有人話，真正嘅愛情係要經得起考驗，我諗，經過咗呢四年，我同阿卡都算係通過咗考驗，可以幸幸福福咁過埋下半世！

今日攞驗身報告嘅時候，我好感觸，望住份驗身報告嘅時候，啲眼淚忍唔住瞟出嚟！我同阿卡講︰「四年喇，足足四年喇，我等今日等得好苦呀！」佢聽完之後，粒聲唔出就攬住我，仲攬得我好實。當時，我實實在在感受到阿卡嘅心跳，個感覺好真實，好有安全感。我唔駛再驚佢會熄燈，唔駛再驚佢個心跳跳下停咗，唔駛再擔心佢會無聲無息咁消失…

我知道，而家擁有嘅一切都得來不易，所以我會更加珍惜。屋企所有人，jo飽同荷媽、我同阿卡、管家仔同于素秋、阿慶同Kelvin、阿圓同嘉美，個個都經歷咗唔少風浪先可以喺埋一齊，或者，呢啲就係上天俾我哋一家嘅考驗！

雖然我唔知將來仲會有咩風浪，但係喺呢一年，我哋一家人可以齊齊整整，喺中秋佳節團團圓圓，我覺得超幸福呀！但願天下所有家庭都可以齊齊整整，喺中秋節享受同一個月光，食住同一塊月餅，分享相同嘅喜悅。

共48個回應

估唔到，搶人老公嗰個變咗受害者，被人搶老公嗰個變咗狐狸精！二奶自吹自擂做大婆，大婆被人屈到變二奶！

殷紅明明係狐狸精，勾引jo飽，破壞我哋一家，而家扮晒可憐，周圍同人話自己幾慘，點樣被人搶老公！

咁荷媽呢？當年佢好心收留紅姨，當正佢係姊妹，仲救過佢一命，結果呢？

就係俾自己嘅好姊妹出賣！十幾年嚟含冤受屈，吞聲忍氣，想關心自己啲仔女都唔可以咁張揚，如果唔係又會被人話耍手段、搞咩陰謀陽謀！

荷媽幾十歲人仲要被人話係狐狸精，當眾被人掟雞蛋，佢都未曾埋怨過半句！

今時今日，名譽對佢嚟講已經唔再重要，自己啲仔女先至係佢嘅所有！

我好慶幸可以俾荷媽收養，我覺得呢個係幾世修嚟嘅福氣！

荷媽教曉我好多嘢，佢教我要識得忍，要以大局為重，要顧及其他人嘅感受，唔可以凡事以為自己啱晒，要識得喺適當嘅時侯講適當嘅嘢…

經歷咗咁多嘢，我諗我已經大個女喇！我唔會好似以前咁任性，一個唔該就離家出走；我唔會好似以前咁衝動，認為自己啱晒就唔理三七廿一，篤爆人哋啲衰嘢！

多謝荷媽，你教識我點樣做人！如果我係一個有一百分嘅乖乖女，你就係一個一百零一分嘅好媽媽！

共30個回應

嫲嫲，你啱啱先至搬番嚟，啱啱先有番開心嘅生活，點解咁快就要走？以後我哋再見唔到你喇，我哋唔可以再一齊食蛇羹、唱大戲、搭叮叮…

我好唔捨得你呀………

前嗰排，嫲嫲令我記番起一件兒時趣事…

記得我好細個嘅時候，同嫲嫲去行山，但係中途落好大雨，我哋唯有走入個涼亭避雨。當時我見到天上面嘅雨，一條一條咁落，驟眼望落去，就好似好多線掛住喺個天空度。我同嫲嫲講，「點解啲雨係一條條，唔係一點點嘅？我好想捉住啲雨，睇吓係一條條定係一點點。」嫲嫲當時但笑不語，冇應到我，但係過咗咁多年之後，佢俾咗一張相我睇。

佢好興奮咁同我講，阿月阿月，我影到啲雨係一點點架！

起初，我都唔明佢講乜，慢慢先醒起有呢件事。

我好驚訝，嫲嫲竟然連咁小嘅事都記得咁清楚！

雖然張相唔係咁清楚，但係證明咗嫲嫲係幾咁緊張我哋，同埋幾咁懷念以前嘅日子！

嫲嫲，我知道你嘅心意喇，我完全收到晒喇，你喺天上要快快樂樂呀，我哋唔會忘記你架！

共29個回應

Jo飽曾經為餅舖仆心仆命，捱到金晴火眼，而家紅姨要同jo飽爭家產，仲話要攞走家好月圓嘅九成股份，真係好離譜！最毒嘅係，佢明知阿卡有心臟病，嫲嫲又朋友多多，就專登喺佢哋面前，大大聲聲話要分餅舖九成股份，故意要激佢哋兩個，你哋話佢毒唔毒嘞？

本來，我哋六粒黐頭芒都唔貪間餅舖，但係紅姨咁過份，我哋一於支持jo飽同佢打官司，大家爭過，睇吓點囉！

係吖嘛，有乜理由jo飽得一成嘅啫？紅姨係有打理過家好月圓，但係全靠jo飽一開始搞好間餅舖，省靚個招牌，而家餅舖先做到咁大規模，點解jo飽嘅努力只係值一成股份呀？

最公平嘅做法，就係一人一半，但係紅姨就偏偏唔肯，死都要霸晒啲月餅！

因為佢妒忌！佢妒忌我哋一家幸福！

如果佢學到荷媽一半嘅話，佢都可以將頭家打理得井井有條。可惜，佢本性如此，注定要再離多次婚！

就算俾佢霸晒家好月圓都冇用，因為佢將要失去嘅，係一頭家！

共21個回應

呢排好心煩呀！屋企人一個接住一個咁出事，jo飽同嫲嫲已經相繼入咗醫院，阿卡又失驚無神得到個隱性心臟病，搞搞吓function暈咗喺度，真係嚇死我喇！

阿卡一直都冇病冇痛，行得走得，點會無端端有心臟病架？

佢仲咁後生，平時又唔食煙，又冇乜飲酒，咁都會有心臟病嘅？

點解個天偏偏要選中阿卡？點解個天要咁樣玩佢？

我上網搵過啲資料，心臟病喺病發之前毫無徵兆，但係一旦病發就可能會喺一分鐘之內冇命！

所以，一般人好難察覺到自己有心臟病，就算胸口翳住翳住，隱隱作痛，都會以為係食得太飽，或者係工作疲勞，好少會懷疑自己有心臟病。

可能阿卡就係因為做嘢太過搏命，所以搞成而家咁…

咁即係話，可能係因為我幫唔到佢手，冇減輕到佢嘅負擔，導致佢有心臟病…

可能係我累咗阿卡…

最衰都係我…

共35個回應

嗰個嘉美壞透架喇！佢仲衰過莎姨呀，搵個人嚟做場大戲，又扮晒嘢博人同情，擺明係玩弄阿卡嘅感情！嗰日佢同阿卡講完分手之後，我見到阿卡好傷心，眼紅紅咁…

我喺隔離唔知點安慰佢，只可以眼白白睇住佢傷心…我個心好痛…

有人話過，愛情係藥，佢可以醫治你，亦可以摧毀你…

如果你有病，你就要食藥，但係唔係隻隻藥都啱你，有啲藥好適合你，好啲藥對你冇乜效，有啲藥會產生好大副作用，有啲藥甚至會害死你…

好彩，呢個世界有醫生，識得開藥俾你食，如果唔係嘅話，人人就要不斷嘗試，試吓邊隻藥啱自己，邊隻藥唔啱自己…

可惜，呢個世界冇愛情醫生，知道邊個係你杯茶，識得開條愛情藥方，話俾你知邊個啱你，可以同你一生一世；邊個玩你，只係喺度玩弄感情…

阿卡，我唔係愛情醫生，我唔知點去開解你…

不過我想你知道，嘉美呢隻係毒品嚟架，你埋佢身只會玩死自己！

唔好再為呢啲人傷心喇，仲有好多嘢等住你去做架！

提起精神，重新振作，我支持你！

共68個回應

今日揸勤搞咗個婚紗展，因為臨時要show多四款婚紗，於是我同阿卡都要臨時拉夫，做埋model，上台行catwalk。但係，當我知道要同阿卡著住婚紗，蹺住隻手，一齊行catwalk，個心即刻怯咗一怯，跟住就搵咗個藉口叫mandy頂上。

我承認，自從上次寫咗封道歉信之後，我對住阿卡有啲尷尬，個心怯怯地，唔知點樣面對佢。

喺封信度，我寫到明自己暗戀阿卡，而家又要我哋好似兄妹咁相處，我真係唔多適應。

我把口就話冇嘢冇嘢，其實個心一直都放唔低。

每逢同阿卡出去傾生意，我都唔想由佢去介紹我，因為佢一定會話︰「呢個係我個私人助理，兼且係我個好細妹…」

我次次聽到呢句說話，個心都有啲唔舒服，因為我好唔想佢將我當係妹，我好唔想佢同人講我係佢個妹…

或者我太執著啦，太過介懷一個小小嘅稱呼，又成日將好多嘢放喺個心度，唔肯同人講，搞到身邊嘅人都唔知我諗乜…

孫皓月呀孫皓月，你唔好再胡思亂想喇，實實在在搞好揸勤仲好啦！

共48個回應

嗰個嘉美，真係壞透架喇！屈完我一次又一次，喺背後出陰招、耍手段，講大話唔駛眨眼，十足十嗰個紅姨！

雖然我自己都曾經做錯，但係我都識得認錯，我都識得內疚吖。

嗰個嘉美，為咗hold個function，為咗自己領功，竟然夾埋莎姨一齊設局，引我去醫院，等我錯失咗個function，令佢自己立大功！

你哋諗吓，阿卡係佢男朋友嚟架，佢竟然容許莎姨作故仔，話阿卡盆骨骨折，陷入昏迷狀態，隨時有生命危險！

諗得出呢啲奸招，就證明佢份人本質有問題！

仲有，我懷疑佢根本就唔鍾意阿卡，佢只係想利用阿卡，令到自己嘅事業發展得更順利。如果佢對阿卡係真心嘅，又點會一次又一次呃阿卡，隱瞞Ronald仔件事吖？男女朋友唔係應該坦誠嘅咩？

雖然佢設個局嚟裝我，但係我應承咗荷媽，唔再為嘉美嘅事嘈，所以我一路都啞忍。但係，受委屈嘅感覺真係好難頂。明知係俾人整蠱，都要忍氣吞聲，睇住班奸人陰陰咀笑，嗰種感覺真係幾難受。

不過，荷媽同阿卡都幫我出頭，為我攞番個公道。

其實，只要佢哋明白我係真心改過，就已經足夠，其他嘢根本一啲都唔重要！

荷媽，我以後會生生性性，俾心機做一個一百分嘅乖乖女！

阿卡，多謝你為我講說話。知道你心裡面唔好受，希望你盡快忘記唔開心嘅事啦！

共94個回應

「冇呀冇呀！我冇偽造信件！我冇冒認人！」「我冇講大話，你地鍾意點講就點講喇！」

唔知由幾時開始，我變到咁叻講大話…

理正氣壯、大條道理、連眼都唔眨！

喺全屋人面前認自己做錯？唔係啩，幾歹都同佢撐到”行”啦！

我死都唔認架！而家係佢屈我呀，做乜個個都啫住我喎？

佢係外人嚟架，我先係你哋屋企人呀！

我當時個心好複雜。我喺度諗，如果我認咗偽冒文件，即係等於輸咗俾嘉美，個個都會覺得佢啱晒，而我就喺度無是生非，搞風搞雨。所有嘅衰嘢都入晒我數，佢就變成最無辜、最受委屈嗰個。

我好驚，我唔敢認衰，我好驚輸俾嘉美！

但係原來，我唔係輸俾嘉美，我係輸晒屋企人對我嘅信任！

同嘉美嘈，只係意氣之爭；但係同荷媽嘈，同管家仔嘈，就係真真正正嘅傷害！

我竟然咁蠢，為咗一時意氣，狠狠地傷害我最親嘅人…

要誠心誠意認錯，就等於where爛晒塊面，話俾人聽自己有幾衰、幾賤！

不過，我心甘情願咁做…

喺親人面前，點解仲要講面子？喺親情面前，面子變得微不足道…

如果我where爛塊面，可以換番佢哋對我嘅信任，我where十次都得！

有乜嘢比佢哋更珍貴呀？有邊個可以好似佢哋咁，包容我、寬恕我、疼錫我？

從今開始，我認清楚，乜嘢係重要，乜嘢係唔重要。

共91個回應

莎姨終於走咗喇！成間屋即刻煥然一新，空氣清新咗好多添呀！莎姨走咗，耳根當然清靜晒啦，但係連阿慶都搬走埋，搞到我悶到死！

以前阿慶同我一間房瞓，我哋夜媽媽鍾意做乜都得。

我哋會傾吓啲女人經呀，敷吓mask呀，聽吓收音機呀…

而家佢嫁咗人，做咗人哋屋企嘅少奶奶，夜晚想搵佢傾吓偈都唔得啦，唔通夜媽媽走上人哋屋企，同阿Kelvin講︰「冇！我想搵阿慶傾吓偈啫…」Kelvin掃把我走到似！

唉…而家只可以約你出嚟食吓飯，邊有以前咁free吖！

阿慶呀，好掛住你呀！好唔捨得你呀！你咁快嫁人做乜喎！^^

不過咁，Kelvin都應該係個好老公嚟嘅，你搵到個好歸宿，家姐都戥你開心，祝你哋永遠幸福快樂啦，早日為甘家開枝散葉！（最緊要生番個肥肥白白嘅姨甥仔／姨甥女俾我玩呀！）

我就冇你咁幸福喇，成日都受到感情挫折，都唔知係個天玩我，定係我自己有問題！唉，睇嚟我都係冇人要架喇，實行買定姑婆屋，儲錢做老姑婆啦！

共92個回應