今日喺我返嚟香港嘅第一日，為咗紀念呢個日子，我決定由今日開始寫blog。其實我唔想返嚟香港架，我細細個就去咗葡萄牙生活，一早已經唔記得香港係點樣，而且我男朋友又喺葡萄牙，過咗嚟呢邊乜都要重新開始。我真係好唔想返嚟，不過阿媽話如果我肯跟佢過嚟，佢就會俾錢我開舞蹈學校，為咗事業，冇辦法啦，事業始終緊要過愛情，橫掂我都唔係咁鍾意我男朋友，咪乘機飛鬼咗佢囉。去到機場，俾我見到一個我最鬼憎嘅人──袁恩賜。

呢位肥阿叔真係好鬼煩，佢係我阿媽嘅「愛人」，講起呢個term我都打晒冷震。我都唔明阿媽鍾意佢啲乜，搞婚外情已經樣衰架啦，搵一個又肥又冇用，仲要細過自己嘅嚟搞就更加樣衰。原來呢位阿叔決定帶埋阿媽去香港「發展」，我聽到即刻黑臉，阿媽梗係知道我唔想見到佢，所以先斬後奏，唔話俾我聽佢都會跟埋我哋走啦，搞埋晒啲小動作，乞人憎！

返到嚟香港，同姨媽一家人食飯，阿媽竟然叫埋佢個「愛人」同「未來奶奶」嚟，阿「愛人」仲要扮晒嘢，我真係覺得好樣衰。阿媽到底有冇腦架？乜佢唔覺得搞婚外情好樣衰架咩，竟然敢帶個男人返屋企見公公。唉！點解我會有個咁白痴嘅阿媽架？

共16個回應