我問于素秋，佢同管家仔到底發生咗乜嘢事，如果只係家庭嘅問題，其實根本唔需要在意，雖然我哋唔可以選擇自己嘅父母，亦都冇能力去解決佢哋之間嘅問題，但係我相信所有父母都錫自己嘅仔女，雖然紅姨同JO飽嘅關係好差，但係只要于素秋同管家仔係真心相愛，終有一日，佢哋嘅父母都會為咗對仔女放低成見。但係于素秋話如果佢同管家仔本身冇問題，就算父母幾咁仇視對方都唔會影響到佢哋。咁到底佢哋之間仲有啲乜嘢問題呢？我問于素秋個問題係咪同我有關，佢唔出聲，咁即係默認啦！會唔會係管家仔誤會咗我同佢嘅關係，以為我哋又再喺埋一齊呢？我係咪應該去搵管家仔，好好同佢解釋清楚呢？

但係紙係冇辦法包得住火架，就算你幾努力去死忍唔講個真相出嚟，如果件事註定要穿，想冚都冚唔住。我又邊會估到，于素秋竟然會遇到詠琳嘅媽咪，知道詠琳有病呢件事吖？個天對我身邊所有女人都好殘忍，詠琳有紅斑狼瘡症已經好痛苦，佢最後仲要死喺手術室度，佢得三十零歲架咋，佢應該仲有好長嘅路可以行架。而于素秋，佢同我喺埋一齊喺佢一世人最大嘅痛苦，如果佢唔知個真相，佢就可以憎我一生一世，但個天偏偏又要俾佢遇到詠琳嘅媽咪。呢兩個女人都係好好嘅人，佢哋應該幸福架，如果真係有人需要承受痛苦，嗰個人都應該係我，因為我實在錯得太多嘞，所有嘅苦應該要報喺我一個人身上，但係個天偏偏要令呢兩個女人都受苦，點解上天要咁無情吖？點解呀？

愛情同恩情，喺呢兩個煩擾咗我好耐嘅選擇裡面，我揀咗後者。詠琳為我犧牲嘅實在太多，我唔可以喺呢個時候丟低佢，由得佢一個人孤零零咁返去英國。既然已經揀定咗，就唔可以再猶豫。我太清楚自己嘅性格，如果俾我見到于素秋，我可能又會動搖，所以我一定要徹徹底底咁離開佢，咁樣對佢都係一件好事，于素秋見我唔到，佢就可以慢慢咁淡忘我，喺呢一段痛苦嘅愛情裡面解脫。我知道咁樣做好殘忍，但係我亦都知道佢一定可以過渡到，因為喺佢身邊有一個比我好好多嘅男人陪住佢，我相信管家仔一定可以帶佢走出陰霾。

但係想了結一件事並唔係唔簡單，我以為只要立定決心，唔好再搖搖擺擺就可以唔再傷害到呢兩個女仔，但係有啲傷害原來係一生一世架。于素秋話詠琳搵過佢，仲講咗一樣連我都唔知道嘅秘密俾佢聽。原來詠琳喺英國嘅時候有咗我嘅BB，但係佢為咗唔拖累我竟然去墮胎，仲因為咁而變成不育。我知道咗呢件事之後真係好震驚，點解佢要瞞住我，唔話俾我聽？如果呢個秘密早啲穿，又或者我永遠都唔知呢個秘密，一切都會唔同，我亦都唔需要咁迷惘，但係點解偏偏要喺我立定決心嘅時候，先俾我知道呢件事吖？我真係好嬲詠琳，嬲佢嘅自私，亦都嬲佢嘅偉大。但係我知道，我唔應該嬲佢，因為喺呢段愛情故事裡面，虧欠得其他人最多嘅一定係我，所以，我冇嬲任何人嘅資格。