媽咪，對唔住呀，我真係知錯架嘞，我今次唔係扮嘢架。一直以嚟我都覺得全世界最重要嘅就係自己，為咗得到自己想要嘅嘢，乜嘢手段都要出，無論係屈人哋食死貓又好，夾硬搶人哋啲job嚟做都好，只要係幫到自己嘅，就應該去做。但係我從來冇諗過原來有人會為咗達到目的而殺人。當我見到紅姐推甘老太落樓嘅時候，我真係好驚，甘老太係一個老人家嚟架，雖然佢好煩，我成日都諗如果佢死咗就唔駛咁煩，但係我得個諗字架咋，我冇諗過郁手殺死佢架。紅姐真係好變態，我知道再留喺佢身邊，我只有兩條路可以行，一係變到好似嫲嫲咁，俾佢犧牲，一係變成一個比佢更加狠毒嘅人。無論係邊條路都好，我都唔想行。

我唔會再跟住紅姐，唔會再幫佢做壞事架嘞。雖然我一直都好仰慕紅姐可以將家好月圓搞到咁有聲有色，亦都好睇唔起阿圓嘅工作能力，但係阿圓始終係我老公，我係真心鍾意佢，我唔會為咗紅姐出賣佢架。我知道我而家講乜嘢都唔會有人信我，因為我之前做得太多衰嘢嘞，但係我今次係真心改過架，只要過咗呢個記者招待會，你就會明白架嘞。

共53個回應

點解我成世人都咁慘？一出世就有一對唔理自己嘅阿爸同阿媽，細細個就俾人搞大咗個肚，到識到阿卡又要俾阿月大踢爆，諗住去酒吧飲吓酒又俾嗰個Jimmy借醉行兇。好嘞，呢啲嘢我都唔care嘞，我淨係想同阿圓一齊，同埋好好地咁搞好自己嘅事業啫，點知Jimmy又要彈出嚟問我個肚係咪佢嘅，仲要威脅我俾筆錢佢，唔係就的我去驗DNA，真係煩死人嘞。

衰過一次嘅嘢絕對唔可以衰第二次，我當年就係因為唔忍心落仔，生咗Ronald出嚟，結果留晒手尾，搞到要同阿卡分手，連揸勤份工都冇埋。如果呢個仔出咗世，Jimmy一定會威脅完我一次又一次，咁我呢世都會好麻煩，最好嘅解決辦法就係落咗佢，咁就乾手淨腳。

落咗個仔之後，荷媽約咗我出嚟飲茶，我真係唔想再見到呢個麻鬼煩嘅道理天后，不過佢話晒係阿圓嘅親生阿媽，啲門面嘢咪做吓囉，不過佢真係好煩，我打golf關佢乜事啫，就算我冇落到個仔，唔通真係要我日日喺張床度攤屍咩？左哦右哦都算嘞，佢又夾硬要我拎壺花膠湯，咁樣衰，我睬佢都傻。不過佢真係好鬼麻煩，我話極唔好都仲夾硬嚟，仲搞到我扑咗落地。如果俾佢知道我冇咗個仔佢一定又話呢樣嗰樣，既然係咁，不如等佢內疚吓，將冇咗個肚件事屈落佢度，咁佢就會覺得對我唔住，以後都唔敢再話我啲乜，其他人睇佢頭嘅就更加冇聲出。好，等阿圓返嚟，我一於同佢講，係佢阿媽令到我冇咗個肚嘅。

共114個回應

我一直以為阿卡係一個好正嘅男人，無論外形同性格都唔錯，份人又好玩，係一個理想嘅對象，不過佢有一個非常之大嘅缺點，就係太錫屋企人，佢重視荷媽佢哋仲多過自己個女朋友，咁真係唔多掂。相反，佢細佬阿圓就好得多。我之前都有見過阿圓一兩面，對佢冇乜印象，但係入到家好月圓之後，我哋接觸多咗，仲喺酒吧撞過一兩次。我發現阿圓都幾好，講外型佢同阿卡不相伯仲。講性格，佢係冇阿卡咁風趣咁多古靈精怪嘢，但係佢同我好啱傾，大家一齊喺酒吧飲吓酒傾吓偈，個feel都唔錯。而最重要嘅就係，佢同荷媽一家人一啲都唔close。

初初嚟到香港，我覺得荷媽一家人攬頭攬頸，玩埋一堆，唔似得我阿媽淨係識得去打牌同勾佬，好溫馨好正。但係相處得耐咗，我就覺得佢哋好惡頂。成家人一齊返鄉下食蔗，一齊打吓邊爐的確好開心，但係唔代表乜嘢都以家為先。我同阿卡談談吓情，佢又要講荷媽，說說吓愛，佢又講管家仔，我到底同一個男人拍拖，定係同一頭家拍拖啫？最惡頂嘅就係玩埋乜嘢親情枚，真係白痴到令人打冷震，佢哋班人都冇腦架，無端端喺屋企猜乜嘢杖啫，核核突突咁。阿卡最大嘅缺點就係黐得呢班人太多，搞到自己都short short地。阿圓就唔同嘞，佢同荷媽一家人唔算太親密，得閒飲吓酒打吓波，正正常常，唔會搞爛gag，唔會突然間猜親情枚，同佢一齊好舒服，唔駛降格做埋啲白痴嘢。有個咁正嘅男人一直擺喺度我都留意唔到，我真係蠢呀，如果我早啲同佢一齊就唔駛搞出咁多嘢啦！

共57個回應

孫皓月真係超級黑人憎，次次都要破壞我。上次爆我有個私生子單嘢出嚟已經搞到我一身蟻，冇咗阿卡，又冇埋份工，荷媽一家又仇視我。我幾經辛苦先至搞番掂晒所有嘢，令到荷媽一家原諒我，令到阿卡同我喺番埋一齊，但係佢又要再搞破壞。我都唔明點解我啲秘密次次都會俾佢知道，上次阿媽論盡俾佢見到張postcard已經夠衰，今次又俾佢知道咗Jimmy唔係Ronald嘅爹哋，只係同我夾埋做戲，佢簡直就係我嘅剋星。佢仲迫我自爆，話我唔講就佢講，佢真係好煩呀！

要我同阿卡講我今次又呃佢，咁即係焗我哋分手架啫。上次我同阿卡講我唔會再隱瞞佢，以後都唔會再講大話，佢以為我係誠心改過先至會原諒我。今次俾佢知道原來所有嘢都係假嘅，佢一定唔會原諒我。要令阿卡重新愛上自己唔太難，但係要佢重新愛上自己兩次就超級無敵難，我知道我輸緊，今次冇得救架嘞。既然都係輸，點都要拎番個尾彩。我路嘉美俾人飛過一次已經好夠，我唔會俾人再飛第二次。橫掂都係冇得掹，我飛人點都好過俾人飛，所以我一定要快過阿卡講分手。我而家坐緊的士去搵阿卡（點解我仲打到呢篇嘢？呢個世界有pda架嘛），希望我可以快過阿月啦！

共91個回應

Plan A──打親情牌

如果我想同阿卡再喺番埋一齊，首先要喺佢屋企人方面入手，令到佢哋唔好再阻頭阻勢。上次我咁樣hurt阿月，要佢哋原諒我唔係一件容易嘅事，但係荷媽成日都話做人再緊要真誠，又話最緊要係知錯能改，只要我喺佢哋面前扮內疚，扮真心改過，唔會再搞事，咁荷媽就唔好意思再話我啲乜。聽講佢哋諗住幫媽咪搞個乜鬼莎莎之夜，我諗呢個係一個好機會，只要我扮到同媽咪和解，好似好想要番親情咁，佢哋一定會信我係真心悔改嘅。

Plan B──令阿卡重新愛上我

要令阿卡鍾意番我真係有啲難搞。不過所有男人都係同情弱者嘅，只要我喺阿卡面前扮可憐，就有可能刺激到佢嘅英雄感，令到佢可憐我，由憐生愛。為咗咁樣，我搵咗雯雯個阿哥Jimmy幫我扮Ronald仔個阿爸，我叫佢衰衰格格咁喺阿卡面前問我攞錢。阿卡見到我俾個男人迫到咁慘，一定會企出嚟幫我手。到時我就扮到好可憐咁，話自己有咗Ronald係因為年少無知，係因為阿爸阿媽從來到唔理我，冇人教好我。只要阿卡嘅態度軟化，我再推一推佢，佢一定會再上勾。

我覺得呢兩個plan應該OK架嘞，等我再諗吓有冇其他backup plan先。

共51個回應

我真係估唔到阿卡原來冇相信過我，佢仲叫人喺葡萄牙查我。既然個真相都爆咗出嚟，我仲可以點？我可以話阿月因為太愛阿卡而屈我，但係我冇可能話一個唔識我嘅人所查到嘅嘢係假嘅。我真係輸晒嘞，仲輸得好貼地添呀。不過我唔會認輸架，會認輸嘅話，我就唔係路嘉美啦，我一定會搵到方法反擊，不過我需要時間，好好地諗吓有乜嘢可以做。

件事發展到呢個地步，再去屈人只會令阿卡全家對我嘅印象更加差，所以喺呢個時候，我一定唔可以用一啲太激嘅手段。我而家可以用嘅牌唔多，最好用嘅一張可能係我阿媽。人嘅心態好奇怪，當有兩個衰人同時出現，只要有一個衰到貼地，就會好自然咁覺得另一個衰人所做嘅嘢唔係真係咁過份。喺阿卡全家人眼中，我同阿媽都係衰格嘅，只要我可以令到佢哋覺得阿媽衰啲，甚至令佢哋覺得我之所以有今時今日全部都係阿媽造成嘅，佢哋就會同情我，咁我就可以攞番唔少分。而呢家人裡面，最易落手嘅應該係阿卡，雖然佢為咗阿月件事而嬲咗我，但佢愈痛心就代表佢愈在乎。既然佢仲鍾意我，咁我只要係佢面前扮可憐就有機會令到佢企番喺我嗰邊。我一定要好好諗吓下一步點做，呢張牌一定要打得好小心，如果出錯牌，拆散咗副同花順就好難打落去架嘞。我一定要認真啲諗清楚。

共39個回應

阿月真係好鬼麻煩，竟然想爆Ronald仔啲嘢出嚟。阿媽又係白痴嘅，叫咗佢唔好再同Ronald仔聯絡架啦，佢又唔聽我講，搬咗屋又唔話俾孤兒院知，搞到Ronald仔寄咗張postcard去荷媽屋企，仲要好衰唔衰俾最衰嗰個阿月見到。真係黑仔呀！好彩我醒目，諗到方法兜，話Ronald仔係我助養嘅，所以先會叫我做媽咪。荷媽佢哋冇質疑到我，阿卡仲好信我添。呢個阿月個腦生草架，淨係得個勇字，想整死我？我唔玩死佢，啖氣點落呀？

一個女人最重要都不外乎愛情同埋事業架啫。愛情上，阿卡已經係屬於我，佢唔會再有機會，不過我知道佢唔會咁易收手，唔係佢都唔會上門幫阿卡執去新加坡嘅行李啦！我見佢送到上門，咪借機踩吓佢囉。我明知阿卡搭緊lift上嚟，所以特登唔冚門，大大聲聲叫阿月唔好再屈我，阿卡上到嚟以為阿月又唔知同我講咗啲乜，即刻黑晒臉，的咗阿月落去講數。

不過阿卡太好人嘞，鬧完人又要氹番人，為咗呢件事鬧完阿月之後又要buy番佢個idea氹佢開心。佢個idea鬼咁白痴，根本就唔見得人，而且我一早已經度好晒橋，連阿卡都話我個idea好。阿卡為咗令阿月開心而用佢個低能idea，點會服喎？既然阿卡唔肯企喺我嗰邊，我唯有向個客落手，話俾佢聽阿月個idea會overbudget。一聽到超支，個客仲唔褪軚咩？咁我又成功拎番個project嚟做嘞。呢個阿月低能到好似史前生物咁，佢想鬥贏我？除非佢個腦突然間進化一萬倍啦！

共83個回應

我真係愈嚟愈睇阿月唔順眼，佢份人烚吓烚吓，無厘醒目，如果唔係阿卡睇在佢係自己個妹份上，點會請佢去揸勤做嘢喎，今次阿卡仲帶埋佢去夏威夷做嘢，我條氣點都唔順架嘞。我叻佢咁多，要去都應該由我去，所以我捱咗幾晚通宵，趕起晒手頭上啲嘢，蟻阿卡帶埋我去。阿卡咁鍾意我，梗係應承啦。不過有得去係唔夠嘅，我要利用呢個機會擴闊自己嘅人脈，方便第日做嘢，亦都要利用呢個機會同阿卡進一步發展。要成功，第一件事梗係要趕走阿月，等佢冇得去夏威夷。如果直接叫阿卡唔好俾佢去，會影響到我喺阿卡心目中嘅形象，就算特登搞亂佢手頭上嘅project，阿卡都有可能叫其他人follow，俾阿月繼續去夏威夷，咁仲有乜嘢方法可以令佢去唔到呢？

本來我好頭痛，諗嚟諗去都諗唔到有乜嘢辦法，但係估唔到呢個蠢才連本passport就快過期都唔醒起，臨急臨忙先去補領，仲因為要趕起份fax去唔到拎passport，咁我就有晒機會入位嘞。本來阿月想叫個officeboy Billy幫佢拎passport，但係我醒目，夾硬搵啲嘢塞俾Billy，話係急件，要佢送去葵涌。葵涌同灣仔差咁遠，一來一回又邊趕得切拎本passport喎，阿月冇辦法咪唯有應承俾我代佢拎囉。我又點會真係咁好人幫佢先得架，本passport一到手，我就即刻撕爛佢，丟入垃圾桶。冇咗本passport，佢又趕唔似再申請過第二本，仲點去夏威夷？冇咗呢隻發霉嘢阻住晒，人都精神爽利啲。夏威夷，I’m coming!我一定可以利用今次嘅機會，令到阿卡成為我嘅男朋友。

P.S. 阿月，我知道你去唔到夏威夷一定好唔開心，我會影多啲靚相返嚟俾你睇，仲會買番條草裙俾你做手信，我係咪好好人呢？:P

共98個回應

我真係好憎你好憎你好憎你！點解你要係我媽咪？點解個個人都有個正常嘅家庭，而我屋企個個都咁騎呢？阿爸喺出面搞女人，仲要揀個二百磅嘅大肥婆已經夠晒樣衰，我阿媽仲恐佈，搞婚外情都要搵一個又蠢又肥又自大，仲要後生過佢嘅嚟搞。我就當愛情係盲目嘅，唔同佢計，但係佢做嘅嘢愈嚟愈騎呢，嚴重挑戰我嘅底線。

首先，佢屈荷媽唔係公公個女，迫公公去驗DNA。佢真係傻架，做人咁短視。點解JO鮑要俾錢公公吖？因為荷媽係公公個女，阿卡、阿好佢哋係公公嘅外孫！只要我哋有呢班王牌喺手，以後要名利要機會都會方便好多，但係媽咪為咗公公戶口嗰啲錢就迫公公同荷媽脫離父女關係，佢真係短視兼冇腦。係人都知道如果你有一隻生金蛋嘅鵝，你應該要養肥佢，而唔係殺咗佢啦，媽咪真係蠢到冇人有。而最樣衰嘅嘢就係，公公發現咗同自己冇血緣關係嗰個係媽咪，而唔係荷媽。如果媽咪唔係搞咁多小動作，件事根本唔會穿，你話佢係咪多餘吖？

好嘞，件事settle咗，公公佢哋見媽咪連銀紙都肯食，終於相信佢肯改過（媽咪用嚟解決件事嘅辦法都騎呢過人），點知媽咪又故態復萌，竟然拎JO鮑同荷媽啲相去威脅殷紅。佢個腦到底裝乜架？除咗錢仲有冇其他嘢架？佢仲要衰格到推殷紅落扶手電梯。真係oh my god！點解我有個咁嘅阿媽？我真係好羨慕阿好佢哋有個咁正常嘅阿媽，點解淨係我一個要生喺個咁騎呢嘅家庭？Why Me？

共115個回應

我路嘉美成世人最憎一啲狗眼看人低嘅人，如果你係勁，你係叻，我唔介意你睇我唔起，但係睇唔起人係要講資格嘅，如果你同我都係咁高咁大，又或者唔見得好我幾多，我覺得你絕對冇資格睇唔起我。

可能大家會好奇怪，點解我會無端端講啲咁嘅嘢，事緣今日我去shopping睇中咗個三千八蚊嘅手袋。一個手袋三千八實在太貴，我唔係買唔起，如果我真係想要，可以蟻阿媽買俾我，不過我唔想煩，而且我真係覺得嗰個袋根本唔值三千八。我將個袋俾番個sales，點知佢竟然串我，問我有乜嘢睇唔啱，仲塞個千九蚊嘅袋俾我，話係全店最平，咁即係睇唔起我啫，激到我吖！

我嬲起上嚟即刻打電話俾阿卡。阿卡好好人，聽完件事之後即刻撲過嚟，扮到好似啲大陸暴發戶咁，喺間舖頭度亂咁指，樣樣都話要買。啲sales見到佢即刻擦晒鞋，仲話要幫佢試身，阿卡即刻笑佢哋生得矮同埋係飛機場，佢哋嬲到震又唔敢出聲，我睇到都覺得心涼。之後阿卡全部嘢都唔要，淨係要咗三千八嗰個袋，仲係啲sales面前問我係咪呢個袋。哈哈，嗰兩個sales嬲都噴火，抵佢哋死呀！

共49個回應