撒亞人講聲對唔住。但佢一啲都冇怪我，仲不斷講笑嚟氹返我開心。

我原本以為，上天安排我喺呢個時候睇返撒亞人嘅信，係想我知道我嗰時做嘅事有幾錯。同撒亞人傾完，我先知道呢件事背後嘅意義。

撒亞人俾我嘅信存在嘅理由，唔係令我內疚，而係要令我好好珍惜自己擁有嘅嘢。

我一定要做個好醫生。

共40個回應

喺《龍珠》漫畫入面，撒亞人經過特訓，或者喺異常憤怒嘅情況之下，就會激發出佢哋嘅小宇宙，變身成超級撒亞人。(我知”小宇宙”呢個term係嚟自《聖鬥士星矢》，不過套落撒亞人身上都幾啱用吖，你哋就當係crossover，多多包涵啦！)不過我今日激到嘅撒亞人變身，唔係變成超級撒亞人，而係變左做”管家仔”！

喺我記憶入面，撒亞人淨係識得玩，俾佢攞住啲刀刀劍劍佢玩極都唔攰，叫佢讀書呢，佢唔駛十分鐘就已經話眼瞓，捐入被竇度唔肯出嚟。咁都唔止喎，如果我同阿月、阿慶佢哋溫書唔陪佢玩，佢就喺後面猛咁掹我哋條辮，等我哋集中唔到精神；又會特登遮住啲英文生字，唔俾我哋串熟。總之佢就係一個貪玩仔！

但呢排阿月唔見咗，撒亞人好擔心，成個人都落晒形。我同撒亞人喺健身室撞到阿月，阿月想走，但撒亞人就死捉住佢。就算周圍啲人指指點點，甚至保安話要趕佢走，佢都唔肯放手！

嗰一刻我先知道，我唔喺度呢十幾年，撒亞人已經由貪玩仔變左做管家仔。佢係一個好哥哥，佢鼓勵阿慶去外面返工，係因為佢想阿慶勇敢咁生活；佢拉阿月返屋企，係因為唔想阿月再喺出面受苦。佢更加係一個孝順仔，因為佢知道只要阿月、阿慶生活得開心，荷媽就會開心。

由撒亞人變做管家仔，係有啲兀突，但難得。

共32個回應