最近有好多同事開始寫blog，我都想趁吓熱鬧，不過我唔會喺度批判醫療制度或者關一啲關於醫學嘅知識，我淨係想喺度講吓自己嘅日常生活，利用寫blog去抒發一下。

今日食晏，我又好似平時咁去唱片舖睇吓有乜嘢新CD。其實做醫生真係好大壓力，雖然我係做婦產科，主要係接生，睇住啲BB出世，唔似得其他科咁睇住啲病人去世咁灰沉，但係壓力依然好大，所以我一得閒就會聽音樂，而且每日都會快快趣食完個晏，偷啲時間出嚟行吓街，等自己放鬆吓。

今日我行緊唱片舖嘅時候，突然聽到有人話出面有個孕婦要生，我即刻衝過去幫手。我之前都聽過其他同事遇到相似嘅情況，不過我自己就係第一次。講個小知識俾大家聽吖，其實喺醫院以外嘅地方接生，醫生一定唔會幫孕婦剪臍帶，一來係因為冇器材，二來係因為未經消毒，孕婦同個BB好易受到感染。之前先話唔會喺度講醫療知識，結果又講咗，都係講番正題。我去到嗰陣，個孕婦已經生得，不過我見佢年紀唔細，應該係高齡產婦，所以問咗佢幾個問題，發現佢原來有高血壓，一定要開刀，唔適合自然分娩。個孕婦猛咁嗌痛，叫我幫佢接生，我唯有講笑話氹佢，叫佢忍住先。其實我都好緊張，始終我未遇過呢種情況，好彩有個女仔幫手，原來佢同我喺同一間醫院度做。到最後，救護車嚟到，及時送到個孕婦去醫院，個BB順利出世，不過因為早產需要留院，希望佢會健健康康，快啲變大隻B啦！

共69個回應