估唔到jo飽會記得咁耐之前嘅事…係阿慶講番，我先記得有呢件事…嗰時我哋仲好細個，jo飽應承我哋會做一個三十三吋嘅大月餅，後來過咗一排，大家就不了了之，完全忘記晒有呢件事。

真係估唔到，jo飽會將呢件事放喺心入面，仲一直記到而家。

其實，我哋六粒黐頭芒，個個都明白jo飽嘅心意，明白佢點解咁堅持要完成個大餅…

老實講，我已經冇再怪jo飽…以前嘅事就由得佢過去啦，我唔會將啲唔開心嘅嘢放喺心度，咁樣只會越嚟越辛苦。

Jo飽，你唔駛咁內疚架，我哋冇諗過你要為我哋做啲乜嘢，只要你得閒多啲上嚟食飯就夠架喇！聚天倫之樂係天經地義架嘛！

★ ★ ★ ★ ★ ★ ★ ★ ★ ★ ★ ★ ★ ★ ★ ★ ★ ★

今日，阿卡請咗嘉美做特別助理，即係話公司又要多一筆開支。

其實根本就唔需要兩個特別助理咁多，請埋嘉美咪盞啲人閒言閒語，話嘉美靠親戚關係上位，唔係靠自己嘅實力。

仲有呀，佢又唔熟公司啲嘢，請佢番嚟，我咪又要花時間教佢！

阿卡真係多此一舉！

咪見到人幾索就暈晒大浪先得架，笠亂請個人番嚟，可能會搞”禍”公司啲嘢架嘛！到時咪又要我執手尾！

你個阿卡，仲任性過我呀！哼！

共43個回應

我覺得阿卡好勇敢呀！佢當住全世界人面前，承認自己嘅錯誤，呢個行為真係需要好大嘅勇氣！我之前都試過離家出走，搞到荷媽佢哋好唔開心。嗰次之後我明白到，做錯嘢係好容易，但係認錯就好難！阿卡喺咁多人面前認錯，爆出當年紅姨流產嘅真相，的確係勇氣可嘉！

前幾日，當我知道阿卡接受咗紅姨嘅offer，包晒家好月圓嘅廣告嚟做，我真係覺得佢好冇骨氣，對佢好失望。

如果揸勤真係要包晒家好月圓啲廣告做，就等於做咗餅舖嘅子公司，事事都會受到掣肘，尤其是會俾紅姨控制住公司嘅發展。

但係，阿卡終於都冇令我失望，佢喺大庭廣眾篤晒紅姨啲衰嘢出嚟，真係大快人心！

阿卡，你好型呀！做阿妹嘅直頭以你為榮呀！

不過，型仔還型仔，公司啲問題始終都要解決架。

好啦！從今日開始，我就加倍努力，幫公司搵多啲客仔，直至度過難關為止！

唔…打住咁多先啦，要開始做份proposal喇！

等我都用番你首歌嚟勉勵吓自己先︰「我要努力向上，不枉諸君寄望…」

共148個回應

嗰個紅姨，十幾年前呃咗家好月圓嘅招牌，將自己間餅舖搞到上晒軌道，而家失驚無神話讓晒啲股份俾阿卡佢哋。我本來都覺得應該嘅，家好月圓好應該由佢哋幾兄弟姊妹打理番，佢哋好應該攞番屬於自己嗰份。不過，見到荷媽咁堅持，我而家都唔贊成佢哋番家好月圓。

我唔係盲目咁聽荷媽講架，我都有分析過架。

紅姨份人，最鍾意霸住人哋啲嘢唔肯放，佢十幾年前搶走jo飽，拆散咗我哋頭家，仲可以覺得自己冇做錯！咁樣嘅人，點會咁好死，讓番間家好月圓俾我哋吖？雖然橫睇掂睇，我都睇唔出佢耍咩嘢花樣，不過，我相信荷媽嘅判斷，佢睇人好少睇錯架！

管家仔佢哋我就唔擔心，我最擔心就係阿卡！揸勤啲生意一啲起色都冇，再係咁落去我都唔知可以捱到幾耐。

我最驚阿卡真係答應紅姨，返番家好月圓度做，到時又唔知會有啲咩陷阱喇！

你知啦，紅姨好多手段架嘛！

雖然今日食飯嘅時候做咗眾矢之的，俾嫲嫲同jo飽噴到一面屁，不過我一啲都唔介意！因為我知道，所有嘢都係個女人搞出嚟嘅，佢想分化我哋屋企。

就係咁我先至唔會俾佢得逞，如果我真係放喺心度嘅，就正正中咗佢嘅奸計！

先頭再同阿慶解釋多次，佢都明白我嗰句唔係故意嘅。

我哋兩個好姊妹點會咁容易俾人離間到吖！

共36個回應

今日係揸勤搞第一個function嘅大日子，小女子身為月薪二萬五嘅總經理助理，梗係會同甘總經理並肩作戰啦！本來個function嘅所有細節都plan好晒架喇，大家都好有信心會成功。之不過，我哋臨開show先發現，拉姐出高價挖走晒我哋啲新人。個function話到明會見證三十八對新人嘅婚禮架嘛，點知最後竟然連一pair都冇喎，揸勤個名想唔衰都難啦！

好彩，我哋成家人總動員，幫手搵新人做嘉賓，最後仲搵到一對人瑞夫婦添，都算幾有gimmick吖！放心喎阿卡，揸勤嘅第一炮唔係放空炮呀，係放響炮呀，仲要係打響個名堂嗰隻呀！

嗰個”易拉柴”諗住搞”禍”我哋個function，點知我哋反而做得更好喎，今次仲唔激死佢！我諗佢而家喺度dum緊心口呀，哈哈！

而家好想聽番佢個錄音添︰「你解釋啦！解釋呀！解釋！解釋！解釋呀！」

哈！諗番起佢嗰日俾阿卡玩，真係大快人心！

經過今次嘅function，jo飽同荷媽嘅感情好似增進咗一大步，希望佢哋可以喺番埋一齊啦！不過，嗰個衰女人一日棟喺度，我哋屋企就永冇家好月圓嘅一日！

Jo飽呀jo飽，你快啲改邪歸正，返過嚟我哋呢邊啦，我哋幾時都咁歡迎你架！

共55個回應

前嗰排，阿卡沈迷炒股，搞到連返工時間都顧住啲股票，正經嘢又唔做，嗰陣時荷媽同我都好擔心佢。後來，唔知好彩定唔好彩，阿卡炒輸咗股票，爭人六十萬孖展數，仲冇埋份工添。經此一役，佢終於痛定思痛，應承我唔再掂股票。我仲喺佢手臂上大力咬咗一啖，希望佢緊記呢次教訓。我以為佢真係會改過，但係今日又俾我發現佢同管家仔借咗三萬蚊。佢話嗰三萬蚊係用嚟租新屋喎，但係後尾又俾我發現佢講大話。嗰一刻我真係好嬲佢，我以為佢又玩番股票，完全唔守自己嘅承諾。

於是我就整蠱佢，扮打電話，將佢嘅事報告俾荷媽聽。不過，我真係估唔到佢會有咁大反應。我一收線，佢就連眼淚水都颷埋出嚟！然後仲要粒聲唔出走入電話亭…

我諗我呢次真係怪錯咗佢，我相信佢真係下定決心戒除股癮！以後無論點樣，我都要相信佢，支持佢，幫佢洗乾淨”揸沽”呢個花名！

阿卡就開始重新做人嘞，不過我就要開始小心做人！自從拉姐炒咗佢之後，我喺公司真係苦不堪言呀！拉姐習慣咗每日都要鬧吓人，唔係就唔舒服架喇，但係阿卡走咗之後，就冇人俾佢鬧，於是佢咪搵著我嚟鬧囉！明明個project都唔趕嘅，佢就專登隔幾個鐘頭催你一次，慌死做你唔死咁款！

唉！冇辦法啦！頂唔順都要頂架喇，鬼叫我係打工仔咩！

共56個回應

真係估唔到jo飽會喺法庭上擘大眼講大話！無論佢喺庭上講到幾理直氣壯，真相係點，佢自己心知肚明！

公公話佢係賤格佬，莎姨話佢係負心人，通通都冇講錯！

我對佢真係好失望，點解佢要企喺隻狐狸精嗰邊？

雖然佢係我阿爸，但係佢嘅所作所為…似係一個長輩會做嘅事咩？佢值得我哋尊重咩？

雖然莎姨份人衰衰格格咁，但係都識得幫我哋爭取，攞番我哋應有嘅嘢！

就算佢嘅出發點唔係完全為我哋，佢都會戥荷媽同公公唔抵啦！

但係jo飽就完全唔會！佢根本就冇考慮過我哋呢邊，淨係顧住嗰邊嘅家好月圓，乜都聽晒紅姨講，喺法庭上大條道理，歪曲事實！

佢變得越嚟越衰喇，我對佢真係好失望！

共41個回應

最近，因為入咗阿卡公司度做，同佢傾多咗以前細個嘅事。原來嗰個紅姨唔係咁簡單架！

我開頭以為，紅姨同莎姨係同一類人，大家都最叻搞風搞雨，離間眾人感情。

但係，我而家發覺，紅姨比莎姨虛偽十倍、奸詐十倍、陰毒十倍！

由佢搶走jo飽嗰日開始，佢已經不斷盤算，用盡方法分化阿卡佢哋！

難為jo飽仲覺得而家嘅生活好幸福，又話咩三代同堂、妻賢子孝！

希望佢有朝一日會醒番，睇清楚個女人嘅真面目！

★ ★ ★ ★ ★ ★ ★ ★ ★ ★ ★ ★

喺阿卡間公司做咗一排，發覺Eliza真係唔係人咁品！

我自問都夠勤力架啦，佢都可以喺雞蛋裡挑骨頭，又成日發脾氣，搞到我日日返工都提心吊膽，驚住做錯啲乜嘢，又要俾佢省！

好彩，我只係阿卡嘅助理，唔係直接under佢嘅，所以就算拉姐發火都有阿卡幫我受晒。

不過，阿卡就冇我咁驚青，佢就算天跌落嚟都可以當被冚嘅，成日喺公司同人講股票啲嘢，當拉姐冇到咁款！

今日又係咁喇，佢同個清潔阿姐講股票經，傾到興起之際，俾拉姐當場捉住，然後拉咗入房慢慢審！

我諗住佢今次劫數難逃啦，哈，點知隔咗冇幾耐，佢就施施然咁行出房，仲笑騎騎咁嘅樣，得戚到佢吖！

究竟點解拉姐咁維護佢嘅呢？莫非真係因為…

共37個回應

公公、荷媽、管家仔、阿慶，對唔住呀！我知錯喇！我唔應該咁任性，自把自為搬出去住…

我唔應該唔聽你哋電話，唔俾你哋關心我…

我唔應該跟番嗰個衰男人，搞到你哋咁擔心我…

我唔應該匿埋唔見你哋，搞到你哋要撲嚟撲去，擔驚受怕…

千萬個唔應該，令到我好內疚，覺得好對你哋唔住。

我覺得自己好傻呀，竟然為咗個閒人而搬出去住。

呢個係我屋企嚟架，我點解要為咗某人嘅冷言冷語而放棄我嘅家人啫？

頭先，我匿埋喺電話亭入面喊，見到公公同荷媽佢哋喺出面，好緊張咁周圍撲，嗰時我真係無地自容。

公公一直都將我當係孫女咁看待，但係我竟然將佢嘅一時氣言放喺個心度。佢都咁大年紀嘞，點解我仲要同佢斤斤計較呢？

當公公低聲下氣同我講對唔住嘅時候，我先發覺自己係幾咁不孝。公公同荷媽由細養到我大，從來冇將我當係外人！就算當年荷媽離婚，佢都冇唔要我！而家我竟然咁任性，搞到佢哋咁擔心我，我真係好後悔呀！

我一路聽緊Eason嘅《Shall We Talk》，一路反省緊自己嘅過錯。由今日開始，我要重新上學堂，學吓點樣關心身邊嘅人，希望有朝一日，我可以為佢哋付出更多！

共76個回應

我覺得好委屈呀！莎姨問公公借咗四十萬，嗰筆錢係荷媽咬緊牙關，辛辛苦苦儲番嚟架！我質問莎姨有咩唔啱喎！我真係唔信佢會善用呢筆錢，佢一定會亂咁fing，最後fing到一毫子都冇！以佢嘅性格，佢一定會咁做！

我只係唔想荷媽辛苦儲落嘅血汗錢化為烏有啫，咁都有錯？點解要我同個衰人道歉喎？佢雖然係我嘅長輩，但係佢唔配受人尊重！佢自己都唔識尊重人，有乜資格要求其他人尊重佢？就算我笑佢賣淫為樂，咁又點啫？佢夠成人笑阿慶係啞妹，笑我係攞女啦，唔通我哋又可以要求佢道歉？

莎姨份人根本就有問題，人地傷心佢就快樂，佢根本就係以hurt人為樂，以hurt人為嗜好！我而家以其人之道，還治其人之身，有咩唔啱喎？點解要我道歉喎？

我越嚟越覺得自己成個外人咁呀！我根本就唔屬於呢個屋企！我係孤兒嚟架咋，係荷媽攞番嚟養嘅”攞女”呀！由細個到而家，我都只係一個孤兒！公公今日已經講得好清楚，佢唔當我係一家人，佢唔想我理佢哋嘅家事…

我應該一早就明白，我只係一個”攞女”，我冇資格理荷媽一家嘅事，更加冇資格理公公借錢俾邊個！就連莎姨都同佢哋有血緣關係呀，成間屋剩係得我係同佢哋一啲關係都冇！

我頂唔順喇，我唔可以再同呢個人同枱食飯喇！我一見到佢個得戚樣就想作嘔呀！

共108個回應

今晚，「家好月圓慶中秋」七個人齊晒章，一齊同公公食團年飯。大家諗住一家人開開心心食飯啦，點知飯都未食完，紅姨同嫲嫲就趕到嚟，仲同荷媽鬧咗場大交！

最後，蓮子蓉爆咗個大秘密出嚟︰原來當年全叔叔跳樓，根本就唔關荷媽事，叔叔係因為感情失意，一時睇唔開，所以先至跳樓。

但係嫲嫲同jo飽一直都誤會咗荷媽，以為係荷媽間接害死叔叔，所以十幾年嚟都嬲咗荷媽。尤其是係嫲嫲呀，佢特別錫全叔叔架。自從冇咗個孻仔之後，佢對荷媽簡直係恨之入骨，差唔多見親面都嗌大交！

荷媽食咗呢隻死貓咁多年，受咗十幾年嘅委屈，今日終於都平反喇！

不過我真係戥荷媽唔抵，白白內疚咗十幾年，仲要因為個誤會而冇咗個老公，冇埋頭家，而家諗番轉頭，越嚟越覺得個天喺度玩緊我哋一家，要我哋白白分散十幾年！

而家真相大白，大家都好應該還荷媽一個公道！

可惜，jo飽同嫲嫲好似唔多信蓮子蓉嘅說話，當佢喺度生安白造，再加上嗰個紅姨一定會煽風點火，火上加油，到時呢個天大嘅誤會就更加難化解喇！

共1個回應