我哋一家嘅故事終於都去到尾聲，咁多年以嚟嘅風風雨雨，終於得到平息！我真係好感恩，我冇諗過可以有個咁錫我嘅老公，冇諗過會有個咁幸福嘅家庭，更加冇諗過破碎咗十年嘅家可以破鏡重圓，如果嫲嫲仲在生，佢一定會好開心，好安慰，不過，我諗佢喺天上見到我哋咁幸福，都會笑到見牙唔見眼架！

我哋一家唔經唔覺經歷咗咁多風浪，回想番就好似發咗場夢咁！

引起事端嘅罪魁禍首–紅姨，最後得到佢應有嘅懲罰。不過，我哋都已經原諒咗佢，畢竟佢係阿秋嘅媽咪，而且臨老先至冇咗頭家真係好慘架！以前嘅一切恩怨，都已經係過去嘅事，邊個啱邊個唔啱，又駛乜咁在意呢？

做人要向前看，唔好咁執著，要學識放開，呢啲都係Kelvin教我嘅！

而家我最在意嘅事，就係要做一個好媽媽，好好湊大仔仔，用心教好佢。

荷媽，拜託你喇，以後你要幫我教好仔仔，同埋教我點樣教好個仔呀！因為全靠你呢個好媽媽，先至有我哋呢班咁乖嘅仔女，所以呢，你係天下間最好嘅阿媽，你就最有資格教我點樣做個好媽媽，我以後聽晒你話架喇！

共26個回應

法官宣判，jo飽攞到家好月圓嘅20%股份，紅姨就攞到80%，即係話紅姨贏咗場官司。不過，我哋全家不但止冇唔開心，而且仲好興奮，因為jo飽同荷媽終於復合喇！

全靠呢場官司，俾咗個機會jo飽，等佢可以喺庭上真情剖白，打動咗荷媽，我哋頭家先可以破鏡重圓咋！我哋一家都要多謝紅姨呀！

雖然紅姨死心不熄，提出上訴，但係就算俾佢上訴到終審庭，jo飽同荷媽都唔會再分開架喇，我哋六粒黐頭芒都唔會再變做孤兒仔孤兒女架喇！

嫲嫲，你喺天上面見唔見到我哋一家重圓呀，你戥唔戥我哋開心呀？

遲啲等BB出世，我哋就可以三代同堂，jo飽同荷媽就可以弄孫為樂，公公就可以抱「塞」為樂，阿月佢哋就可以玩「甥」為樂，全家人都可以開開心心，以BB為樂！BB呀BB，你一出世就有咁多人錫，一定幸福死你啫！

而家個肚越嚟越大喇，好想BB快啲出世，快啲投入呢個wonderful world！

共7個回應

嫲嫲你唔好走呀，你仲未睇到個「塞」出世架，你點可以咁快就走架…

點解你咁快就丟低我哋？乜你捨得我哋咩？

嫲嫲，你係咪仲有好多嘢想同我哋講呀？

你臨去嘅時候一定想講好多嘢，但係我哋一句都聽唔到呀？

我感得好遺憾呀，連嫲嫲最後一句說話都聽唔到！

點解要同紅姨講咁耐喎？你哋有乜嘢要傾咁耐喎？

有乜嘢緊要得過同班孫仔孫女講byebye？

嫲嫲，雖然我再聽唔到你講嘢，但係當我聽到呢首歌，我都會感受到你嘅心意︰

《月亮代表我的心》
你問我愛你有多深
我愛你有幾分
我的情也真 我的愛也真
月亮代表我的心

以後，當我見到天上面嘅月亮，我都知道嫲嫲你望住我哋，你會好似個月亮咁，照住我哋，祝福我哋…

我的嫲嫲是月亮，永永遠遠都一樣！

共22個回應

今日，Kelvin陪我去醫院照超聲波，中途經過一間商場，入面搞緊一個BB爬行比賽，有好多BB參加，場面好熱鬧！我見到啲BB，個個都好得意，肥嘟嘟、白雪雪咁樣，真係好想搣吓佢哋嘅面珠仔呀！Kelvin企喺我隔離，不知睇得幾肉緊，當正啲BB係親生骨肉咁，猛咁嗌「加油！努力！」嗌到把聲都拆埋，真係冇佢收！

我望住啲得意BB，又望吓佢哋嘅父母，發覺佢哋有個共通點，就係個個個樣都好殘，女嘅就有黑眼圈，男嘅就鬚根盡現，冇一個係精精奕奕嘅，喺旁邊圍觀嘅觀眾仲興奮過佢哋！

鬼咩！啱啱做人父母，實係冇覺好瞓架啦，BB唔識性架嘛，佢唔知你瞓緊覺架，總之佢想食就食、想喊就喊、想痾就痾，話之你瞓緊啦！

所以，湊大一個BB真係唔容易，要養大佢就更加難，如果要教好佢呢，就難上加難！我開始佩服荷媽，有本事湊大六個仔女，仲要教到個個都咁乖添！

唔知我有冇資格做一個好媽媽呢？我有晒心理準備架喇，預咗有黑眼圈、橙皮紋，同埋大肚腩，不過無所謂吖，為咗BB，走樣咪走樣囉！

共30個回應

究竟發生啲咩事呀？點解啲唔好嘅嘢會接二連三咁發生？先有jo飽視網膜脫落，跟住嫲嫲又入醫院，而家連阿卡都話有咩隱性心臟病…

啲病痛好似約埋一齊咁，一次過搞到佢哋齊齊入院。

我哋成家人，喺間醫院度騰上騰落，探完呢個又探嗰個，擔心完呢個又要擔心嗰個，我就嚟頂唔順喇！

荷媽同我講，就算幾咁頂唔順都要撐住，jo飽、嫲嫲同阿卡都需要我哋嘅支持！

無錯！荷媽講得啱，雖然我哋唔係醫生，但係佢哋都好需要我哋嘅support！

尤其是jo飽，當佢知道阿卡心臟病發，第一時間關上房門，唔俾我哋見佢，因為佢驚住連累我哋，佢驚個天為咗懲罰佢拋妻棄子，會將啲報應報落班仔女度。Jo飽呀，荷媽講得啱架，你點知個天諗乜啫，你點可能猜度到個天想點？

可能個天想你有報應，又可能佢想你將功補過，想你更加愛錫屋企人呢！

Who knows？

共18個回應

有一個小生命喺我身體入面生長緊，個感覺好奇妙！就算係Kelvin，都唔可以好似bb咁，同我如此親密。

因為bb就住喺我身體入面，同我連成一體！

奶奶知道我有咗之後，開心到瞓唔著，佢話個bb腳頭好，令到佢啲腎功能指數都靚仔咗！

管家仔佢哋知道我有咗，個個都好興奮，莎姨仲教大家玩親人枚，話要教個bb認親人喎！

Kelvin知道自己就嚟做人爸爸，一開始都好雀躍，之後佢就攬住我，同我講︰「嚟緊呢段日子，要辛苦你喇！」

講完之後，佢就摸摸我個頭，然後開著部CD機，播咗Louis Armstrong嘅”What a wonderful world”嚟聽。

佢話喎，bb仔識得聽架，我哋要話俾佢知，呢個世界係好wonderful，所有人都等緊佢出世，好期待同佢見面！

我忍唔住笑咗一下，然後俟住佢嘅膊頭，一齊聽歌。

嗰一刻，我覺得自己好幸福！bb，你將來都會好幸福架！

共19個回應

管家仔同于素秋真係好夾架，我唔明白點解硬係要阻止佢哋一齊！事實上，佢哋兩個根本一啲血緣關係都冇，唔好講到亂倫咁難聽啦！

再者，佢哋細個嘅時候已經拍過拖，只係因為于素秋要去外國讀書，管家仔先至逼於無奈同佢分手！

佢哋兩個不嬲都有深厚嘅感情，點解要阻止管家仔關心于素秋喎？

講到尾，都係紅姨自私！

佢唔想管家仔做佢女婿，唔想同荷媽有咩關係，唔想阿秋成日黐埋嚟我哋呢邊，於是就強硬地阻止阿秋見管家仔，你話佢係咪好自私吖！

阿秋咁大個人，自己識得分析，亦有自由選擇，無論佢最後揀邊個，我哋都應該尊重佢嘅決定，唔係將自己嘅意願強加喺佢身止，咁樣佢會好痛苦！

如果紅姨真係錫個女嘅，就唔應該縛住佢，唔俾佢搵自己嘅幸福！

共32個回應

阿月份人係衝動啲，但係佢心腸唔壞架，大家唔好當佢係搞風搞雨嘅是非精啦，唔係架，阿月唔係咁架！今次件事，就算佢真係有錯，我都相信佢唔係專登架！

你哋試諗吓，嘉美未返嚟嘅時候，阿月同阿卡相處得好開心架！

但係，嘉美嘅出現，令到阿月同阿卡嘅關係變得好惡劣，嘉美就好似要取代阿月咁，喺公事上做得比阿月好，喺感情上又同阿卡發展緊，一切就好似衝住阿月而嚟咁，搞到佢好唔開心！

可惜我結咗婚，唔可以好似以前咁，成日陪住佢，同佢傾計，如果唔係我會阻止到阿月，唔會俾佢做錯事！

為咗呢件事，阿月已經where爛塊面，向荷媽認錯，亦都流咗不少眼淚，希望大家以後都可以和平相處，屋企唔好再咁多是非喇！

共36個回應

上網搵到一篇幾得意嘅對話，唔知你哋睇過未呢？我覺得好搞笑呀！<結婚前的對話>

男：太好了！我期盼的日子終於來臨了！我都等不及了！

女：我可以反悔嗎？

男：不，你甚至想都別想！

女：你愛我嗎？

男：當然！

女：你會背叛我嗎？

男：不會，你怎麼會有這種想法？

女：你可以吻我一下嗎？

男：當然，決不可能只有一下！

女：你有可能打我嗎？

男：永遠不可能！

女：我能相信你嗎？
至於結婚後的對話，就係由下而上咁睇嘅…

哈哈！睇唔睇到呀？

★ ★ ★ ★ ★ ★ ★ ★ ★ ★ ★ ★ ★ ★ ★ ★

好喇！搞完笑嘞，講番啲正經嘢先！

記得有一次，我同于素秋、管家仔一齊食肥牛粉絲煲。

食食吓，我同阿秋講，覺得自己同Kelvin嘅距離好大，因為佢學歷高過我，而我又講唔到嘢。然後，阿秋同我講，我同Kelvin嘅差距只係身高上差一兩吋，其他就乜都冇架喇！

當時我聽到佢咁講，個心安定咗啲，開始對我同Kelvin嘅關係有番信心！

而家，我已經做咗Kelvin老婆，兩個人日對夜對，大家都唔覺得悶，而且仲覺得好sweet添！奶奶對我都好好，當我係親生女一樣，得閒又會約荷媽出嚟，傾吓啲父母經，緬懷一下過去，不知幾投契！

不過，我成日會諗，呢種美滿嘅生活，究竟會last幾耐呢？

將來仲會唔會咁幸福呢？

Kelvin會唔會好似上面段對話咁，結婚前一個版本，結婚後又另一個版本呢？

諗吓諗吓…發覺自己好傻呀！

將來嘅事邊個會知啫，最緊要活在當下，珍惜現在有嘅一切，咁咪無憾囉，係咪？

共51個回應

半夜三更瞓唔著，望出窗外嘅天空，見到一個又大又圓嘅月亮。個天越暗，個月亮就越皎潔、越明亮。

我深呼吸咗一口氣，覺得半夜嘅空氣好清新、好舒服、好寧靜。

好似冇晒所有煩惱，只有滿足嘅感覺。

我覺得，今年嘅中秋節，月光特別圓之餘，仲特別甜。

甜就甜在一家人一齊整月餅，跟住一齊食月餅、講爛gag、慶祝中秋節。

最甜嘅係，有人失驚無神攞住紥花，攞住隻戒指，好有誠意咁向我求婚！

因為佢平時好少做呢啲嘢架，所以今次真係好surprise呀！

佢仲講咗個月亮的故事，話咩個月亮會關照佢喎！

哈！乜月亮都會關照人嘅咩？傻瓜！

不過你想像力咁高，都算合格做甘詠慶嘅老公嘅，起碼估到我想講乜，唔駛我下下做手語嘛！

★ ★ ★ ★ ★ ★ ★ ★ ★ ★ ★

Kelvin，答應嫁俾你，只係一兩分鐘嘅事，但係雙方嘅承諾，係一生一世。

我希望可以同你互相倚靠，一齊走將來嘅路…

共38個回應