件事終於到解決咗，我同于素秋嘅「情侶」關係終於可以正式落畫，而管家仔佢哋一家人亦都攞番晒屬於佢哋嘅嘢，見到于素秋完成到自己嘅心願，而且可以同管家仔再喺番埋一齊，我個心都安樂晒。其實當于素秋叫我同佢扮復合嘅時候，我真係好擔心。雖然我同于素秋只係做戲，目的完全係為咗幫JO飽拎番屬於佢哋一家人嘅嘢，但係搞到又派帖又擺酒，我真係唔知管家仔會點諗件事，就算佢第日知道所有嘢都係做戲，佢會唔會嬲于素秋隱瞞佢呢？佢又會唔會唔相信我同于素秋係清清白白，完全只係做戲，而唔係舊情復熾呢？我真係好擔心，但睇嚟我嘅擔心都係多餘嘅，管家仔知道咗件事唔單止冇嬲，仲好大方咁應承俾我同于素秋繼續做朋友，佢仲話第日會同于素秋一齊上嚟探少甜。呢個時候，我終於都知道自己同管家仔最大嘅分別係乜嘢。管家仔對于素秋係100%嘅信任同埋接納，而我呢，我只係識得去隱瞞，令對方傷心。好似于素秋呢啲咁好，咁肯為人犧牲嘅女仔，只有管家仔先配得上，佢哋真係天作之合，我相信，佢哋將來會好幸福，我亦都相信我會同佢兩個成為一生一世嘅朋友。

共48個回應

今日，于素秋上咗嚟我屋企陪我隻狗少甜玩，我睇得出佢好唔開心。佢同管家仔雖然真心相愛，但係佢哋一個係荷媽同JO飽嘅仔，另一個喺紅姨嘅女，兩家人嘅關係搞到咁僵，佢哋就好似羅密歐與茱莉葉咁，喺埋一齊需要承受好大嘅壓力。作為于素秋嘅前男友，一個深愛過佢嘅男人，我真係好希望于素秋能夠幸福，但係我知道佢嘅幸福已經同我無關，能夠俾到幸福佢嘅人就只有管家仔一個。

我問于素秋，佢同管家仔到底發生咗乜嘢事，如果只係家庭嘅問題，其實根本唔需要在意，雖然我哋唔可以選擇自己嘅父母，亦都冇能力去解決佢哋之間嘅問題，但係我相信所有父母都錫自己嘅仔女，雖然紅姨同JO飽嘅關係好差，但係只要于素秋同管家仔係真心相愛，終有一日，佢哋嘅父母都會為咗對仔女放低成見。但係于素秋話如果佢同管家仔本身冇問題，就算父母幾咁仇視對方都唔會影響到佢哋。咁到底佢哋之間仲有啲乜嘢問題呢？我問于素秋個問題係咪同我有關，佢唔出聲，咁即係默認啦！會唔會係管家仔誤會咗我同佢嘅關係，以為我哋又再喺埋一齊呢？我係咪應該去搵管家仔，好好同佢解釋清楚呢？

共9個回應

今日于素秋嚟搵我，佢話佢已經知道詠琳過咗身，佢問我當日到底點解要揼低佢，係因為我真係揀咗詠琳，定係因為其他原因。本來我唔想講個真相出嚟，我知道佢好艱難先戒得甩我，而家仲同對佢非常好嘅管家仔喺埋一齊，如果我而家先話俾佢聽我係唔忍心丟低詠琳一個喺英國等死，于素秋一定會原諒我。我寧願佢呢世都嬲我當日不辭而別，咁起碼唔會影響到佢同管家仔嘅感情。我已經傷害得佢太多，我而家唯一可以為佢做嘅就只有保留呢個秘密。

但係紙係冇辦法包得住火架，就算你幾努力去死忍唔講個真相出嚟，如果件事註定要穿，想冚都冚唔住。我又邊會估到，于素秋竟然會遇到詠琳嘅媽咪，知道詠琳有病呢件事吖？個天對我身邊所有女人都好殘忍，詠琳有紅斑狼瘡症已經好痛苦，佢最後仲要死喺手術室度，佢得三十零歲架咋，佢應該仲有好長嘅路可以行架。而于素秋，佢同我喺埋一齊喺佢一世人最大嘅痛苦，如果佢唔知個真相，佢就可以憎我一生一世，但個天偏偏又要俾佢遇到詠琳嘅媽咪。呢兩個女人都係好好嘅人，佢哋應該幸福架，如果真係有人需要承受痛苦，嗰個人都應該係我，因為我實在錯得太多嘞，所有嘅苦應該要報喺我一個人身上，但係個天偏偏要令呢兩個女人都受苦，點解上天要咁無情吖？點解呀？

共49個回應

我同詠琳、于素秋已經拖拉得太耐，我對呢兩個女人造成嘅傷害亦都太多。管家仔講得好啱，我徘徊喺恩情同愛情之間，根本就唔係偉大，我只係唔想解決個問題。由始至終，我都係咁自私，一方面想得到愛情，另一方面又唔想做衰人，拋棄一個為我犧牲咗好多嘢嘅女人。但係我知道呢件事始終有一日要解決，既然係咁，不如就早啲為我哋三個人嘅故事寫一個結局。

愛情同恩情，喺呢兩個煩擾咗我好耐嘅選擇裡面，我揀咗後者。詠琳為我犧牲嘅實在太多，我唔可以喺呢個時候丟低佢，由得佢一個人孤零零咁返去英國。既然已經揀定咗，就唔可以再猶豫。我太清楚自己嘅性格，如果俾我見到于素秋，我可能又會動搖，所以我一定要徹徹底底咁離開佢，咁樣對佢都係一件好事，于素秋見我唔到，佢就可以慢慢咁淡忘我，喺呢一段痛苦嘅愛情裡面解脫。我知道咁樣做好殘忍，但係我亦都知道佢一定可以過渡到，因為喺佢身邊有一個比我好好多嘅男人陪住佢，我相信管家仔一定可以帶佢走出陰霾。

共67個回應

伯母講得好啱，我再係咁拖落去對于素秋同詠琳都唔公平，既然一定要對其中一個唔公平，我寧願同一個自己真正鍾意嘅人喺埋一齊，因為我知道如果我繼續同詠琳一齊嘅話，我同于素秋都會有遺憾，亦都剝削咗詠琳搵到真愛嘅機會，咁對三個人都唔好。而如果我揀于素秋，我會辜負咗詠琳之前為我做嘅一切，但係我既然唔鍾意佢，夾硬拖住佢只係一種為咗令自己好過而更加唔負責任嘅行為。所以，我相信呢個係最好嘅決定。

但係想了結一件事並唔係唔簡單，我以為只要立定決心，唔好再搖搖擺擺就可以唔再傷害到呢兩個女仔，但係有啲傷害原來係一生一世架。于素秋話詠琳搵過佢，仲講咗一樣連我都唔知道嘅秘密俾佢聽。原來詠琳喺英國嘅時候有咗我嘅BB，但係佢為咗唔拖累我竟然去墮胎，仲因為咁而變成不育。我知道咗呢件事之後真係好震驚，點解佢要瞞住我，唔話俾我聽？如果呢個秘密早啲穿，又或者我永遠都唔知呢個秘密，一切都會唔同，我亦都唔需要咁迷惘，但係點解偏偏要喺我立定決心嘅時候，先俾我知道呢件事吖？我真係好嬲詠琳，嬲佢嘅自私，亦都嬲佢嘅偉大。但係我知道，我唔應該嬲佢，因為喺呢段愛情故事裡面，虧欠得其他人最多嘅一定係我，所以，我冇嬲任何人嘅資格。

共26個回應

今日于素秋嘅媽咪嚟搵過我，佢話于素秋好唔開心，求我去睇吓佢。其實我又點會唔想睇吓佢點吖？我恨不得可以立即企喺佢面前，但係我可以咁做咩？乜我真係可以咁自私淨係諗自己想點，而唔諗吓于素秋嘅未來咩？我打過好多次電話俾佢，但係佢一個電話都冇覆我，我知道佢咁做係為咗戒甩我。我已經好不負責任咁同佢開始咗，我唔可以再不負責任咁要佢呢一世都鍾意我。既然佢已經落咗決定，我好應該支持佢，就算咁樣會令我個心好痛，但係我知道我唯一可以為佢做嘅就係唔再搵佢，等佢可以慢慢忘記我，重新過番一啲正常而開心嘅生活。

我原本已經立定決心，無論幾辛苦都要迫自己離開于素秋，但係見過伯母之後，我又開始猶豫。伯母話佢已經知道晒詠琳嘅嘢，佢話如果命中注定我同于素秋係一對，而我就為咗報恩同埋責任而揀咗詠琳，咁到最後我同于素秋都唔能夠同自己最愛嘅人喺埋一齊，最後只能夠帶住呢個遺憾一世。我一直以為只要放棄于素秋就係等於救佢離開呢個困局，但原來咁樣做唔單止我會痛苦，連佢都會痛苦。如果我揀于素秋就係對唔住詠琳，但係我揀詠琳亦都會對唔住于素秋，究竟，我應該點做？

共34個回應

我知道我冇權利再去搵于素秋。既然我唔可以下定決心同詠琳分手，我仲搵佢做乜吖？但係一段感情真係可以話放低就放低咩？于素秋係我第一個真心鍾意嘅女仔，就算我明知同佢一齊只會傷害到佢，我都冇辦法迫自己放低佢。可能我真係太自私，但係人本來就係自私，尤其是對於愛情，又有邊個可以偉大到完全唔考慮自己？我真係好想同于素秋講一聲我對佢係認真嘅，我對詠琳真係只有義，一啲愛情都冇，唔通因為我同佢行咗七年，因為我識佢先於于素秋，我就一定要揀詠琳咩？愛情冇先後之分，只係分愛同唔愛架咋。我好想同于素秋講，可惜佢一直避開我，唔肯聽我電話。

我以為我唔會有機會再同佢講，但係好多嘢都好似注定咁，雖然于素秋唔肯聽我電話，都要我同佢竟然喺餐廳度撞到。只不過我哋遇得唔係時候，佢同管家仔一齊，而我，同詠琳一齊。我知道如果我當住詠琳面求佢，詠琳一定會好難過，但係我見到佢咁唔開心，我就更加難過。當我見到佢好傷心咁衝出餐廳嘅時候，我唔想再考慮詠琳點諗，因為我知道如果我唔追出去就會永遠咁失去于素秋，所以我追咗出去，我同于素秋講我寧願做衰人都唔想放棄佢。

如果我可以堅持嘅話，應該可以解決到我哋三個人之間嘅問題，但係我真係好冇用，當我見到詠琳行出嚟嘅時候，我竟然冇辦法同佢講于素秋先係我真心鍾意嘅人。結果，我只能夠睇住管家仔拖走于素秋。我真係好嬲我自己，點解我會咁冇用？點解我開唔到口同詠琳講個真相出嚟？點解我一定要拖拖拉拉，令到自己咁痛苦，亦都令到自己最愛嘅人咁痛苦？

共121個回應

于素秋終於成為正式嘅醫生，我真係好替佢高與，甚至比自己做醫生更加高興。我好想同佢慶祝，為咗咁樣，我特登喺前一晚通頂通到三點，趕起晒所有paper，希望空到一晚嚟陪佢。但係呢個世界往往係充滿意外嘅，當我哋同班同事唱完卡拉OK，諗住去Sunshine Bar會合嘅時候，Dr. Chu竟然話自己架車壞咗，要我幫手車Amy佢哋返屋企。Amy同班護士住得好散，要車晒佢哋返屋企需要好多時間，難得有一晚我可以好好地陪于素秋，我真係好想可以陪佢耐啲。於是我特登開慢啲，扮唔記得入油，叫Amy佢哋幫手推車。班女仔一聽到要推車梗係雞飛狗走啦！其實呃班女仔我都有啲驚架，雖然佢哋唔識揸車，但係如果有其中一個人八卦望吓錶板，見到個枝針指住滿油就一定會穿煲，到時我都唔知點解釋好，不過可以陪多于素秋五十分鐘，搏吓都值得嘅。

之後我去到Sunshine Bar，于素秋見到我好開心。我送咗一隻手錶俾佢，不過我真係好大懵，竟然唔記得自己隻錶比正常時間快五分鐘，將送俾佢隻錶校到同我隻表一樣時間。于素秋見到梗係覺得奇怪啦，我咪唯有話佢聽我咁做係希望喺每一個節日都早過佢講祝福。其實我唔想講出嚟架，有啲嘢靜靜地為對方做先有意思，不過于素秋聽到好開心，算啦，最梗要係佢開心啫。

共37個回應

我以為只要避開于素心，我同佢就可以慢慢變淡，但係個天就好似有心玩我咁，偏偏要我同佢喺南丫島遇到對方。于秋心話佢睇過我個blog，知道咗我同爸爸嘅往事，我望住佢笑笑口咁講屬於我嘅故事，我知道再隱瞞落去，只會傷害得佢更深，所以我終於講出我同詠琳之間嘅關係。

詠琳：一個我欠佢太多太多，無辦法丟低唔理嘅女人。

于素心：一個我愛得好深，但係冇辦法同佢一齊嘅女人。

如果我從來冇認識于素心，我同詠琳應該可以一生一世。雖然我唔愛佢，但係我欠佢嘅一世都還唔晒。佢為我犧牲太多，愛情、前途，一切一切。如果唔係因為我，佢可以安安穩穩咁喺香港打一份舒舒服服嘅工，而唔係喺外國做黑工。佢為我犧牲咁咁多，我冇可能喺呢個時候同佢講我唔愛佢，更加冇辦法為咗另一個女仔而同佢分手。我知道我就係詠琳嘅一切，我係佢人生最大嘅成就同埋希望，如果我離開佢，佢就一無所有。但係于素心唔同，冇咗我，佢仲有好多嘢。佢有環境好好嘅家庭、對佢好好嘅父母、一份好好嘅職業。冇咗我，佢依然會有好好嘅人生，甚至係一個更好嘅人生。所以，我唯一可以做嘅，就係唔好再自私落去，將詠琳嘅嘢一五一十講出嚟…

共86個回應

呢個星期，我向醫院請咗大假，因為我真係唔知點樣面對于素心。我知道我咁樣好不負責任，我所做嘅根本就唔係一個男人應該做嘅嘢，但係除咗無奈，我又可以點樣？或者由一開始我就行錯咗，我唔應該同于素心一齊去睇立仔，唔應該帶佢去南丫島食刺身，唔應該同佢一齊飛撲趕船，唔應該同佢互估對方嘅心事，唔應該帶佢去食「山水」豆腐花，唔應該同佢一齊打電話俾班細路仔，唔應該、唔應該、唔應該，我實在有太多個唔應該。我同呢個女仔明明只係識咗好短嘅時間，點解我哋之間會發生咗咁多嘢？點解我同佢就好似識咗幾十年，經歷咗好多嘢咁？點解我明知道唔應該仍然冇辦法忘記佢？點解？我真係唔似一個男人，喺度胡思亂想太婆婆媽媽，唔得爽快，但係俾著你，當你遇到一個你好鍾意嘅人，但係你又知道自己唔可以同佢一齊，你會點？或者你會話鍾意就應該爭取，而家已經喺廿一世紀，唔再係古時盲婚啞嫁，點會有相愛而唔可以一齊嘅困局，但係我可以好肯定話俾你聽，人生往往不如人願，呢個世界實在有太多嘅無可奈何，所以我只有選擇離開，希望暫時嘅失蹤可以令我同佢都冷靜一下，或者喺我返嚟嘅時候，我可以放得低佢。

共56個回應