今日，Kelvin陪我去醫院照超聲波，中途經過一間商場，入面搞緊一個BB爬行比賽，有好多BB參加，場面好熱鬧！我見到啲BB，個個都好得意，肥嘟嘟、白雪雪咁樣，真係好想搣吓佢哋嘅面珠仔呀！Kelvin企喺我隔離，不知睇得幾肉緊，當正啲BB係親生骨肉咁，猛咁嗌「加油！努力！」嗌到把聲都拆埋，真係冇佢收！

我望住啲得意BB，又望吓佢哋嘅父母，發覺佢哋有個共通點，就係個個個樣都好殘，女嘅就有黑眼圈，男嘅就鬚根盡現，冇一個係精精奕奕嘅，喺旁邊圍觀嘅觀眾仲興奮過佢哋！

鬼咩！啱啱做人父母，實係冇覺好瞓架啦，BB唔識性架嘛，佢唔知你瞓緊覺架，總之佢想食就食、想喊就喊、想痾就痾，話之你瞓緊啦！

所以，湊大一個BB真係唔容易，要養大佢就更加難，如果要教好佢呢，就難上加難！我開始佩服荷媽，有本事湊大六個仔女，仲要教到個個都咁乖添！

唔知我有冇資格做一個好媽媽呢？我有晒心理準備架喇，預咗有黑眼圈、橙皮紋，同埋大肚腩，不過無所謂吖，為咗BB，走樣咪走樣囉！

共32個回應